Job 5
5
1Oye odi ni dị kạloghonaan nyịna ḍịghaagh ḍụghum?
Mạgh aphogh, Job, mọ ọokpaany kꞌẸnaan kamegheron ni.
2Eḍighi ni elologhi iboom
ọoḅaghami aloor ạna oghire ghan tụtu nạ amugh.
3Mị mạmiin ghan ni rolologhi dị ẹghi mụdi ịyaar rẹ́eḅaghami
kụ ọlo mị uronyon ni iloghi aruutu phọ ạbidi.
4Ạnmuny phọ ạbidi kótue ọmoogh dọl ẹereegh;
oye ólho dị kạmeera ạgbaanaan bịdi otu iilogh.
5Awe lọ ọkoony rasiph kụ kole riiḍien lọ uwo elologhi aḅeph —
ghạlamo ịizupha lọ esi igbo iitoor —
kụ awe ẹephua ạmuum kogbeghe ni ẹelha phọ ọdi.
6Ịkaraph rési ghan ude kemite; ḅịle kẹn,
ịiḅaghami rési ghan sịen ade phọ kemite.
7Eeye, ọkar agey. Oye kụ rạsighe ghan ịiḅaghami kạngo loor ọdi,
ọkar ịdipho ạnian rẹkpataan ghan bọ kemite loor ạnian.
8Mụghumo mị kụ ạna, mị mukiton ạghi esi Ẹnaan
kụ ạḅogh ḍighiton phọ ạngo nyọdi.
9Yira kótue ọnaghanan igbogh ạraraar phọ dị raḍighi ghan bọ,
kụ ịiḍaany phọ ọdi eekuna ílho.
10Ọdi kụ rạngo ghan ọlophia de phọ;
ḅịle kẹn, ọdi kụ raadu ghan mụum iizo phọ.
11Ii, Ẹnaan kụ repoophe ghan bụphe osooromi bọ loor,
ẹḅile rẹngo ghan iboh oomo ạbuphe odi bọ ọto.
12-13 #
1 Kọr 3.19
Ọdi kụ rakpor ghan kazu igbiighi awe areekeleghian,
kạḅile ạsighe igbiighi awe olegheri ịyaar asiphom bịdi
bịn ịyaar ílho dị bịdi oḍighi kụ kẹnighe;
14ghạlamo amem ootaany bịdi rooba ni esi ufiri.
15Kụ ọlo, Ẹnaan rẹpel ghan rukulom mọ esi aḍuugh;
ọdi rạpel ghan bụphe ịyaar ụ́moogh bọ mem lọ awe rọgbiphoghom bịdi.
16Ọdi rạngo ghan oḍuom ologhi rukulom mọ kạḅile akpomori rụnhu ạbukaraph awe.
17 #
Asid 3.11, 12; Hib 12.5, 6 Ọḅaal ologhi odianaan oye dị Ẹnaan kụ eelemi.
Kákire mem lọ ọdi rạḅaam nyịna.
18 #
Hos 6.1
Ẹnaan reekonom ghan ni rẹlem lọ ọdi ạloghoḍi;
ạḍighaagh phọ ọdi kụ kẹlogh ẹlem mọ kụ ạḍighaagh phọ ọdi kụ keekonom ni.
19Amem etum mem ọdi kạphel li nyịna esi ịkaraph.
20Mem lọ ịgbakuro eru, ọdi kámeera nạ amugh;
ḅịle kẹn, mem ẹgham ọdi kạgbalagham ni nyịna esi aḍuugh.
21Ẹnaan kẹtagharan ni nyịna ẹsighe esi iḅoroghom;
ọdi kạphel li nyịna mem lọ ịiḅaghami eru oogulemi ạna.
22Nạ kạmilogh ni ọkoony rꞌạraagham;
ḅịle kẹn, nạ kákiilaan ilhom ịnam.
23Iizo lọ nạ aḅeph ạrana kẹ́tol;
ilhom ịnam nyịna kézuom.
24Kụ nạ ạtol rꞌẹepho sịphe ogbogo phọ ạna;
mem dị nạ aphogh iyool-ịga phọ ạna, nạ kạmiin ni mọ ịyaar ị́ḅogh bịdi.
25Nạ kạmoogh ịbadi ạnmuny
dị koḍiza ịdipho ạroogho lọ asi.
26Ịdipho ịbiakpa rẹtol ghan bọ kẹḅaal kụ ogbi nụun ọku,
ịpe kụ ịdi nạ kạtol ạkpo agey.
27Job, yoor mọtuugha ni iboom kụ ogbi bọ olegheri ịphen phọ.
Ọkpe ólho, kụ iḍighi kụ sịghe ni.
Currently Selected:
Job 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
