Job 4
4
Ọḅel ọghaaph phọ
(4.1—14.22)
Ẹlifaz
1-2Job, kepin ni ologhi ạna ḍụghum eḍighi ịyaar dị mị ạḅem ịyaar?
Mị kátue mun aḅoorian.
3Nạ mạtughemi ni ịbadi awe
ạngo ịnyaam rạghaagh dị edugh.
4Mem dị oye akpetaan adugh ḅịle arukumuan ẹpher,
ikpo ọnhu ạna rẹngo ghan ni nyọdi ọninom kạmeera.
5Nyịidipho mesi nyịna ọmoogh ịiḅaghami,
kụ ekperenom bịn nạ órue ọmerenyan.
6Nạ ụuḅereghi ghan Ẹnaan, ḅịle kẹn aghuḍum ạna ạser-sẹr;
ọbo ẹkpe dị nạ kạmoogh ạkpo ologhi rꞌoḍuom ologhi.
7Tụutughian ẹpe ọman. Kol eniin esi
dị oye aruukuan azuan ịiḅaghami dị eegulemi nyọdi.
8Mị mạmiin ni weye dị oḅeph ịkaraph,
ḅịle kẹn ọzuph ẹkaraph eḍighinom ịyaar ịdipho ịizupha;
nyịidipho bịdi robugha ghan ịkaraph.
9Ịdipho oghim kụ ẹdi Ẹnaan reegulemi ghan bịdi esi ọghagh ologhi phọ ọdi.
10Ạbukaraph awe phọ rogbophoghu ghan ịdipho ạnam-dịka,
kụ ọlo, Ẹnaan rekpomori ghan rụnhu ạbidi keḅonyon rạlaay ạbidi.
11Ịdipho ạnam-dịka dị ịyaar oghiigh ạa ílho,
bịdi romugh ghan, kụ oomo ạnmuny ạbidi ọwalala.
12Eniin amem uphola ni dom ụḅeni ịmi,
dị mị ụkpar ri kụ ạnaghan.
13 #
Job 33.15
Ịdipho ạmukaraph ạmalha kụ ẹeḅaghami rạlha phọ ạmi.
14Mị akperenom kụ aloor ạmi ephiigha;
oomo aloor ạmi repiigha ni ruugu.
15Ọony ẹnum ookuugh ạteeny risigh ạmi;
asuphuugh aloor ạmi ẹmeregha.
16Mị rạmiin ghan ịyaar ẹmeera;
mị akiririom aphogh, kụ ọlo mị ụ́logh elegh.
Kụ mị agbi ọnaghan ẹḍogh dị emite.
17“Oye katue ni aseleman risigh Ẹnaan ḍụghum,
ạnhian kụ kaseleman risigh Ẹnaan Oomo Ịikpo phọ ạlhem bọ nyọdi?
18Ẹnaan réḍuom ghan ologhi ịikpo phọ ịpe edi bọ kꞌạke;
ghạlamo rụukpaany kꞌạke phọ ọdi bịn ọdi rạmiin ghan ni ọpioman ạbidi.
19Nạ ragbi mọ ọdi kaḍuom ni ologhi oye dị ọlemom ọposo,
ịyaar dị oḍighinom ophugh dị kotue ni oogbighi ịdipho iphiliḅa.
20Oye katue ni ạtol eye ḍịroor
bịn kụ lẹeph amugh ịdi kólegheri kụ adulhe egbi oru.
21Oomo phọ ịpe ọdi ạmoogh bọ mọsighe;
ọdi amugh, olegheri ịyaar ọ́moogh ni.”
Currently Selected:
Job 4: ẠḌI
Highlight
Share
Copy

Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS