Job 3
3
AJob ạkunuma, ạkaaph ạḅeni Ẹnaan
1 #
Jer 20.14-18
Ruukuna phọ aJob ạḅa ni kụ aronyon ḍio phọ ạḍiphe ọmar bọ nyọdi.
Job
2-3Ẹnaan, tonyon ḍio phọ ụmar bọ ịmi;
tonyon ḍughul phọ ọkpo bọ eghun ạmi.
4Kiton ḍio phọ ạḍiphe atene ufiri;
kạ́atughian mun ḍio phọ ạḍiphe phọ;
ạḍiḅaal kímite mun esi ọdi.
5Ḍighi ḍio phọ ạḍiphe ḍio ọto rꞌokikiph ufiri;
sịghe ọotu aakpereghiom, aḍime erumuḍio phọ.
6Piemi ḍughul phọ ạḍiphe phọ sịphe ạlha phọ;
awe kúgbiom ghan mun ụ́logh esi.
7Ḍighi ịdi edughom rꞌibo kẹ́tolonaan ḍughul phọ ạḍiphe phọ.
8Ḅẹni rụḅaghama phọ mọ oronyon ḍio phọ ạḍiphe phọ,
bụphe ọmoogh bọ ịikpo ọdaam Lẹviatan.
9Kámeera okoriom-ẹenaan ạḍiroor phọ ẹmu;
oḍuom ologhi ạḍiroor kụ́tol ḍughul phọ ạḍiphe.
10Tonyon ḍughul phọ ạḍiphe emeera bọ mọ ụmar ịmi,
emeera bọ mọ ụḅogh ịmi ọngo ọto rꞌịiḅaghami.
11Mịnighe dị ọbo mị amugh ologhi ọkuruḅaka onhiin ạmi,
ọbo kẹn amugh mem mọ ọpo ọmar bọ bịn.
12Eeghe kụ iḍighi kụ onhiin ạmi uḅeton ghan bọ ịmi?
Eeghe kụ iḍighi kụ ọdi ụngo bọ ịmi mạmaam mọ ọdi?
13Mụghumo mị umugh mem mọ ọpo phọ,
ọbo mị rapooghian nyịidipho;
14ọbo mị rạnaani ghan ịdipho ạraalha ḅịle rꞌawe ịtooghi,
bụphe ọḅile bọ odoghoḍi ghan ruutu ạraalha ageedi phọ.
15Ọbo mị rạnaani ghan ịdipho ạnmuny ọdaam,
bụphe omuzeḍi bọ ruutu ạbidi gol rꞌasilva,
16mụghumo ọnaani ịdipho ọony lọ ọmar kụ umoghi.
17Sịphe oḍi phọ ịkaraph awe rótue ghan mun koḍighi ịkaraph,
ḅịle awe dị arukumuan mẹpher rọmala ghan kophooghian.
18Ghạlamo ạbuo ikoli bịn rọkelom ghan ẹepho,
mokpetenaan ịpe aruwo ẹmhu phọ rọlooghiom ghan bọ komooghaam.
19Tọrotoro oye odi ni ẹpe phọ, ọpo amitiom bọ ḍien phọ ḅịle rꞌọpo oye úlegheri bọ;
ekureriom mọ, ạrebene rọtol ghan ẹereegh.
20Eeghe kụ omeera bọ kụ awe odi ghan dọl ịminimiin bịn?
Eeghe kụ ọngo bọ ḍịḅaal weye dị odi esi ọto?
21 #
Ogon 9.6
Bịdi rokori ghan ḍuugh, kụ ọlo aḍuugh ímeera ítu;
oḍi kụ ạḅeeraan bịdi epu ẹelha.
22Bịdi ụ́moogh ọḅaal ologhi tụtu bịdi omugh oḍi;
23Ẹnaan ẹbooghi ịlo iḍue phọ ạbidi
kụ ekoonyom bịdi ekitonom.
24Kpạripe rꞌole eḍien, mị odi ghan ọto;
kụ mị kạ́bile ịkuph.
25Tọrotoro ịyaar lọ mị aghiilaan remite ghan ni.
26Mị ụ́moogh ẹepho rꞌophooghian;
ḅịle kẹn ịiḅaghami phọ ạmi eekuna ílho.
Currently Selected:
Job 3: ẠḌI
Highlight
Share
Copy

Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS