Job 19
19
Job
1-2Eeghe kụ iḍighi kụ nyina ẹsighe bọ ikpo ọnhu kụ rịgbiphoghom ịmi?
3Amem etum mem nyina riituuny ghan ịmi
kụ umugholoor inyina rísiph ghan ịduon nyina rịgilaam bọ ịmi.
4Ghạlamo mị mạpioman ni,
iḍighi ika kụ rịiḅaghami bọ inyina?
5Nyina regbiom ghan mọ nyina ipu ni ịmi,
ẹḅile kẹn ẹsighenom mọ ịiḅaghami phọ ạmi eḍeenaan ịdi mị mạpioghom.
6Nyina ítue ị́miin mọ Ẹnaan kụ aḍighi ịphen phọ?
Ọdi mạkpami ḍiphil osiphom ạmi.
7Mị rạḅa ni ịphen ọdi rụkpilighi bọ ịmi,
kụ ọlo oye rạ́naghan;
oye ọ́naghan ẹḍogh emoghi phọ ạmi ọmoogh iiḅi ịiruen.
8Ẹnaan mekikima eten phọ, bịn mị kátue mun aten;
ọdi mạsighe eten phọ ạmi ạbooghi esi ufiri.
9Ọdi mạsighe oomo ẹelha phọ ạmi,
ạḅile aagulemi ḍigey aḍien phọ ạmi.
10Ọdi ruukporogh ghan ịmi kakitonom.
Ọdi maruphuron oḍuom ologhi phọ ạmi bịn
kụ ụwile ịmi mọ mị ụkaraghar umugh.
11Ẹnaan rịghagham ịmi ologhi iboom;
ọdi ruḍighi ịmi ịdipho egbogh ẹpomoghian ọdi.
12Ọdi atom weye ẹgham ọdi mọ oru uzuom ịmi ẹgham;
bịdi oguphogh riini kụ ọḅukian yogh rokori ghan ogbogo phọ ạmi.
13Ẹnaan meḍighi ịdi abumor ạmi mụḅitonaan ịmi;
mị aḍighi ooruen esi awe dị ulegheri ghan ni ịmi;
14asiya phọ rꞌạrighiri phọ ạmi mosumughu.
15Awe dị oru ghan kụ mị ạko igoni ẹpe kꞌạmi muwula ịmi;
ạnmanyaan-otu ạmi ruḍighi ghan ịmi ịdipho ooruen.
16Mem lọ mị ạmagh, otelhedom rámeera —
ghạlamo mị ụuḅereghian ni nyọdi mọ ụlhoghonaan ịmi ḍịghaagh.
17Ạnir ạmi órue ọkparam eḍu ạmi,
kụ abumor phọ ạmi ịmi rútuman ghan mun.
18Ịbam ạnmuny ụḅitonaan ịmi ọḅile rọmilogh ghan mem lọ ụmiin ịmi.
19Ọkaraghi ẹmhu-ạrighiri ạmi ụmiin ịmi ẹnighe ozuughi;
bụphe mị ạkaraghi bọ ạphomoghian rọ́wa ghan mun ọmiin ạmi.
20Aḍizu phọ ạmi okpologhi ạnyu ịḅarara phọ ạmi.
Aghuḍum mọ ạmi bịn kụ ạmala usughanaan ịmi.
21Nyina ạrighiri ạmi! Ịnma ịmi ighirigiir!
Ạḍighaagh Ẹnaan mịgur ịmi eler ude.
22Eeghe kụ iḍighi kụ nyina rịgbiphoghom bọ ịmi ịdipho Ẹnaan rịgbiphoghom bọ ịmi?
Nyina ịmi kị̋miine ịdi mẹkasian ḍụghum?
23Ḅẹlee mọ oye kạatughian ni ikpo ọnhu phọ ạmi
ạḅile ạge ạlogh ḍịnya!
24Ọbo kẹn ạsighe ḍịkuom ạkaam ikpo ọnhu phọ ạmi ạnyu aḍighiigh
kụ ạge ịdi kẹtol kꞌagee-pọ.
25Kụ ạri mị alegheri ni mọ oye odi ni ẹpe kꞌạke
dị katu ni ẹpe eekuna phọ ọphel ạmi.
26Ghạlamo ẹzegh phọ ile ni ḍizu phọ ạmi ẹmadan,
sịen phọ mị odimom bọ ni loor phọ aḍien phọ, mị kạmiin ni Ẹnaan.
27Mị kạmiin ni nyọdi rꞌọkaraghi ariḍien ạmi,
kụ ọdi káḍighi ooruen.
Aloor ạmi idugh ni loor esi dị nyina ịḅem mọ,
28“Yira koḍighi ika kụ ọkpilighi nyọdi?”
Nyina rẹwa ghan ịyaar ọtuan ozuom ạmi ẹgham.
29Kụ ọlo nyịidipho ikiilaan elhool ẹgham mọ —
elhool ẹgham mọ ẹpe rẹsighe ghan bọ ghẹlhe phọ Ẹnaan keru esi ịkaraph,
bịn nyina kelegheri ni mọ oye odi ni dị raagbo ghan ịiruen.
Currently Selected:
Job 19: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
