Ẹḍua 25
25
Inmo ịlo Ogbogo Iigbia
(Ẹḍua 35.4-9)
1Ọmoogh-we phọ ạḅeni Mozis mọ, 2“Ḅẹni we phọ Ịzirel mọ ụngo ịmi ruunmo. Bọor ghan tọrotoro ịyaar lọ oye ameeraam ọngo. 3Ịphen kụ ạraraar phọ bịdi kọngo ghan bọ: agol, asilva rꞌenaba; 4ọyegheyeghe ukpe; ạbiloogh, oodor rꞌọtogh-tọgh ogbidagbida ukpe; ukpe lọ oloom suphuugh ạrutu-ịga; 5ozu odughuna dị ọtoghomi; ọyegheyeghe ozu ạtu-ọga, oreeny ạkasia; 6mụnum ọsuom ịtozi phọ; rạraar lọ kẹnighemi mụnum-ịko phọ ẹḅile ẹnighemi eḍu ịnsens phọ; 7ikpo ẹbe ḅịle rꞌịnon ọdo ịkuta dị kọkpoghi onyoraam, ọḅile ọsuaram ekpologhi ogbogh oyil ạrikia phọ. 8Awe phọ ụlhoghonaan ịmi ogbogo iigbia pịdi mị ạtol ghan rꞌạbidi. 9Ịtuugh ịpe mị kiḍeenaan bọ inyina kụ ẹlhogh.
Igbe Ịyo phọ
(Ẹḍua 37.1-9)
10“Ịsighe oreeny ạkasia kụ ẹkaam igbe; 110 ẹkulom ạḍighaagh ḍịdoony, 66 ẹkulom ạḍighaagh ḍịregh, 66 ẹkulom ạḍighaagh ạnyu. 11Iḍighinom ologhi phọ rꞌạnyu phọ ogey agol, kụ ẹḅile ẹghoor gol phọ ekitonom. 12Ịlogh inya ịkoro dị oḍighinom gol etulom inya phọ aruwol phọ ọdi, ịyal ịne agha ịyal ịne agha. 13Ịsighe rọkolom ạkasia dị oḍighinom gol kụ eḅughe sịphe ịkoro phọ 14eḅughe sịphe ịkoro ịigaany phọ. 15Rọkolom mọ kọkporori bịn sịphe ịkoro phọ ọbilenom. 16Lọgh sịphe igbe phọ ịyal ipoḍi asighiigh phọ ịpe ọge bọ iilogh phọ mị kịngo bọ nyịna.
17 #
Hib 9.5
“Ịsighe ogey agol ẹkaam ekpereghi, 110 ẹkulom ạḍighaagh ḍịdoony, 66 ẹkulom ạḍighaagh ḍịregh. 18Ịsighe gol ẹgurogh ẹpeḅeremi kụ ẹlemom ịyal ạruukpaany aghuḍuul dị ẹmoogh raphaaph, 19oniin ạrol eniin eekuna ekpereghi phọ. Ịka bịdi ẹḅaraghiom ekpereghi phọ. 20Ạruukpaany aghuḍuul phọ ẹmoogh bọ raphaaph phọ eesomanan, ḅịle araphaaph phọ ạbidi ẹetaranu eghoph igbe phọ. 21Lọgh ịyal phọ asighiigh phọ ologhi igbe phọ kụ akpereghi. 22Mị kạteeny nyịna sịphe, ḅịle sịphe ạnyu eekpereghi phọ igbo ịyal ạruukpaany aghuḍuul phọ ẹmoogh bọ raphaaph phọ kụ ẹdi mị kạngo nyịna iilogh phọ awe phọ Ịzirel kọtolom bọ.
Ịdaabili ọḅam ghan ạbred dị kọngo Ẹnaan
(Ẹḍua 37.10-16)
23“Ịsighe oreeny ạkasia kụ ẹkaam ịdaabili; 88 ẹkulom ạḍighaagh ḍịdoony, 66 ẹkulom ạḍighaagh ḍịregh, 66 ẹkulom ạḍighaagh ạnyu. 24Igbul oomo phọ ọdi gol, ẹḅile ẹsighe gol eghoorom iigboom mọ ekitonom. 25Sịghe gol kụ ạḅagham ruukuna phọ ekitonom oḍual rꞌegbem ẹkulom ạḍighaagh ḍịregh. 26Sịghe gol kụ ạlhemom inya ịkoro kụ ẹlhogh inya phọ aruukuna phọ ẹpe aruwol phọ edi bọ. 27Ịkoro phọ ịpe kẹpam bọ rọkolom mọ kopoophiom ghan bọ ịdaabili phọ ẹrol etuman ẹpe ọḅagh bọ. 28Sịghe rọkolom ạkasia kụ ẹkaam ireeny phọ kụ egbul gol. 29Sịghe ogey agol kụ ạlhemom rụkpa rꞌizoki ọphugholom ḅịle rꞌiigboghom ạsigbagba lọ koḍighinom ghan mem ạrikia-amiim. 30#Lịv 24.5-8Seere ghan ịdaabili phọ risigh Igbe Ịyo phọ, ḅịle ạnyu ịdaabili phọ ạbred iigbia phọ ạmi ạrol ghan oomo amem.
Ọmeremiom ọtozi
(Ẹḍua 37.17-24)
31“Sịghe ogey agol kụ ạlhemom ọmeremiom ọtozi. Ẹpe ade phọ ḅịle rꞌẹpe ạnyu phọ ḍighinom gol dị ọgurogh ọpeḅeremi; ịnme phọ ọdi ẹḅaram ịizughum rꞌipoola eḍighi ni pạkiri ọdi. 32Odiiny ịla ẹrol sịagaany phọ, ịraar ịne pạkiri. 33Tọrotoro ọla esi odiiny phọ ạmoogh ịnme dị ẹghigh ipoola ọmir-ighool rꞌịzughum. 34Ẹpe ạnyu phọ sịphe ọmeremiom ọtozi phọ ẹmoogh inya ịnme dị ẹghigh ipoola ọmir-ighool rꞌịzughum. 35Oniin ọzughum ạrol ghan eeḍian ạtorotoro ọla. 36Ịizughum mọ, ịla phọ ḅịle rꞌọmeremiom ọtozi phọ eḍighi eniin ịyaar dị ọlemom gol dị ọgurogh ọpeḅeremi. 37Ịlem oḍual ịtozi ẹḅamaghi ạnyu ọmeremiom ọtozi phọ, pịdi eemor ghan esoor risigh. 38Sịghe ogey agol kụ ạlhemom ịkpapham mọ ḅịle rꞌịteleleeny ạrukpa phọ ọdi. 39Ịraardi rꞌoogh igbogh ịtoom ẹemor agol kụ ẹdi nạ kạsighe bọ kụ ạlemom ọmeremiom ọtozi phọ ḅịle rꞌoomo ịpheri phọ ạraraar phọ. 40#Iiḍ 7.44; Hib 8.5Mạar ạtuugh ịpe mị aḍeenaan bọ nyịna ạnyu eegum mọ kụ ạlhem.
Currently Selected:
Ẹḍua 25: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
