Ẹḍua 24
24
Momeremi ịyo phọ
1Ọmoogh-we phọ ạḅeni Mozis, “Tue ạnyu eegum mọ ụteeny ịmi, nạ rꞌEeron, ạNadab, Abihu rꞌoḍualdi abuḍiemiom mọ Ịzirel; kụ nyina ẹtol repogh bịn ekpuḍian iiseeny ịmi. 2Ogina ạna bịn kụ aru utuman ịmi. Awe phọ kúsi rosi eegum mọ.”
3AMozis ạghi ni ạteeny we phọ ạghaaph oomo ịpe Ọmoogh-we phọ ạto bọ ạḅeni bịdi kụ oomo awe phọ ọphagharanaan mọ, “Yoor koḍighi ni oomo ịpe Ọmoogh-we phọ mạḅem bọ.” 4AMozis ạge ni oomo ịto Ọmoogh-we phọ aseere loor ạḍinya. Eḅon ạḍiroor ạḍieri phọ aḍio phọ, ọdi ạkan enmeny ạrikia sịphe azin eegum mọ kụ ạmeremi ḍioph rꞌịyal ạrana, ẹdaphan ḍioph rꞌịyal arughunughun phọ Ịzirel. 5Kụ ọdi arom ugheel ạnmuny, kụ bịdi ọze sịnam oguom nịan, kụ oḍighinom rạraar aghuḍum ẹboroph ọngo Ọmoogh-we phọ. 6AMozis ạsighe iniin ịḅaal phọ ạlogh ologhi ạrukpa, ạsighe ịpheri phọ ạsaraghiom enmeny phọ. 7Kụ ọdi ạsighe ḍịnya ịyo phọ, ḍịphe ọge bọ ịto Ọmoogh-we phọ, kụ ạal ạḅeni weye phọ. Kụ bịdi ọphagharanaan mọ, “Yoor kọnaghanan ni Ọmoogh-we phọ ọḅile oḍighi oomo ịlo ọdi mạto.”
8 #
Mat 26.28; Mạk 14.24; Luk 22.20; 1 Kọr 11.25; Hib 10.29;
Hib 9.19, 20 Kụ aMozis ạsighe ịḅaal phọ ịpe ẹrol bọ rụkpa phọ ọdi ạsaraghiom weye phọ ọdi ạḅem, “Ịphen ịḅaal phọ emeremi bọ ịyo phọ ịpe Ọmoogh-we phọ aghiran bọ rꞌanyina mem mọ ọdi ạngo bọ oomo ịtooghi phọ ịphen.”
9AMozis, Eeron, ạNadab, Abihu ḅịle rꞌoḍualdi abuḍiemiom mọ Ịzirel ụsiiny ni eegum mọ 10kụ bịdi ọmiin Ẹnaan phọ Ịzirel. Eeḍian ạrada aruwol phọ ọdi ịghigh mụdi uḅolom rạna dị eḍighi ạbiloogh ịdipho okuaḍio phọ. 11Ẹnaan ị́liom buḍiemiom mọ Ịzirel ạbuen phọ; bịdi ụmiin ni Ẹnaan, kụ bịdi ọḅophoghan olhe ọḅile ọphughol.
AMozis odi ạnyu Eegum aSainai
12Ọmoogh-we phọ ạḅeni Mozis mọ, “Sịiny eegum mọ aru ụteeny ịmi. Mị kạngo nyịna ịyal asighiigh dị ọge oomo iilogh phọ kotomoghiom bọ weye phọ.” 13AMozis rꞌaJosua ọḅarama phọ ọdi ookolobian kụ omiigh ọsiiny eegum iigbia phọ. 14AMozis ạḅeni buḍiemiom mọ, “Ikori iyoor sịen arugbogo phọ tụtu yoor oḅula. Eeron rꞌaHur odi ni sịen rꞌanyina; awe lọ ọmoogh ọgbaragbara ọghi bịdi ọghaaphogh.”
15AMozis ạsiiny Eegum aSainai kụ ọotu aakpereghiom. 16-17Aḍigbogh ạḍimu Ọmoogh-we phọ esoorom eegum mọ. Esi awe phọ Ịzirel ạḍiḅaal phọ ịghigh nịan dị reemor ạnyu eegum mọ. Ọotu phọ aakpereghiom eegum mọ odiiny aḍughul-otu kụ omuneniom oḍual aḍio phọ kụ Ọmoogh-we phọ ạmagh Mozis sịphe ọotu phọ. 18#Dut 9.9Kụ aMozis ạghi aḍigh pạ ologhi ọotu phọ kụ ạsiiny eegum mọ, kụ ạrol sịphe inyadi aḍio.
Currently Selected:
Ẹḍua 24: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
