Ẹḍua 23

Iiḅi ịiruen

1 # Ẹḍua 20.16; Lịv 19.11, 12; Dut 5.20 “Kạ́kaaph aleenye ụḅem-mọ dị aḍighi ọkpe, ḅịle kạ́gba sịagba ọkpe ọphelom oye dị ạmoogh apum. 2Kạ́daph ḍita awe aḍighi ịkaraph mụghumo ọgba ịlo kẹgoghoghomi iiḅi ịiruen. 3#Lịv 19.15Kạ́pel aḍighan pạkiri, esi aḍighiton uwekulom.

4 # Dut 22.1-4 “Eḍighi mạar dị nạ ạmiin nạm mụghumo ẹnam adool ẹpomoghian ạna dị ẹkatanu, sịghe ạghiomonaan nyọdi. 5Eḍighi mạar dị adool mewiririom ude ẹnam adool ọdi, lọghonaan nyọdi ḍịghaagh ẹḅile ẹmeremi ẹnam mọ. Kátelhe bịn aten.

6 # Lịv 19.15; Dut 16.19 “Kạ́goghoghomi iiḅi ịiruen esi aḍighiton uwekulom. 7Kạ́gbaanaan oye ọkpe, ḅịle kákiigh oye dị ụ́piom, loor esi dị mị kạ́bile ọliom oye lọ aḍighi ọdo ịkaraph phọ ịphen. 8Kále ịgara loor esi dị ịgara reḍighi ghan ịdi awe kọ́miin mun ịpe eru bọ elhiom ḅịle rẹpuenaan ghan rạghaaph awe lọ ụ́piom.

9 # Ẹḍua 22.21; Lịv 19.33, 34; Dut 24.17, 18; 27.19 “Kạ́gbiphoghom ooruen; nạ alegheri ni ịdi ạdol iiruen edi ghan loor esi dị nyina mẹrol ghan ni iiruen ẹpe Ijipt.

Omuneniom oḍual ạlha ḅịle rꞌomuneniom oḍual aḍio

10 # Lịv 25.1-7 “Esi odiiny ạsia iḅeph ni iizo anyina ẹḅile ebugha ịlo emite. 11Kụ ọlo omuneniom oḍual ạlha phọ ịbile ade phọ ephooghian, ḅịle kébugha tọro ịyaar lọ esi pạ ade phọ. Arukulom ole aani ịpe esi bọ, ḅịle ilhom ịnam ele ịlo esugha. Iḍighi kẹn ni ịduon phọ iizo avain phọ rꞌiizo ọliv phọ anyina.

12 # Ẹḍua 20.9-11; 31.15; 34.21; 35.2; Lịv 23.3; Dut 5.13, 14 “Ikumuan ghan odiiny aḍio wiki phọ, kụ ọlo kékumuan omuneniom oḍual aḍio phọ, pịdi ạrebene phọ ạna ḅịle aruuruen lọ rokumunaan nyịna ḅịle ghạlamo ịnam mọ ạna epooghian.

13“Ịnaghanan oomo ịpe mị Ọmoogh-we phọ mịḅeni bọ inyina. Kẹ́eḅereghi ịnon ạrumugh; kékol ghan roghol siḍien ạbidi.

Ịraar igbogh ạrayaal phọ

(Ẹḍua 34.18-26; Dutoronomi 16.1-17)

14“Ile ghan ịraar ọdo ẹyaal ḍiniin ạlha ighueniom ịmi. 15#Ẹḍua 12.14-20; Lịv 23.6-8; Igb 28.17-25Ụnwanyu Abib, ụnwanyu phọ ọpo nyina ẹḍua bọ Ijipt emite, ile ghan Ẹyaal ạbred phọ yist ụ́logh bọ ịdipho mị ạto bọ ịngo inyina. Kéle ghan ạbred lọ ọlogh yist oḍual phọ aḍio phọ ẹyaal phọ kẹtol bọ. Kẹ́ḅaph ghan ọgbo bịn etu ọoḅereghi ạmi.

16 # Lịv 23.15-21; Igb 28.26-31; Lịv 23.39-43 “Ile ghan Ẹyaal Ibugha mem lọ nyina emiigh ibugha.

“Ile ghan Ẹyaal Arophoghoghoony mem osoor, mem lọ nyina emiigh ọku eemuma esi ịpe nyina ẹzuph bọ. 17Tọrotoro ạlha mem lọ ịraar ọdo igbogh ạrayaal phọ ịphen ẹteeny, oomo alephiri phọ anyina ọmoogh oru ghan ooseeny ạmi, Ọmoogh-we Ẹnaan phọ anyina.

18“Kẹ́ḅaram ghan ạbred lọ ọlogh yist mem lọ nyina ẹsighe ẹnam ẹphighironom ẹkia rịngo ịmi. Ẹnuum ịnam lọ ọphighironom ẹkia ụngo ịmi mem ẹyaal kị́tol ghan ẹḅaal ḍịroor.

19 # Dut 26.2; Ẹḍua 34.26; Dut 14.21 “Tọrotoro ạlha ịsighe ghan ọḅel ọbiakpa lọ nyina ẹku eru sịphe otu Ọmoogh-we Ẹnaan phọ anyina.

“Kémiim ghan mạmaam onhiin ọga phọ kụ ẹsaam mọony oyool-ọga mꞌạtu-ọga phọ.

Aruguan rꞌoroma

20“Mị katom ni ọokpaany mọ aḍia ghan akori iiko inyina ịduon nyina rẹki bọ ạḅile ịsighe inyina asiemi sịphe mị maakolobian bọ. 21Ịnaghanan ghan ẹḅile eḍighi ghan ịlo ọdi ạḅem. Kẹ́gbagharan ịlo ọdi ạḅem, loor esi dị mị kụ urom ni nyọdi, ḅịle ọdi kápogh ạbile we lọ ọgbagharan. 22Kụ ọlo eḍighi mạar lọ nyina ẹnaghanan nyọdi ẹḅile eḍighi tọrotoro ịlo mị ạto, mị katuphiom ghan oomo ẹpomoghian phọ anyina. 23Ọokpaany phọ ạmi kiḍiemiom ni inyina ạḅile ịsighe inyina asiemi rạmha Ạmorait rꞌạHitait rꞌạPerezait rꞌaKenanait rꞌaHivait rꞌaJebusait phọ, ḅịle mị kaagulemi ni bịdi. 24Kẹ́eḅereghi mụghumo ooseeny ạrumugh phọ ạbidi, ḅịle kẹ́daph reten ịiḅereghi phọ ạbidi. Iigulemi ịkaaneen ạrumugh rꞌạraphan phọ ạbidi. 25Eḍighi ịyaar lọ nyina iiseeny ịmi Ọmoogh-we Ẹnaan phọ anyina, mị kịsephom ni inyina eḍien rꞌạmuum ạḅile aporogh rẹezegh phọ anyina. 26Sịen ade phọ anyina ẹ́mar ạnir kạ́tol ḅịle ọkuruḅaka ạnir kạ́ḍua egbakoogh. Mị kịngo inyina kụudoony aghuḍum.

27“Mị kaḍighi ịdi aruugu ạmi kasiph ẹpomoghian phọ anyina; mị kạlogh ọgbaragbara igbo ạbuphe rꞌanyina robe bọ, kụ oomo ẹpomoghian phọ anyina osumughu. 28Mị kaakperemi ni ẹpomoghian phọ anyina; mị kaporogh ni ạkele Hivait phọ rꞌaKenanait phọ rꞌạHitait phọ ịduon nyina rẹki bọ. 29Mị káporogh bịdi ạkele ḍiniin ạlha bịn; mị aḍighi ịdipho, ade phọ keḍighi ẹekpua, ḅịle ilhom ịnam kẹpughan ni. 30Kpạripe, mị kaporogh ghan bịdi ẹnum ẹnum tụtu nyina eḍiza ẹkasian ọmoogh ade phọ. 31Mị kaḍighi ịdi ạruuku ade phọ anyina kemiigh ẹpe Ọphiiny Akaba kụ ẹghi esi Ọphiiny aYufratis, ḅịle emiigh Meditarenian kụ ẹghi ẹteeny ẹdala ịisaar phọ. Mị kịngo ni inyina ịikpo apuemi bụo ade phọ kụ nyina eporogh bịdi ịduon nyina rẹki bọ. 32Kékiran ịyo rꞌạbidi ḅịle rꞌạrumugh phọ ạbidi. 33Kémeera awe phọ ạbuphe orugh ẹmha anyina; nyina emeera, bịdi koḍighi ịdi nyina kịpioman ịmi. Eḍighi ịyaar dị nyina ẹeḅereghi rụmugh phọ ạbidi, keḍighi ni ḍiphil aḍuugh-aḍuugh ịngo inyina.”

Currently Selected:

Ẹḍua 23: ẠḌI

Highlight

Copy