Ẹḍua 21

Ịdi kọpam ghan rẹbene

(Dutoronomi 15.12-18)

1“Ịphen kụ iilogh dị nạ kạloghoḍinaan we Ịzirel: 2#Lịv 25.39-46Eḍighi ịyaar lọ nạ agho ẹbene ọlo aHibru, pọ ọdi akumu nyịna odiiny ạsia. Kụ rẹman oḍual ạsia, bịle nyọdi dị ạḍua ạmoogha loor. 3Eru mạar dị ạnir úpin mem mọ ọdi asi bọ kꞌạna, pọ ọdi kạ́pam ạnir kụ ạḍuanam; kụ aphin ni ạnir kụ arumom, pọ ọdi kạpam ni ạnir phọ ọdi akeelom. 4Kụ eru mạar dị ọde-otu phọ ọdi kụ aphinanaan nyọdi ạnir kụ ạmaraghinaan nyọdi nmụny, mꞌalephiri mꞌạnmanyaan, kụ ọdi rạḍua, pọ ạnir phọ rꞌạnmuny phọ ạbuo ọde-otu phọ ọdi. Ogina ọdi bịn ạḍua. 5Eru mạar dị ẹbene phọ ạḅem amitiom mọ ọno ạpomoghian ni ọde-otu phọ ọdi, ạnir phọ ọdi, rꞌạnmuny phọ ọdi kụ ọ́wa mọ oseere nyịno, 6pọ ọde-otu phọ ọdi kạsighe nyọdi ạkimom otu ịiḅereghi. Sịphe kụ ẹdi koḍighi ịdi ọdi kạmeera asoman ọnhu-aḍibuo phọ kụ opuur aḅeri phọ bịn ọdi kaḍighi ẹbene oye phọ oomo asuḍughul-otu aghuḍum mọ ọdi.

7“Oye lọ ạsighe ọnyani ọdi kụ aal ịdipho ẹbene, pọ ẹbene-ọnyani phọ kőseere mọ agheel ịdipho olephiri. 8Eḍighi lọ oye phọ rꞌọnyani phọ ọdi ameeraam bọ ni mọ ọno kapin kụ ọnyani phọ ụ́ḅeeraan mun nyọdi, pọ kọḅile kụ oboola ọnyani phọ ọkar ọde phọ ọdi. Oye phọ káboola nyọdi ooruen ịdi eḍighi bọ ọdi maḍighi ọnyani phọ ịdi ị́nighe. 9Eḍighi lọ oye agho ạnir ẹbene ọngo ọony ọdi, oye phọ kạpam ọnyani phọ mụdi ọdi kụ ạmar. 10Eḍighi lọ oye aphin ọnon ạnir, pọ erughotu phọ ọdi kínmia. Oye phọ kạngo ghan ni ọḅel ạnir phọ eḍien rꞌarukpe rꞌoomo ariliom ịpe ạdol olhom rꞌạnir. 11Mọ ọdi ịduon óḍighi, pọ ọdi kaḍighi ịdi ạnir phọ kakeel kụ ikpoki kạ́boor.

Iilogh ịlo osiphom ạkom-sereghi

12 # Lịv 24.17 “Oye lọ akuph oye kụ oye phọ amugh, pọ kokiigh ni nyọdi. 13#Igb 35.10-34; Dut 19.1-13; Jos 20.1-9Kụ eḍighi ekperenom eḍighinom kụ aḍuugh emite, dị oye phọ ụ́utughian ologhi oghiigh, ọdi kasuma ni ạki ekpisi dị mị kạsaḅar aseere kụ ịyaar nyọdi kẹteeny. 14Kụ mem dị oye ophin ologhi ạko enu, kokiigh ni nyọdi ghạlamo asuma kụ aḍigh ḍibuo enmeny ạrikia phọ mị ạsaḅar bọ aseere.

15“Oye lọ ạgiph ọde mꞌonhiin ọdi, pọ kokiigh ni.

16 # Dut 24.7 “Oye lọ asiph ọnon oye mꞌaal mꞌoseere ẹbene, pọ kokiigh ni.

17 # Lịv 20.9; Mat 15.4; Mạk 7.10 “Oye lọ alhomaan ọde mꞌonhiin ọdi, pọ kokiigh ni.

18-19“Eru mạar lọ elephiri emite kụ oniin oye ạsighe ẹkpigba mụghumo aḅugh ḍịghaagh kụ agiphom ọnon oye kụ oye phọ ómugh, pọ kọ́liom nyọdi. Eḍighi ịyaar lọ oye phọ ạmina ẹmina émoon kụ ạakpeleghu ạpham ọkolhom ratelhiom, oye phọ aḍighi bọ kạkpe ni ikpoki ophiemi amem mọ, ạḅile apogh ghan tụtu oye phọ amoon.

20“Oye lọ ạsighe ịkpara kụ ạguroghom ẹbene ọdi, mꞌolephiri mꞌạnir, kụ ẹbene phọ amugh esi phọ, ọpo aḍighi bọ kọliom ni. 21Kụ eru mạar dị ẹbene phọ úmugh kụ aḍio eten kụ ịyal aḍio eten, ọde-otu phọ kọ́liom. Aruphua ọdi lọ ephe pọ ẹgbanyaan ni.

22“Eru mạar dị awe robeeghi kụ oḍighi ịyaar ạnir eghun-aḍien kụ ọkuruḅaka phọ ạḍua kụ úḍighinom ẹnon ịyaar, pọ oye phọ aḍighi bọ kạkpe ni ịikpia tọro ọnhu ikpoki lọ olhom mọ amuul dị ẹmeeraam ịlo bụo ịiruen phọ osoph. 23Kụ eru mạar dị oḍighi ịyaar ạnir phọ rꞌaloor, pọ ịikpia keḍighi ghuḍum rꞌaghuḍum, 24#Lịv 24.19, 20; Dut 19.21; Mat 5.38ekpeḍien rꞌekpeḍien, ọlaay rꞌọlaay, ạḍighaagh rꞌạḍighaagh, owol rꞌowol, 25ạnian ẹsu pọ ạnian ẹsu, ẹgha rꞌẹgha, ọkpoghoron rꞌọkpoghoron.

26“Eḍighi ịyaar lọ oye aḍighi mạar ẹbene mꞌolephiri mꞌạnir ịdi ekpeḍien keḅomaan, ọdi kaseere ẹbene phọ agheel loor esi dị ekpeḍien phọ ọdi moḅom bọ. 27Eḍighi ịyaar lọ oye aḅoghoron ọlaay, ọdi kaseere ẹbene phọ mọ agheel.

Iiḍighi uwo ẹmoogh

28“Eḍighi ịyaar lọ aḍilephiri ạnam kụ akul oye aghiigh, mꞌolephiri mꞌạnir, pọ kotoḅol ikpo nạm mọ ạḍiphe okiigh, iphulupul phọ oye kụ́ba. Uwo ạnam mọ mạar ọ́piom; kọ́liom nyọdi. 29Eḍighi ịyaar lọ ạnam rekulogh we kedoghoḍi rạagha kụ ọphur rụru uwo ạnam mọ kụ ọ́lhogh oghoony, kụ ạnam mọ ekul oye eghiigh, mꞌạnir mꞌolephiri, pọ itoḅol ikpo nạm mọ eghiigh, kụ eghiigh aani uwo ạnam mọ. 30Eḍighi ịyaar lọ omeera mọ uwo ạnam mọ ạkpe ịikpia ọphelaam ẹmhu ọdi, pọ ọdi kạkpe ni oomo ịlo ọḅem. 31Eḍighi ịyaar lọ ạnam mọ ekul mọony oye mꞌọnyani oye eghiigh, pọ ịtuugh ịdipho phọ eḍighi. 32Eḍighi ịyaar lọ ạnam mọ ekul ẹbene ọnon oye eghiigh, mꞌạnir mꞌolephiri, pọ uwo ạnam mọ ạkpe nyọpo ạmoogh bọ ẹbene phọ ịraardi ipoḍi asilva, eroḅol ikpo nạm mọ eghiigh.

33“Eḍighi ịyaar lọ oye kụ akpegheron ekpereghiom ooni bịn ạwile, mụghumo aguph ooni kụ ókpereghi ologhi kụ ạnam mꞌẹnam adool ọnon oye esuma ologhi phọ, 34pọ oye phọ aguph bọ ooni phọ kạkpe ni ikpoki uwo ẹnam mọ, ạsighe ẹnam mọ emugh bọ. 35Eḍighi ịyaar lọ ạnam oniin oye kụ eghiigh nạm ọnon oye, ịyal phọ awe phọ kobool nạm mọ odi bọ kụ odian ikpoki phọ; bịdi kọḅile kẹn odian iphulupul ẹnam mọ emugh bọ. 36Kụ eru mạar dị olegheri mọ ạnam mọ ịmoogh ni ẹeghara ophorogh ghan awe kụ uwo ạnam mọ ọ́sighe ọlogh oghoony, pọ uwo ạnam mọ kạkpiom nạm dị amoon nyọori phọ oye phọ, kụ ạpam ḍịphe emugh bọ.

Currently Selected:

Ẹḍua 21: ẠḌI

Highlight

Copy