Ẹḍua 20
20
Ḍioph iilogh phọ
(Dutoronomi 5.1-21)
1Ẹnaan ẹghaaph oomo ịphen kụ ẹḅem mọ, 2“Mị kụ Ọmoogh-we Ẹnaan phọ anyina ọpo ịsighe bọ inyina ạḍuanam ẹpe ade phọ Ijipt sịphe nyina eḍighi ghan bọ rẹbene.
3“Emuton ịmi ẹnon ẹmugh kạ́aḅereghi.
4 #
Ẹḍua 34.17; Lịv 19.4; 26.1; Dut 4.15-18; 27.15 “Kạ́kaanaan loor ạna ịyaar tọrobo ịlo ẹrol, ẹpe kꞌạke mꞌịsien ade phọ mꞌologhi ạrumuum mọ edi bọ eeḍian ude phọ. 5#Ẹḍua 34.6, 7; Igb 14.18; Dut 7.9, 10Kákpuḍian ạngo ịyaar lọ ọka, ḅịle mꞌooseeny ọngo, ịdi eḍighi bọ mị kụ Ọmoogh-we Ẹnaan phọ ạna. Mị Ẹnaan útiran aroḅopha. Mị kạliom ni bụlo ụlogh ịmi ḍien asiemi oghiil ạnmuny ạnmuny ạbidi dị omuneniom ịraar mụghumo inya. 6Kụ ọnma ighirigiir kạtolonaan ni sịmuunir ạbulo ụphomoghian ịmi kụ ooko ghan iilogh phọ ạmi.
7 #
Lịv 19.12
“Kạ́sighe ghan ḍien Ọmoogh-we Ẹnaan phọ ạna apeghom ephegh, ịdi eḍighi bọ mị Ọmoogh-we phọ kạ́sar ạ́bilenaan oye lọ apeghom ephegh ḍien phọ ạmi.
8 #
Ẹḍua 16.23-30; 31.12-14 “Mạar aako ḍio ophooghian phọ kụ aseere dọl iigbia. 9#Ẹḍua 23.12; 31.15; 34.21; 35.2; Lịv 23.3Odiiny aḍio kụ ịdi nạ kakumuan oomo arukumuan phọ ạna. 10Kụ ḍịphe emuneniom bọ oḍual phọ, aḍio ophooghian dị museenaan ịmi Ọmoogh-we Ẹnaan phọ ạna. Ḍio phọ ạḍiphe oye oḍighi kúḍighi, mꞌạna, ọony ạna, ọnyani ạna, ọony-otu ạna, ọnyani-otu ạna, ạnam ạna, ẹnam adool ạna, ịnam ạna, ghạlamo aruuruen lọ odi eelhe ạna. 11#Emi 2.1-3; Ẹḍua 31.17Ịsiphe odiiny aḍio phọ kụ ẹdi mị Ọmoogh-we phọ ạlhem bọ kẹ phọ rꞌade phọ, rꞌọphiiny phọ, rꞌoomo ạraraar lọ edimom, kụ aphooghian ḍịphe emuneniom bọ oḍual aḍio phọ. Ịduon kụ ẹdi mị Ọmoogh-we phọ ạseph bọ ḍio ophooghian phọ aseere ḍio iigbia.
12 #
Dut 27.16; Mat 15.4; 19.19; Mạk 7.10; 10.19; Luk 18.20; Ẹfe 6.2;
Ẹfe 6.3
“Lọgh eegu ọde ạna rꞌonhiin ạna, ịdipho Ọmoogh-we Ẹnaan phọ ạna mạto bọ ạngo nyịna, ọbo ariiḍio ạna ẹdoony, ẹnighenom nyịna, sịen aḅirini phọ Ọmoogh-we phọ Ẹnaan phọ ạna rạngo bọ nyịna.
13 #
Emi 9.6; Lịv 24.17; Mat 5.21; 19.18; Mạk 10.19; Luk 18.20; Rom 13.9; Jems 2.11 “Oye kákiigh.
14 #
Lịv 20.10; Mat 5.27; 19.18; Mạk 10.19; Luk 18.20; Rom 13.9; Jems 2.11 “Ẹmha kále.
15 #
Lịv 19.11; Mat 19.18; Mạk 10.19; Luk 18.20; Rom 13.9 “Imi kámi.
16 #
Ẹḍua 23.1; Mat 19.18; Mạk 10.19; Luk 18.20 “Kạ́pu ọkpe bịn ạgba ạḅam ẹmhu oye.
17 #
Rom 7.7; 13.9 “Káseph otu ọnon oye ạsighenom, káseph ạnir ọdi ạsighenom, mꞌọony otu ọdi, mꞌọnyani otu ọdi, mꞌạnam ọdi, mꞌẹnam adool ọdi, mꞌạtorobo ịyaar lọ ọdi ạmoogh.”
Aruugu asiph we phọ
(Dutoronomi 5.22-33)
18 #
Hib 12.18, 19 Mem dị bịdi ọnaghan bọ ọraphan aḍio phọ rꞌọkuodu phọ kụ ọmiin bọ mụghi phọ aakpereghiom bọ eegum mọ, rꞌọmepheghian phọ, oomo awe phọ uphiigha ni rꞌaḍiigu kụ ọmeregha kꞌekpisi dị ẹkel. 19Kụ bịdi ọḅeni Mozis mọ, “Nạ kụ kạaph ghan ụḅeni iyoor, yoor kọnaghanan ni nyịna. Eḍighi mạar dị Ẹnaan kụ ịḅaanaan iyoor, yoor komuughu ni.”
20AMozis ạḅeni we phọ mọ, “Kékiilaan. Ẹnaan meru ọoḅeghion anyina ophogh ḅịle rꞌoḍighi ịdi nyina kẹnaghanan ghan nyọdi, ọbo nyina kẹpioghom ghan bọ.” 21Kụ awe phọ ọmeregha kꞌẹpe egher. AMozis aḍuraan aḍigh ologhi ọkikiph ufiri phọ ẹpe Ẹnaan ẹrol bọ.
Iilogh arenmeny ẹkia
22Ọmoogh-we phọ ạḅeni Mozis mọ, “Kạaph ịphen phọ ạḅeni we phọ Ịzirel mọ, ‘Nyina mẹmiin ni mọ mị odi ẹphen ạnyu ạke phọ, kụ nyina rꞌạmi rọkaaph ghan bọ. 23Kẹ́kaaghi ghan rụmugh asilva rꞌạrumugh agol ẹ́ḅaram ooseeny ạmi. 24Ịkananaan ịmi enmeny ọogha kụ ạnyu ịsiphe phọ ẹze iyool-ịga, rụtu-ịga anyina, rꞌạsinam anyina, ẹphighironom ghan ẹkia ạnian rꞌẹkia ẹboroph. Tọrobo esi lọ mị amitiom aseere mọ iiseeny ghan ịmi, mị katu ni ịngo inyina ḍịseph. 25#Dut 27.5-7; Jos 8.31Eru mạar dị nyina ẹsighe ḍighiigh rịkananaan ịmi enmeny ạrikia, pọ kéekoroghi ghan sighiigh lọ moogbo, ḅịle mꞌịlo mọparion, kụ ẹkanam. Aḍighiigh lọ elhool ẹḅoghom meeph oḍighinom. 26Kíḍighinaan ịmi enmeny dị kọoda kụ ọsiiny, ọbo kọmiin ghan bọ ẹdaḅa phọ anyina mem lọ nyina rẹsiiny kẹghi.’
Currently Selected:
Ẹḍua 20: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
