YouVersion Logo
Search Icon

Ẹḍua 19

19
Awe Ịzirel mosi Eegum aSainai
1-2Awe Ịzirel ụḍua ni Refidim, kụ ḍịḅel aḍio ụnwanyu dị amuneniom ịraar kꞌamem mọ bịdi ọḍua bọ ẹpe ade phọ Ijipt bịdi oru osi ẹdala phọ aSainai. Sịphe phọ bịdi odoghoḍi rugbogo zin Eegum aSainai. 3AMozis ạsiiny ạnyu ọghi ọteeny Ẹnaan.
Kụ Ọmoogh-we phọ ạrol ẹpe eegum mọ ạmagh nyọdi kụ ạḅeni mọ, “Kạaph ạḅeni ọto ạJekob, ạḅeni we phọ Ịzirel. 4Nyina ịmiin ni ịpe mị aḍighi bọ we phọ Ijipt, mị ịpham inyina ịdipho uga rạpam ghan bọ mọony ọdi ạnyu araphaaph phọ ọdi kụ mị ịsighe inyina aghuraam loor ạmi. 5#1 Pit 2.9#Dut 4.20; 7.6; 14.2; 26.18; Tạit 2.14Nyịidipho eru mạar dị nyina kẹnaghanan ni ẹḍogh phọ ạmi, kụ eeko ịyo phọ ạmi, pọ nyina keḍighi ni we ạmi, ịdi eḍighi bọ mị ịsaḅar inyina esi oomo ạbueri phọ awe phọ ạsighe. 6#Ogon 1.6; 5.10Kụ nyina keḍighi ạbuo eelhe ariil ạrikia, ạbuo eelhe aruukuan. Kạaph ịphen phọ ạḅeni we phọ Ịzirel.” 7Kụ aMozis ạmagh ikumoor awe phọ kụ ạsighe oomo ịpe Ọmoogh-we phọ ạḅeni bọ nyọdi ạghaaph ạḅeni bịdi. 8Kụ oomo awe phọ ọphagharanaan nyọdi, kụ ọḅem mọ, “Yoor kọtuugh ni ọphagharanaan Ọmoogh-we phọ ạghaaph bọ oḍighi.” Kụ aMozis aḅulemi ịpe awe phọ ạḅeni Ọmoogh-we phọ.
9Kụ Ọmoogh-we phọ ạḅeni Mozis mọ, “Mị kaḍigh ologhi ọkikiph ọotu kụ atu ạteeny nyịna, ọbo awe phọ ọnaghan mem lọ mị rꞌạna rẹkaaph, ẹrol dị bịdi omeeraam nyịna emiigh nyịidipho kụ ẹghiom ghisigh.”
AMozis aḅulemi ịpe awe phọ ọghaaph bọ ạḅeni Ọmoogh-we phọ. 10Ọmoogh-we phọ ạḅeni Mozis mọ, “Kịa ạteeny we phọ, ạḅeni mọ oselemian siloor ạbidi rodon rꞌiḍue, ọnya ịiḅereghi. Bịdi ootologh rukpe ạbidi, 11kụ ọrol okori ḍio phọ ạḍiphe kemuneniom bọ ịraar phọ, ịdi eḍighi bọ ḍio phọ ạḍiphe mị katu ni asoor sịphe ạnyu Eegum aSainai, esi dị oomo awe phọ kụmiin ịmi. 12#Hib 12.18-20Lọgh ọku akoom ẹeḅaraph phọ dị awe kọ́ḅeeny, kụ ạḅeni bịdi mọ, ‘Igona loor anyina, ị́siiny ghan ạnyu eegum mọ, ḅịle kẹn ítuman ghan. Eḍighi ịyaar dị oye ạdaari ẹda, pọ kokiigh ni nyọdi. 13Tọrobo oye lọ ạdaari ẹda sịphe ẹeḅaraph phọ, pọ otoḅol nyọdi ikpo, mụghumo ọraḅal ịkpina, kụ oye nyọdi kạ́ḅogh. Ịphen phọ koḍighi we rꞌịnam. Kụ mem dị ọkuodu phọ ạḅa kụ ẹdi awe phọ kọsiiny ạnyu eegum mọ.’”
14AMozis ạḍua ẹeḅaraph phọ asoor ạghi ạteeny we phọ, kụ ạḅeni bịdi mọ oselemian siloor ọnya ịiḅereghi. Pọ kụ ẹdi bịdi ootologh rukpe ạbidi. 15Kụ ọdi ạḅeni we phọ mọ, “Iikolobian ọman ọman iḍue phọ, ḅịle kẹ́tolan esi rꞌạnir ephoph.”
16 # Ogon 4.5 # Dut 4.11, 12 Ḍịroor aḍio phọ ạḍiphe emuneniom bọ ịraar aḍughul-otu phọ bịn ọomaany ạraphan; aḍio phọ ẹḅaaghi ẹmepheghian bịn ọkikiph ọotu aakpereghiom ạnyu eegum mọ, kụ ẹḍogh ọkuodu dị ẹghi ạnyu iboom ẹḅa, kụ oomo awe phọ odi bọ sịphe arugbogo phọ ophiigha rꞌaḍiigu. 17AMozis aḍiemiom we phọ amitenom sịphe arugbogo phọ ọghi ozuan Ẹnaan; ozinian, ọmeregha sịphe azin eegum mọ. 18Kụ oomo phọ Eegum aSainai ạmughi, ạmughi bịn, ịdi eḍighi bọ Ọmoogh-we phọ masoor rꞌạnian sịphe ạnyu ẹeḅaraph phọ; kụ ạmughi phọ ạkigh dịadi ọnuza kụ rale. 19Kụ ẹḅaam ọkuodu phọ ẹghi ghan ạnyu ạnyu. AMozis ạḅa kụ Ẹnaan ạaran rꞌọomaany. 20Ọmoogh-we phọ ạḍua asoor sịphe ạnyu Eegum aSainai kụ ạmagh Mozis ạḅeni mọ, “Sịiny aru ẹphen ạnyu eegum mọ.” Kụ aMozis ạsiiny. 21Ọmoogh-we phọ ạḅeni Mozis mọ, “Soor ude ạphur we phọ rụru mọ bịdi kútenom utu uḅiligha ẹphen mị odi bọ, bịdi oru oḅiligha, ịbadi awe komuughu ni. 22Ghạlamo ariil ạrikia phọ lọ oru utuman ịmi koselemian ni siloor ạbidi, ọbo mị kạliom ghan bọ bịdi.”
23AMozis ạḅeni Ọmoogh-we phọ mọ, “Awe phọ kọ́siiny ẹphen ạnyu Eegum aSainai. Nạ mụphur iyoor rụru mọ ọlogh ọku okitonom ẹeḅaraph phọ eḍighi esi iigbia.”
24Ọmoogh-we phọ ạḅeni nyọdi mọ, “Soor ạpham Eeron arumom. Kụ ọlo, ariil ạrikia phọ rꞌawe phọ kụ́ḅeeny uḍigh ẹphen oru ọteeny ạmi, ọbo mị kạliom ghan bọ bịdi.” 25AMozis asoor ạghi ạteeny we phọ kụ ạghaaph ịpe Ọmoogh-we phọ mạḅem bọ ạḅeni bịdi.

Currently Selected:

Ẹḍua 19: ẠḌI

Highlight

Share

Copy

None

Want to have your highlights saved across all your devices? Sign up or sign in