2 Bụo ạTesalonika 2
2
Oye Eekuna Ạsipioghom mọ
1 #
1 Tẹs 4.15-17
Bụo asiya, ịlo aḍio phọ ạJizos Kraist Ọmoogh-we phọ ayira katu bọ, rꞌịlo ọḅophoghan kụ ọrolan ọdi, mị rạlom ni, 2mọ nyina ẹnaghan mọ aḍio Ọmoogh-we phọ mẹteeny, iloghi anyina kị́nuun iphighaphigha, ḅịle kẹn loor kẹ́eḅaghamian. Mụghumo oye dị rạmiin ghan ịmiin kụ ạḅem, iini oye kụ ạghaaph, iini kẹn ịḅeni inyina mọ yoor kụ ụge ḍịnya ịlo ịphen phọ. 3Kémeera rꞌamem mọ oye iikeleghi inyina. Aḍio Ọmoogh-we phọ kétu, tụtu oghel Ẹnaan ekureriom mọ aru aten, ḅịle kẹn Oye Eekuna Ạsipioghom mọ ạda bọ ọda oḍigh ooni ạnian phọ maru amite. 4#Dạn 11.36; Izik 28.2Ọdi kạmerenyan oomo ạraraar lọ awe rọoḅereghi ghan, ḅịle rꞌoomo ạraraar lọ ogbiighiom mọ ạrumugh. Ọdi kapophe ni loor iboom, dị tụtu kạki ni ạtol ude pạ Otu Ịiḅereghi phọ Ẹnaan kụ akophora mọ ọno kụ Ẹnaan phọ.
5Nyina ị́itughian mun mọ mị ịḅeni ni inyina oomo ịphen phọ, mem mọ yira ọrolan bọ ḍụghum? 6Kụ ọlo ịyaar edi ni dị ímeera bọ mọ ịphen phọ emite nyịidipho, kụ nyina elegheri ni ịyaar phọ. Kụ ẹteeny ọkar aḍio phọ, Oye Eekuna Ạsipioghom mọ kamite ni aganana. 7Azin ạsipioghom mọ mamiigh ni oḍighi, kụ ịpe kemite bọ kémite tụtu ọpo rạpamaghan bọ mạḍua. 8#Azay 11.4Amem mọ ọpo kụ ẹdi Oye Eekuna Ạsipioghom mọ kamite aganana, kụ ạJizos Ọmoogh-we phọ ạsighe ḍiphooghu ọnhu akiighom nyọdi apiemi, mem mọ dị katu bọ rꞌigbogh phọ ọdi. 9-10#Mat 24.24Oye Eekuna Ạsipioghom mọ katumom ịikpo aSetan kụ aḍighi yogh ịiḍaany kịrokiro rꞌareḍeenaan rꞌimananaany ọkpe ịlo ookeleghiom ạbuphe kope bọ. Bịdi kọ́moogh pẹleeny ịdi eḍighi bọ bịdi moghel igey phọ. 11Ịduon kụ iḍighi kụ Ẹnaan kẹngo bọ bịdi ịikpo ọpioman dị keekeleghi bịdi mọ omeeraam ọkpe. 12Ụtuan ịduon phọ, oomo phọ ạbuphe úmeeraam bọ igey phọ, kụ mọḅaal bọ ologhi ookiilighian ịkaraph phọ, kọmoogh ni apum.
Ẹnaan mịsaḅar inyina mọ ịmoogh pẹleeny
13Bụo asiya, ẹkpianaan ni dị yoor kighol ghan inyina phọ Ọmoogh-we phọ ạphomoghian bọ ọseph Ẹnaan oomo amem, ịdi eḍighi bọ Ẹnaan mịsaḅar inyina eḍighi ịḅel iimuma ibugha ạpeleeny phọ, ịdipho mewoph bọ ruwaloor phọ anyina, eḍighi ịdi nyina mẹkuami emeeraam igey phọ. 14Ẹnaan ịtuan pẹleeny phọ ọphon kụ ịmagh bọ inyina, mem mọ yoor ọghaaph bọ ooḅi ọghaaph phọ ịḅeni inyina. Ọdi ịmagh inyina mọ ipin aani bin igbogh phọ ạJizos Kraist Ọmoogh-we phọ ayira. 15Bụo asiya, esi ịduon phọ, ịmerenyan ni ẹpham ẹkpaphanam rạraar phọ yoor ịtughemi bọ inyina, mꞌịlo ọghaaph ọnhu ḅịle mꞌịlo ọge ḍịnya.
16ẠJizos Kraist Ọmoogh-we phọ ayira rꞌaloor ọdi, rꞌẸnaan Ọde phọ ayira ụphomoghian bọ iyira, kụ ạtuan bọ ọghor phọ ọdi ụngo iyira ạkpo ologhi rꞌogey oḍuom ologhi kꞌagee-pọ, 17imuzeḍinaan inyina ạkpo ologhi rꞌịnyaam oḍighinom rꞌọghaaphom oomo phọ ịpe ẹnighe bọ!
Currently Selected:
2 Bụo ạTesalonika 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
