2 Bụo ạTesalonika 1
1
1 #
Iiḍ 17.1
ẠPol rꞌạSailas rꞌaTimoti kụ ụge ḍịnya phọ ạḍien riruomaan inyina ạbuo ạsiosi phọ ạTesalonika, bụphe oḍighi bọ bụo Ẹnaan Ọde phọ ayira, rꞌạJizos Kraist Ọmoogh-we phọ.
2Ạḍiseph rꞌẹepho kꞌẸnaan Ọde phọ rꞌạJizos Kraist Ọmoogh-we phọ ịrolonaan inyina.
Ịiruen phọ aKraist kaagbo bọ ḍio phọ ọdi katu bọ
3Bụo asiya, ẹkpianaan ni dị yoor kighol ghan inyina ọseph Ẹnaan oomo amem. Ịduon phọ ẹnighe ni, loor esi dị omeeraam mọ anyina rapoph ni kạghi ghisigh, ḅịle kẹn ẹphomoghian phọ oniin ạphomoghian bọ nyoniin rẹbugh ni. 4Ịphen kụ iḍighi kụ yoor rꞌaloor ayoor riitumaam bọ ni inyina esi ạbuo ạsiosi phọ Ẹnaan. Yoor roboomiom ni ịdipho omeeraam mọ anyina ạmeera bọ ni, nyina ípogh bọ oomo ịgbiphoghom mọ rꞌịminimiin phọ isoorom bọ inyina.
5Ịphen phọ kụ imitiom eḍeenaan mọ ịiruen phọ Ẹnaan eeleeny ni esi anyina. Ọdi ragbiighi ghan ọtuan ịminimiin phọ anyina kụ oḍighi ịdi nyina kẹman oḍigh aani ọmar phọ ọdi nyina ẹtuan bọ rẹmiinom. 6Ẹnaan ẹmiin mọ ẹkpianaan ni ọmiine ạbuphe ịmiine bọ inyina 7rꞌọngo anyina phọ rẹmiinom bọ ophooghian, ḅịle rꞌayoor. Ọdi kaḍighi ịphen phọ mem mọ ạJizos Ọmoogh-we phọ kạḍua bọ ẹpe kꞌạke ạpam igbogh ạruukpaany phọ ọdi atumom. 8Ọdi kạsighe nem ạnian kụ anuemom bụphe Ẹnaan úlegheri bọ, rꞌạbuphe rọ́naghanan ghan bọ ooḅi ọghaaph phọ ạJizos Ọmoogh-we phọ ayira. 9#Azay 2.10Bịdi kọmiinom ịminimiin amuphe dị eekuna ílho. Kọgbatan bịdi ọsighe ghisigh Ọmoogh-we phọ rꞌigbogh ịikpo phọ ọdi, 10ḍio phọ dị katu bọ, mọ oomo awe phọ omeeraam bọ nyịno ọngo nyịno eghuan rꞌeegu phọ. Nyina kẹtolan aani ni bịdi, ịdi eḍighi bọ nyina memeeraam dom mọ yoor ịḅeni bọ inyina.
11Yoor ụtuan ịduon phọ kụ úsoph bọ mem oghol ghan anyina esi ịiḅereghi. Yoor rọlom ghan Ẹnaan phọ ayira mọ aḍighi dị nyina kẹkasian ọrol ạdol phọ ạḍiphe ọdi ạtu bọ kụ ịmagh bọ inyina. Mọ ọdi ạsighe ịikpo phọ ọdi aḍighinom ghan amuneni oomo ịitughian oḍighi igey lọ nyina ẹmoogh, ạḅile amuneni ghan iiḍighi lọ nyina ẹtuan omeeraam mọ anyina kụ reḍighi. 12Ịduon phọ kụ ịdi nyina kẹngo eghuan ḍien phọ ạJizos Ọmoogh-we phọ ayira, kụ ọtuan ọghor Ẹnaan phọ ayira rꞌạJizos Kraist Ọmoogh-we phọ, kụ nyina ẹḅile ẹboor aani nyọdi eghuan.
Currently Selected:
2 Bụo ạTesalonika 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS