2 Bụo ạTesalonika 3
3
Ikol ghan ẹmhu ayoor ẹeḅereghi Ẹnaan
1Bụo asiya, esi okureriom, ịiḅereghi ghan ịngo iyoor mọ ọghaaph Ọmoogh-we phọ aagborion ni aleeny eleeny, ạmoogh eghuan, ịdipho aḍighi bọ ogbo phọ anyina. 2Mọ Ẹnaan ịphel li iyoor ẹsighe rạghaagh ạbukaraph awe, ịdi eḍighi bọ oomo awe kụ ụ́naghanan bọ dom mọ.
3Ọmoogh-we phọ kaḍighi ni ịphen ọdi aguanaan bọ. Ọdi kịngo ni inyina ịnyaam, ịphel inyina ạsighe ḍịghaagh Eru. 4Kụ Ọmoogh-we phọ rụngo ghan ni iyoor oḍuom ologhi esi anyina, mọ nyina reḍighi ni kụ keḍighi ni ịpe yoor ịḅeni bọ inyina ẹkiom ghisigh.
5Ọmoogh-we phọ aḍighi dị nyina kelegheri ẹphomoghian phọ Ẹnaan, ẹḅile ẹmoogh ọkparam mọ ọpo aKraist rạngo ghan bọ!
Kẹ́gbogholeer
6Bụo asiya, esi aḍien phọ ạJizos Kraist Ọmoogh-we phọ ayira, yoor ọto ni rịngo inyina mọ kételhian ghan oomo ạbulo rọgbogholeer ghan sịphe ogbo phọ anyina, bụlo rọ́naghanan ghan ịpe yoor oroma bọ bịdi. 7Nyina rꞌaloor anyina bịn elegheri ni mọ ẹkpe ni ọtuughaany ayoor. Mem mọ yira ọrolan bọ, yoor ụ́gbogholeer. 8Yoor úle ghan ịyaar oye kụ ọwile dị ikpoki ụ́kpe. Yoor ukumuan ghan ni rꞌọkpar aloor ḍughul rꞌootaany, ọbo oḍighi ikpoki kasoroghuom ghan bọ ọnyo anyina. 9Ụ́ḅem mọ yoor ụ́moogh ịikpo opuru ghan anyina ịlo yoor rọwa, kụ yoor ụtu mọ ịtuughaany rọozo phọ ayoor ekumuan aani ghan. 10Rꞌamem mọ yira ọrolan bọ ni bịn yoor ụto ni ịphen ịḅeni inyina mọ, “Oye lọ ráḍighi ghan ịyaar, kúle ghan eḍien.”
11Yoor rọkaaph ghan ịphen phọ, ịdi eḍighi bọ yoor ọnaghan mọ buniin anyina edi dọl ạrugbogholeer, ịyaar róḍighi ghan, odi ghan oḅiligha ạsidol ạbunon awe bịn. 12Esi aḍien phọ ạJizos Kraist Ọmoogh-we phọ, yoor ọto ni rọpurom rụru, ịdo awe phọ ạbuen mọ bịdi osereghian oḍighi ghan oḍighi, ọbo bịdi ọmoogh ghan ịyaar ole.
13Bụo asiya, oḍighi ghan igey inyina kị́pher! 14Iini sịen oye odi ni sịphe ogbo phọ anyina dị kạ́naghanan dom mọ ọge bọ riruomaan inyina sịen ạḍinya phọ ạḍien. Nyina ẹmiin ọdo oye phọ ọpo, ịlogh nyọdi elegh ẹgbatanaan nyọdi, ọbo umugholoor asiph nyọdi. 15Kẹ́sighenom mọ ọdi ạmulogh-ḍien anyina. Ịpur ghụn nyọdi rụru ịdipho ọnyo asiya anyina.
Ikpo ọnhu okureriom
16Ọmoogh-we phọ rꞌaloor, ọpo aḍighi bọ zin ẹepho phọ, ịngo ghan inyina ẹepho oomo amem rꞌareten kịrokiro! Ọmoogh-we phọ ạrolonaan oomo phọ anyina!
17Mị ạPol kụ ụsighe ni ḍịghaagh ạmi ạgeom ẹpe ekureriom mọ: mị ipuru inyina. Ịphen kụ ịdi mị rạdaphari ghan ḍịghaagh ạmi tọrobo ạḍinya lọ mị ạge.
18Ooḅi ọghor phọ kꞌạJizos Kraist Ọmoogh-we phọ ayira ạrolonaan oomo phọ anyina!
Currently Selected:
2 Bụo ạTesalonika 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
