1 Bụo ạTesalonika 5
5
Iikolobian ekori ḍio phọ Ọmoogh-we phọ katu bọ
1Bụo asiya, ị́kpianaan mun ọge oruom anyina ịlo amem rꞌariiḍio dị ịphen phọ kemiteghu bọ. 2#Mat 24.43; Luk 12.39; 2 Pit 3.10Nyina kẹn bịn elegheri ni mọ aḍio phọ Ọmoogh-we phọ katu bọ keḍighi ekperenom ịdipho ọḅa rạki ghan bọ imi ḍughul. 3Mem dị awe rọḅem mọ, “Oomo ariisi mẹphooghi, ḅịle ịiḅaghami ílho,” kụ ekperenom bịn amuphe ạteeny bịdi. Bịdi kókpetenaan, ịdipho ạnir dị mesiom ọmar kụ oghunughun rakun. 4Kụ nyina ạbuo asiya phọ ílho dọl ufiri, dị aḍio phọ ạḍiphe keḍighi ekperenom ịdipho ọḅa. 5Oomo phọ anyina, ạbuo ẹphalaḅaal rꞌootaany. Yira kạ́buo aḍughul rꞌufiri. 6Esi ịduon phọ, yira kụ́naani ghan ịdipho ạbueri phọ, ọsuma yogh ooko loor ayira. 7Aḍughul kụ ẹdi awe rọnaani yogh ghan, aḍughul kụ ẹdi amiim rakiigh ghan we. 8#Azay 59.17; Ẹfe 6.13-17Kụ yira phọ oḍighi bọ bụo ootaany, ooko loor ayira! Ọkpologhian ghan omeeraam rꞌẹphomoghian ịdipho ạsuoma okorian aloor ayira, kụ ozua oḍuom ologhi ạpeleeny ịdipho eghoony ookpereghiom rụmhu ayira! 9Ẹnaan iyira ị́ma ọda ọkaraph ọda ọmiinom ạghelhe phọ ọdi, ẹmha ghụn mọ yira ọtuan Jịzos Kraist Ọmoogh-we phọ ayira kụ ọmoogh pẹleeny. 10Ọdi aghol ẹmhu ayira kụ amugh bọ, mọ bụlo odi rꞌạbulo momuughu ọḅophoghan ọrolan nyọdi. 11Esi ịduon phọ, ẹkpianaan dị oniin kạkparami ghan ologhi oniin, oniin ạaneghi ghan nyoniin, ịdipho nyina ẹtuugh bọ ni edi nyịidipho.
Oroma rꞌiipuruan
12Bụo asiya, yoor rịlhom ni inyina ọloghoma ạbuphe ọpham bọ iiḍighi sịphe ogbo phọ anyina, bụphe Ọmoogh-we phọ mạma bọ mọ oḍiemiom, ọḅile iromoghiom inyina. 13Ịlogh bịdi eboom eegu rꞌeghuan, ẹtuan iiḍighi phọ bịdi ọpham bọ ẹphomoghian bịdi, ẹmoogh ẹepho ogbo phọ anyina.
14Bụo asiya, yoor rịkpaariom ni inyina mọ ịpur rụru bụo ạrugbogholeer, ẹkparami bụo eepuph, ẹloghonaan ḍịghaagh bụlo modugh, ẹmooghom ọkparam oomo awe phọ. 15Ọnyo anyina ịkaraph kúḍighi ghan uḅulemian. Oomo amem ịwa ghan oḍighi iiḅi sịphe ogbo phọ anyina rꞌoomo awe.
16Ịmoogh ghan iboh oomo amem. 17Késoph ghan mem ọoḅereghi. 18Tọrobo ịlo ẹrol ịngo ghan ni Ẹnaan ḍịseph. Ịphen kụ ịdi Ẹnaan rẹwa ghan ḍịghaagh anyina, ịdi eḍighi bọ nyina ạbuo kꞌạJizos Kraist.
19Kéḍime nịan Uwaloor Iigbia phọ. 20Képogh ghan ịmiin esooromi. 21Ịiḅeghion ghan oomo ạraraar ephogh, ẹphamanam ịpe ẹnighe bọ, 22ẹkporion rạghaagh tọrobo ọkal ịkaraph.
23Yoor rọoḅereghi ghan ni mọ Ẹnaan phọ rịngo ghan bọ iyira ẹepho phọ, ịsighe inyina eḍighi bụo ọdi ẹmadan, kụ eeko ghan uwaloor phọ rꞌologhi phọ rꞌaloor phọ anyina eseere ḍiseleman ạdol, tụtu ẹteeny mem mọ ạJizos Kraist Ọmoogh-we phọ ayira katu bọ. 24Ọpo ịmagh bọ inyina oye rábi ghan, kaḍighi ni ịphen ọdi aguanaan bọ.
25Bụo asiya, ịiḅereghi aani ni ịngo iyoor.
26Ipurunaan iyoor oomo ạbuo asiya phọ eghurughi yogh bịdi.
27Mị ạsighe ḍien Ọmoogh-we phọ kụ righiremi inyina ịyo mọ ịbal li ḍịnya phọ ạḍien ẹḅeni oomo ạbuo ạsiosi phọ.
28Ooḅi ọghor phọ kꞌạJizos Kraist Ọmoogh-we phọ ayira ịrolonaan inyina!
Currently Selected:
1 Bụo ạTesalonika 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
