TƐRƐCƐ 4

Ugondu wa Alivai a na Shɛ umwamwa Kohat

1Nazhɛ AGWANGWAMA hiɛŋ Moses keeni Aron, 2Rɛta ma miaụŋ-me-eyi mu umwamwa Kohat a na shɛ atwa Livai gana na tu nhwaŋ me eshi aba mu namɛ. 3'Nyata ma nzeci me etwenyi elele na shiywa sha aba shi tuwo talacɛ tutu i ci dupu te e meci aŋ, a na teni cɛŋ, maa ga shɛ aba teni nu ugondu udulo tu'ulwatagwụ. 4Ugondu wa atwa Kohat ụ shɛ maa a na ngbaraka iyi nɛ namɛ no ohwolu tijilo na hwuri hwɛɛ nu udulo tu'ulwatagwụ. 5Aka na ta atwa ugba ata zhɛ ɛ ishijɛ maa e kwuneneni tahaŋnụ, ga ga Aron na miaụŋ mu bwa me eyi e teni nu udulo ata ụ tu'ulwatagwụ maa e tufwurinji tugwuno ta ata ti jilanɛ Ikpɛtɛ ɛtɛ Unu-tutwa maa e urigeni ikpɛtɛ ɛtɛ. 6Nazhɛ e urigeni iŋ u'waba biywoywo, maa e suji tugwuno ta ata tɛ shɛ uduhwa wa ababa e urigeni na azuba u'waba ata, nazhɛ e hwuŋtengeni imbele ɛtɛ ɛɛ zhɛ na 'waŋna iŋ no tuhwolu ti ibɛ.

7Aba zhɛ a barɛshɛga tugwuno tu uduhwa wa ababa nu uteburu maa e peteni akara ata tijilo, maa e peteni du apalụ, tu nkwodo mi iturɛre, tu nkwodo mu upwaŋ keeni nkwasha mụ ụrụpɛ tuswa nu uteburu ata. Akara ata shɛ a patana nu uteburu ata aka elele. 8Aba zhɛ a barɛshɛga tugwuno tu ushenje maa e urigeni inɛ ɛtɛ hwɛɛ, nazhɛ e urigeni sasana u'waba biywoywo na azuba ibɛ hwɛɛ. Nazhɛ ɛɛ zhɛ o hwuŋtongono imbele ɛtɛ maa a na 'waŋna iŋ no tuhwolu ti ibɛ.

9Aba zhɛ o sugo tugwuno tu uduhwa wa ababa maa e urigeni uteburu-ụsụtụla, ta asụtụla ubwa, tu n-ngwuzhi ma ata aa nangwacanga tuzuzu ta asụtụla ata, ta apalụ ata oo zwono mu, tu nkwasha ma ata oo zwono manɛbɛ ma ata ma asụtụla hwɛɛ. 10Aba shɛ o kwungwulo uŋ, tu nkwasha ma ata oo zwono manɛbɛ ma ata ma asụtụla hwɛɛ nu u'waba ata biywoywo maa e peteni uŋ nu ugbogolo ata aa 'waŋna uŋ.

11Aba shɛ a barɛshɛga tugwuno tu uduhwa wa ababa maa e urigeni utukwu-ụrụpɛ wa azhɛnarɛya maa e urigeni u'waba ata biywoywo na azuba tuba, nazhɛ e hwuŋtengeni imbele ɛtɛ ɛɛ zhɛ na 'waŋna uŋ no tuhwolu ti ibɛ. 12Aba shɛ o sugo i'wɛŋnɛ ɛtɛ aa nda ugondu ni ibɛ no ohwolu tijilo hwɛɛ maa e kwungwuri iŋ no tugwuno ta ata tu uduhwa wa ababa, maa e urigeni iŋ nu u'waba ata biywoywo, nazhɛ e peteni iŋ nu ugbogolo ata aa 'waŋna iŋ.

13Aba shɛ o sugo ma'alụ mu utukwu-ụrụpɛ, maa e urigeni uŋ tugwuno tu uduhwa ushenje. 14Aba shɛ a patangana i'wɛŋnɛ ɛtɛ aa nda ugondu ni ibɛ hwɛɛ nu utukwu ata ụrụpɛ: ibɛ shɛ agbamgbam tishitogo, ne ekweshi, nu n-ngowo keeni nkwodo. A shɛ a barɛshɛga u'waba ata biywoywo maa e urigeni uŋ, maa e hwuŋtengeni imbele ibwɛ i tu'waŋna no tuhwolu ti ibɛ.

15Aka na tu ga Aron na miaụŋ mu bwa me eyi mu hwuwi i'wɛŋni'wɛŋni ɛtɛ tijilo tu urugono hwɛɛ, gana na ta atwa a jala ti'ishɛga nu ugba ata, nazhɛ ga atwa Kohat zhajɛ maa e suji ya i'wɛŋnɛ ɛtɛ. Ama kede atwa ata Kohat timengeni i'wɛŋnɛ ɛtɛ tijilo kwukwuŋ, shibwonu ɛ zhɛ o 'wo. Ugondu na ee peni atwa Kohat tɛnda ụ shɛ i'wɛŋni'wɛŋni ɛtɛ zweni na amɛ udulo tu'ulwatagwụ tu'waŋna.

16Gɛ Ɛleaza yɛu Aron na shɛ bunongbo, ubwa shɛ ba ngbaraka manɛbɛ ma asụtụla, ni iturɛre, nụ ụrụpɛ tiya, na manɛbɛ mu tududugono keeni iyi elele nɛ zweni nu udulo ata inɛɛ nɛ ee tileneni AGWANGWAMA swooŋ.

17Nazhɛ AGWANGWAMA hiɛŋ Moses keeni Aron, 18Kede atwa umwamwa Kohat e 'wi maa e beni na ashashɛ Alivai o. 19Ama aka na ta a zhajɛ maa o gwumwongonu ni iyi tijilo nɛ hwuri hwɛɛ. Iyi nɛ ɛhi zhɛ hia nda maa kede e 'wi na, ga ga Aron na miaụŋ mu bwa me eyi e teni maa e peni bụtụ bụtụ ugondu ubwa keeni iyi nɛ bụtụ bụtụ shɛ ba 'waŋna. 20Ama yaa shɛ atwa Kohat teni na amɛ, aa kwụbɛ to onongbo a imanganga i'wɛŋni'wɛŋni ɛtɛ tijilo kwo hwuŋri, ɛ zhɛ o 'wo.

Ugondu wa Alivai a na Shɛ umwamwa Gɛshon Na

21Nazhɛ AGWANGWAMA hiɛŋ Moses, 22Rɛta ufwugwo ụlamụ wa Alivai a na namɛ na amwamwa atwa Gɛshon keeni nhwaŋ me eshi aba hwɛɛ, 23te kwune na atwa na tizhɛla ta shiywa sha aba shi tuwo talacɛ tutu i ci dupu te e meci aŋ, anaa na teni cɛŋ maa e teni nu ugondu udulo tu'ulwatagwụ tɛnda. 24Iyi nɛ shɛ ugondu na ee peni atwa umwamwa Gɛshon na: 25Aba shɛ a na 'waŋna tugwuno ta ata aa rɛngana amɛ udulo ata ụ tu'ulwatagwụ keeni tugwuno ta ata aa rɛngana aba udulo ata, ti i'wɛbɛ ɛtɛ iyweywe aa patana na azuba ubwa keeni ibɛgɛlɛ ɛtɛ tugwuno aa swata no odubo udulo ata ụ tu'ulwatagwụ, 26te ekpere ata tugwuno aa rɛngana ukpogwu udulo ata ụ tu'ulwatagwụ hwɛɛ tu utukwu-ụrụpɛ keeni ihwehwe ibɛ, ti ibɛgɛlɛ ɛtɛ tugwuno aa swata no odubo ukpogwu udulo ata keeni i'wɛŋnɛ ye elele nɛ aa nda ya ugondu nu bwa. Atwa Gɛshon aba shɛ a nda ugondu ibɛ hwɛɛ. 27Ga Aron na miaụŋ mu bwa me eyi, aba zhɛ na imangana atwa Gɛshon ugondu wa aba keeni i'wɛŋnɛ ɛtɛ aa shɛ a na 'waŋna. Ga go Moses na Aron eshiciji okwo atwa Gɛshon a njɛ iyi elele nɛ i shɛ ugondu wa aba hwɛɛ. 28Ge Itama yɛu Aron bunongbo, ubwa shɛ bisekekeni ba atwa umwamwa Gɛshon nu ugondu we elelee na ee peni aŋ tɛnda na amɛ udulo ata ụ tu'ulwatagwụ.

Ugondu wa Alivai a na Shɛ umwamwa Mɛrari Na

29Nazhɛ AGWANGWAMA hiɛŋ Moses ga rɛta ufwugwo ụlamụ na namɛ na amwamwa Mɛrari hwɛɛ. 30Rɛta aŋ te kwune na atwa na tizhɛla ta shiywa sha aba shi tuwo talacɛ te e meci aŋ tutu i ci dupu anaa na teni cɛŋ maa e teni nu ugondu udulo tu'ulwatagwụ tɛnda. 31Iyi nɛ shɛ ugondu na ee peni atwa umwamwa Mɛrari nu udulo ata ụ tu'ulwatagwụ na: Aba shɛ a na 'waŋna shɛkpada shu udulo ata, ne ezhibi ubwa, na atukpa ubwa, na abatana ubwa keeni i'wɛ'wɛ ibwɛ i tɛshɛla, 32ta atukpa ata ɛɛ zhɛ a kapa ukpogwu udulo ata tutu rungwutwonu, ti i'wɛ'wɛ ibwɛ ye ezweni, tu n-ngbalụ mu bwa keeni ihwehwe ibwɛ keeni i'wɛŋni'wɛŋni ibwɛ hwɛɛ. No utogono ma bụtụ bụtụ iyi tukpororo nɛ baa shɛ ba 'waŋna. 33Ugondu na ee utegeni atwa umwamwa Mɛrari na amɛ udulo ata ụ tu'ulwatagwụ ta. Ge Itama, ubwa shɛ bungbaracɛ ba aba.#Tɛrɛ 1:50-53; 3:5-8,21-27; 8:19; 18:3,4,23

A Rɛcɛ Atwa umwamwa wa Alivai

34Go Moses na Aron keeni ehwurembe tu'ulwatagwụ ta ata rɛcɛ etwenyi na namɛ na amwamwa atwa Kohat. 35Aba shɛ atwa elele na tizhɛla ta shiywa sha aba shi tuwo talacɛ te e meci aŋ tutu i ci dupu, aba shɛ atwa elele na teni cɛŋ maa e teni nu ugondu udulo tu'ulwatagwụ tɛnda. 36Ufwugwo wa aba na amwamwa aba namɛ ugbaa-uko-na-akpakwụ-atatụ-ni-dipi-tɛtu (2,750). 37Ufwugwo wa atwa amwamwa Kohat kpaaŋ a na a nda ugondu udulo tu'ulwatagwụ, anaa na go Moses keeni Aron rɛcɛ gana na ta AGWANGWAMA peni Moses unu ta.

38Ufwugwo wa atwa amwamwa Gɛshon gana na tu nhwaŋ me eshi aba mu namɛ, 39te kwune na atwa na shiywa sha aba shi tuwo talacɛ te e meci aŋ tutu i ci shiywa dupu, na bụtụ be elele na eri bo tono na amɛ udulo tu'ulwatagwụ maa nda ugondu. 40Ufwugwo wa atwa amwamwa aba hwɛɛ namɛ ugbaa-uko-na-akpakwụ-atatụ-nu-talacɛ (2,630). 41Gana na tutogotogwu tu ufwugwo wa atwa amwamwa Gɛshon a na a nda ugondu na amɛ udulo tu'ulwatagwụ, anaa na go Moses keeni Aron rɛcɛ tedure nu unu na AGWANGWAMA peni Moses ta. 42Ufwugwo wa atwa amwamwa Mɛrari gana na tu nhwaŋ me eshi aba mu namɛ, 43te kwune na atwa na tizhɛla ta shiywa sha aba shi tuwo talacɛ te e meci aŋ tutu i ci shiywa dupu, na bụtụ be elele na eri bo tono na amɛ udulo ata ụ tu'ulwatagwụ maa nda ugondu. 44Ufwugwo wa atwa amwamwa aba hwɛɛ namɛ ugbaa-uko-na-akpakwụ-ecihiŋ (3,200). 45Tutogotogwu ta atwa na go Moses keeni Aron rɛcɛ na amwamwa Mɛrari ta, gana na ta AGWANGWAMA peni aŋ unu tedure no Moses.

46Gana go Moses, na Aron keeni ehwurembe atwa Isrɛl rɛcɛ atwa amwamwa Alivai hwɛɛ ta. 47Aba shɛ atwa elele na tizhɛla ta shiywa sha aba shi tuwo talacɛ te e meci aŋ tutu i ci shiywa dupu, a na eri o tono nu udulo tu'ulwatagwụ maa a njɛ ugondu, a na kaa eri a 'waŋna i'wɛŋnɛ udulo ata ụ tu'ulwatagwụ. 48Tɛrɛta ta aba kpaaŋ tu namɛ atwa igbɛɛ-ineshi-na-akpakwụ-eyebi-ni-dipi-tɛtu-nu-talacɛ (8,580). 49E 'nyeci izeci bụtụ bụtụ gana na ta AGWANGWAMA peni Moses unu. Ee utegeni kaa bụtụ bụtụ ugondu na baa shɛ ba nda keeni i'wɛŋnɛ nɛ baa shɛ ba 'waŋna nu gana na ta AGWANGWAMA peni aŋ unu.

Currently Selected:

TƐRƐCƐ 4: RBT

Highlight

Copy