TƐRƐCƐ 3

Iwɛ Miaụŋ-me-eyi mu Aron na

1Atwa ga aba shɛ atwa umwamwa Aron keeni Moses na aka na ta AGWANGWAMA jɛmɛ n-ndumwa no Moses ni Ishɛmɛ Sainai.

2Ga Aron 'yajɛ miaụŋ-me-eyi mi neshi, nzeci ma aba na: ga Nadab, ubwa shɛ yɛu ibwɛ ihiiŋ, na Abihu, nɛ Ɛleaza, keeni Itama #Ụban 6:23; Tɛrɛ 26:60 3E dudugeni aŋ manɛbɛ, ee tileni aŋ swooŋ maa a shɛ onongbo, maa a na nda ugondu tunongbo. 4Ama ga Nadab keeni Abihu 'wi nu umbe AGWANGWAMA nụ ụshɛka Sainai na aka na ta a shananɛ AGWANGWAMA ulwa na shɛ shɛ una tijilo. A zasa kaa miaụŋ o. Ata Ɛleaza keeni Itama tuba njɛ ugondu tunongbo ne eshe bishi ba aba ga Aron.#Tɛrɛ 26:61; Liv 10:1,2

E Teri Ụlamụ wa Alivai maa A na Ndana Onongbo Iyi

5Nazhɛ AGWANGWAMA hiɛŋ Moses, 6Suje ụlamụ wa Alivai maa o gwumwongonu, maa teri aŋ maa a na ndana Aron na shɛ bunongbo ugondu. 7Aba zhɛ na nda iyi nɛ bee eni aŋ tɛnda iwɛ udulo tu'ulwatagwụ keeni iwɛ ugondu tu'ulwa hwɛɛ, 8Aba zhɛ na ngbaraka i'wɛŋni'wɛŋni udulo ata ụ tu'ulwatagwụ hwɛɛ, aba du zhɛ no shiyono iyi ya atwa Isrɛl eshe maa a na nda ugondu nu udulo ata ụ tu'ulwatagwụ.#Tɛrɛ 1:50-53; 3:21-37; 4:1-33; 8:19,24 9Ga shɛ Alivai kiri a shɛ a na ndana Aron na Miaụŋ mu bwa iyi na ashashɛ atwa Isrɛl hwɛ hwɛɛ. 10Ga shɛ ga Aron na miaụŋ mu bwa kiri ebi teri maa a untangana ugondu tunongbo. Yaa shɛ binya bụtụ zhɛ ba kara maa gwumwongonu, ga kwụnɛ bụ.

11Nazhɛ AGWANGWAMA hiɛŋ Moses, 12N suji Alivai na ashashɛ atwa Isrɛl maa a n shanɛ yɛu umbe nɛ bajɛ igwune tumata te bino bwa. N teri Alivai swooŋ maa a shɛ e nee mi. 13Iwɛnɛ po yɛu umbe ye elele i shɛ inee mi. Te kwuni nụ ụjita ata Ngaa kwụnɛ la miaụŋ mu umbe na cɛnjɛ ti Ijipti hwɛɛ, ibɛ po Ngee meme tileneni miaụŋ mu umbe mi Isrɛl hwɛɛ swooŋ. Ta butugwumwa, tu usunda, Gamba n 'yajɛ; Gamba AGWANGWAMA na.#Ụban 13:2; Tɛrɛ 3:45; 8:18

A Rɛcɛ Ụlamụ wa Alivai

14Nazhɛ AGWANGWAMA hiɛŋ Moses, nụ Ụshɛka ata Sainai, 15Rɛta miaụŋ-me-eyi ma Alivai gana na ta amwamwa nhwaŋ me eshi aba mu namɛ. Yɛu-ye-eyi ye elele nɛ i ulwawa upiana uko te e meci iŋ, i zhɛ geri-be-eshe, muba ɛbi zhɛ ba rɛta.#Tɛrɛ 3:39 16Go Moses rɛcɛ aŋ ga gana na ta AGWANGWAMA peni bu unu. 17Nzeci mu miaụŋ-me-eyi ma Alivai na: gɛ Gɛshon, no Kohat keeni Mɛrari. 18Nzeci mu miaụŋ-me-eyi mu umwamwa Gɛshon na: ge Libni keeni Shimei. 19Nzeci mu miaụŋ-me-eyi mu umwamwa Kohat na: ga Amram, ne Izha, ne Hibron keeni Uziɛl. 20Nzeci mu miaụŋ-me-eyi mu umwamwa Mɛrari na: ga Mali keeni Mushi. Atwa ga aba shɛ amwamwa Alivai, gana na tu nhwaŋ me eshi aba mu namɛ.

21Umwamwa wa atwa Libni keeni atwa Shimei banɛ no olugwo Gɛshon, atwa ata aba shɛ amwamwa Gɛshon. 22Ufwugwo we etwenyi aba na aa rɛcɛ anaa na ee meci te kwune nu upiana uko i zhɛ geri-be-eshe, namɛ igbɛɛ-itɛtu-na-akpakwụ-ecenje-ni-dibi-yebi (7,500). 23Atwa ga umwamwa Gɛshon, aba a dwa ugba wa aba na aba udulo tu'ulwatagwụ geri bu uwaŋna-twonuo. 24Ge Iliasaf yɛu Laɛl, ubwa shɛ uhiu wa atwa umwamwa Gɛshon. 25Iyi nɛ shɛ ugondu wa atwa umwamwa Gɛshon, i shɛ maa a na ngbaraka udulo ata, to tu'urugono ta amɛ ubwa, to tu'urugono ta aba ubwa keeni ibɛgɛlɛ ɛtɛ i tugwuno to odubo udulo ata ụ tu'ulwatagwụ, 26to tugwuno ta ata ee kepi ukpogwu udulo ata tutu rungwutwonu, ti ibɛgɛlɛ ɛtɛ i tugwuno ee sweci no odubo ata oo tono ukpogwu ata keeni utukwu ata ụrụpɛ. Ti ihwehwe udulo ata keeni i'wɛŋni'wɛŋni nɛ i shɛ iwɛ ugondu ibɛ hwɛɛ.

27Go Kohat, ubwa shɛ ugwunukwoshi wa atwa umwamwa Amram, nu umwamwa wa atwa Izha, na atwa umwamwa Hibron keeni atwa umwamwa Uziɛl. 28Ufwugwo we etwenyi aba na aa rɛcɛ anaa na ee meci te kwuni nu upiana uko i zhɛ geri-be-eshe, namɛ igbɛɛ-ineshi-na-akpakwụ-atatụ (8,600).#3:28 igbɛɛ-ineshi-na-akpakwụ-atatụ: Umeseyi tɛjɛshɛrɛga tu ko ti hiɛŋ, igbɛɛ-ineshi-nụ-ụkpakwụ-ni-dipi-yebi. Ugondu wa atwa umwamwa Kohat ụ shɛ maa a na ngbaraka ohwolu ata tijilo. 29Umwamwa ga Kohat aba zhɛ na dwa ugba wa aba tuta tu udulo ata ụ tu'ulwatagwụ. 30Ge Ɛlizafan, ubwa shɛ uhiu wa atwa umwamwa Kohat. 31Iyi nɛ ee peni aŋ tungbaraka i shɛ Ikpɛtɛ Unu-tutwa, nu uteburu, nu uteburu-ụsụtụla, no otukwu-ụrụpɛ, ti i'wɛŋni'wɛŋni ugondu wo ohwolu ata tijilo inɛɛ nɛ onongbo a nda ugondu ni ibɛ. Aba du 'yagananɛ tungbaraka ti ibɛgɛlɛ ɛtɛ i tugwuno aa swata no odubo ohwolu ata tijilo na hwuri kpaaŋ keeni iyi elele nɛ aa nda ugondu ni ibɛ hwɛɛ.

32Gɛ Ɛleaza yɛu Aron bunongbo, ubwa shɛ uhiu wa Alivai na kaa bo shiyono atwa na a ngbaraka ohwolu ata tijilo eshe.

33Gɛ Mɛrari, ubwa shɛ ugwunukwoshi wa atwa umwamwa Mali keeni atwa umwamwa Mushi, atwa ata aba shɛ amwamwa Mɛrari. 34Ufwugwo we etwenyi aba na aa rɛcɛ anaa na ee meci te kwune nu upiana uko i zhɛ geri-be-eshe hwɛɛ namɛ igbɛɛ-itɛtu-nu-kpakwụ (6,200). 35Go Zuriɛl yɛu Abihail, ubwa shɛ uhiu wa atwa umwamwa Mɛrari. Aba a dwa ugba wa aba tuzuba tu udulo ata ụ tu'ulwatagwụ. 36Ugondu wa aba ụ shɛ maa a na imanganga shɛkpada shu udulo ata ụ tu'ulwatagwụ; ti imbele ibwɛ, ta atukpa ubwa, ti i'wɛ'wɛ ibwɛ tɛshɛla. Ta akwụka ubwa keeni i'wɛŋni'wɛŋni ugondu ubwa hwɛɛ. 37Aba du 'yagananɛ ti'imanganga ta atukpa ata rungwutwonu umwamwa ata, ti i'wɛ'wɛ ibɛ i tɛshɛla, tu n-ngbalụ mu bwa keeni ihwehwe ibwɛ hwɛɛ.#Tɛrɛ 1:50-53; 3:5-8; 4:1-33; 8:19; 18:3,4,23

38Go Moses keeni Aron na miaụŋ mu bwa me eyi, aba shɛ a dwa ugba wa aba geri bu uwaŋna-banụ, nu umbe udulo ata ụ tu'ulwatagwụ. Aba 'yajɛ ugondu we elele tɛnda na amɛ ohwolu ata tijilo tụlụkpashɛ ta atwa Isrɛl. Binya bụtụ be elele na kara maa gwumwonu apata, ɛ zhɛ a kwụna bụ. 39Etwenyi amwamwa Alivai a na go Moses keeni Aron rɛcɛ nu gana na ta AGWANGWAMA peni aŋ unu, aba shɛ atwa na ee meci te kwune nu upiana uko i zhɛ geri-be-eshe. Hwɛɛ aba namɛ igbɛɛ-umpwa-nu-boo-ko (22,000).

A Rɛcɛ Alivai a na Teni Ụtarụtụ Miaụŋ mu Umbe

40Nazhɛ AGWANGWAMA hiɛŋ Moses, Rɛta etwenyi na shɛ miaụŋ mu umbe ma atwa Isrɛl hwɛɛ. Aba shɛ atwa na ee meci te kwune nu upiana uko i zhɛ geri-be-eshe. 'Nyata nzeci ma aba. 41Bɛɛ hiɛŋ bụ, N sugeni Alivai tụlụkpashɛ ta miaụŋ mu umbe ma atwa Isrɛl hwɛɛ. Ti iyimabiga ya Alivai tụlụkpashɛ ta miaụŋ mu umbe mi iyimabiga ya atwa Isrɛl hwɛɛ. Gamba AGWANGWAMA na. 42Go Moses rɛcɛ ga miaụŋ mu umbe ma atwa Isrɛl hwɛɛ, gana na ta AGWANGWAMA peni bu unu. 43Ufwugwo we etwenyi na shɛ miaụŋ mu umbe a na ee meci te kwune nu upiana uko i zhɛ geri-be-eshe hwɛɛ aba namɛ igbɛɛ-umpwa-nu-boo-ko-nu-kpakwụ-nu-dupu-nu-woshi-na-ba-a-tatụ (22,273).

44Nazhɛ AGWANGWAMA hiɛŋ Moses, 45N tileneni Alivai swooŋ tụlụkpashɛ tu miaụŋ mu umbe ma atwa Isrɛl hwɛɛ. N tileneni du iyimabiga ya Alivai swooŋ tụlụkpashɛ ti iyimabiga ya atwa Isrɛl hwɛɛ. Gamba AGWANGWAMA na.#Tɛrɛ 3:11-13; 8:19 46Gana na tu miaụŋ mu umbe me eyi ma atwa Isrɛl mu patanɛ na atwa Livai kpakwụ-nu-dupu-nu-woshi-na-ba-a-tatụ (273), bɛ shɛ ba saanana aŋ. 47Bụtụ bụtụ aba shɛ ba tụpa azụrụfa arinya a ta, na shɛ ulumo wa azụrụfa ohwolu tijilo, aba shɛ bimenji ba agira woshi. 48Sugo ukwuribi ata ee seeneni atwa ata ga patanɛ maa peni Aron na miaụŋ mu bwa me eyi. 49Go Moses leshiji ga ukwuribi ata ni i'ɛlɛ ya atwa ata ga patanɛ. 50Ukwuribi ata bee leshiji no olugwo miaụŋ mu umbe ma atwa Isrɛl namɛ azụrụfa arinya akpakwụ-e-cihiŋ-ni-dipi-tɛtu-ne-eshe-umpwa-na-ba-ta (1,365), ibɛ shɛ ulumo wa azụrụfa ohwolu tijilo. 51Nazhɛ go Moses peni Aron keeni miaụŋ mu bwa me eyi ukwuribi ata u tusaanana, gana na ta AGWANGWAMA peni bu unu.

Currently Selected:

TƐRƐCƐ 3: RBT

Highlight

Copy