HAGAI 2

Unu-tishilo keeni Ti'ingatanga

1Ti ga Darius yɛ tugwama, yaa namɛ shiywa shi yebi, ni ipiɛnɛ icenje, ni ijitɛ woshi-nu-boo-ko, nazhɛ AGWANGWAMA dumananɛ n-ndumwa tedure na Hagai na shɛ bigesere ata, bɛɛ hiɛŋ, 2Mbiso ugwomina Juda gɛ Zɛrubabɛl yɛu Shiɛltiɛl, nu uhiu wo onongbo go Joshua yɛu Jehozadak, keeni atwa na vwanganɛ kpaaŋ maa, 3Gaaba ta namba na ashashɛ hiŋ te teyinje gana na ụzhɛ umwono ga namɛ laa? Gana na tuba waa hiɛ shanɛ ya hwuwayɛɛ? U hi shanɛ shɛ gana iyi tɛgadaga hŋ? #Ezr 3:12 4AGWANGWAMA hiɛŋ, Ɛ-Zɛrubabɛl, O-Joshua yɛu Jehozadak na shɛ uhiu wo onongbo, ta ahiɛba atwa vwɛ, ga u'waba ihiɛ hiɛ hwɛɛ hiŋ. AGWANGWAMA na Hwuri Kpaaŋ hiɛŋ, Mizha nda ma ugondu, iwɛnɛ po N namɛ ne hiŋ. 5Gana na Ngee hi shileni la unu aka na ta ahiɛ banɛ ni Ijipti, gana ata ga kaa Mpiala mi mi#2:5 Mpiala mi mi: Kwo kaa N namɛ na ashashɛ hiŋ. #Ụban 29:45,46 mu namɛ na ashashɛ hiŋ, ta nda ma inyɛsɛ o. 6Gana AGWANGWAMA na Hwuri Kpaaŋ jɛmɛ na, bi hiɛŋ, Na aka fwalaa na te e ci, N tɛ zhɛ mo zhingoto azuba keeni cɛnjɛ tu unyizo keeni itekwu kpalụ ko gba.#Ehib 12:26 7AGWANGWAMA na Hwuri Kpaaŋ hiɛŋ, N zhɛ du kaa mo zhingitono edenji elele kpaaŋ, nazhɛ ɛɛ zhɛ e suje aduciya wa aba kpaaŋ nu umwono ga, nazhɛ Ngɛɛ zhɛ mo shidingo uduciya#2:7 uduciya: Tɛjɛshɛrɛga tu ko ti hiɛŋ, iyi nɛ ya dwa aŋ eshe, kwo kaa iyi nɛ yo lomicingo aŋ shɛmɛ duwa duwa. nu umwono ga. 8AGWANGWAMA na Hwuri Kpaaŋ hiɛŋ, Ta azhɛnarɛya, ta azụrụfa, Gamba n 'yajɛ. 9AGWANGWAMA na Hwuri Kpaaŋ hiɛŋ, Ụzhɛ umwono ga#2:9 umwono ga: Gana tɛjɛshɛrɛga tu ko tɛ jɛmɛ ta. Ama tɛjɛshɛrɛga tu ko ti hiɛŋ, ụshɛpwụ ga. zhɛ wo hwulo una ala ụngwụshɛ,#2:9 una ala ụngwụshɛ: Kwo kaa una ala uhiiŋ. epe kaa Ngɛɛ zhɛ ma nda maa i zhɛmanɛ atwa mi maa a 'yaga du amɛ-olom.

Unu-tishilo wa Agwatana

10Ti ga Darius yɛ tugwama, yaa namɛ shiywa shi yebi, nu upiana ucinjishi,#2:10 upiana ucinjishi: Ubwa Ehibru ɛ hiɛŋ Chislev, ubwa wa nama na ashashɛ November ni December nu utakada upiana wo Oyibwo. Ubwa du kaa shɛ Bicinjishi ba Abassa. ni ijitɛ woshi-ni-bɛ-neshi, nazhɛ AGWANGWAMA jɛmɛ n-ndumwa na Hagai na shɛ bigesere ata, bɛɛ hiɛŋ, 11AGWANGWAMA na Hwuri Kpaaŋ, hiɛŋ, Hiɛŋ onongbo maa ge e heŋshi iwɛ iheŋtene gɛ. 12Yaa shɛ bụtụ fwuleji usunda na aa njɛ tijilo nu utogwo ubwa, nazhɛ utogwo ata ubwa timengeni iyi elele gana ukara, kwo kaa urombwo, kwo kaa mayaga, okwo manɛbɛ keeni iyimɛyɛ iyiri ye elele nɛ aa nduwa, asha ijɛ ɛtɛ utogwo ata ubwa timengeni suu zhɛ du ye jirumo?

Onongbo jishijɛ, ɛɛ hiɛŋ, Awo.

13Nazhɛ ga Hagai heŋteneni aŋ, bɛɛ hiɛŋ, Yaa shɛ bụtụ meme heshigeni iwɛnɛ bee timengeni ru'wo, yaa shɛ bee timengeni beye iyimɛyɛ gɛ ike, asha iyimɛyɛ ɛtɛ suu du hashɛganụ?

Onongbo jishijɛ, ɛɛ hiɛŋ, Iiŋ, i hashɛganụ.#Tɛrɛ 19:11-22 14Nazhɛ ga Hagai hiɛŋ, AGWANGWAMA na Hwuri Kpaaŋ hiɛŋ, Gana yaa shanɛ atwa ga keeni udenji ga a na namɛ nu umbe mu ta. Gana ata du ugondu i'ɛlɛ ya aba we elele ụ shɛ, iyi elele nɛ aa pana ụrụpɛ nu utukwu mu hashɛganụ. 15Ma hi tabwa maa hi heŋshi iyi nɛ ihi teneni la uuwa i ci aka ga, nazhɛ maa hi shepi utayɛ maa hi kwuneneni umwono ga wa AGWANGWAMA tuma. 16Aka na bụtụ zhe la nu urubwo na ga lanɛ ne bimenji bi iyimɛyɛ woshi, ama tuba umpwa gba namba, aka na bụtụ zhe no okwokwo na maa sarɛ meni mụ tụ'walụ ta afwafwa nhiŋlwo dupu, ama nhiŋlwo woshi gba bee gwure na muba. 17AGWANGWAMA hiɛŋ, N njɛ maa ulwa keeni ugarɛrɛ 'imɛ iyimɛyɛ hiŋ, Ngee hwelipi iŋ du na atayɛ-eshilo, taa hwayɛ hi lacɛ tɛjɛshɛrɛga maa hi gwure pi mi. 18Ama na ngbaraka ma ya te kwuni na aka ga zhɛ geri-be-eshe, te kwuni nụ ụjita ga woshi-ni-bɛneshi nu upiana ga ucinjishi, na haŋsa ma te kwuni nụ ụjita ga ee hwuwi ukoshilo umwono wa AGWANGWAMA tishilo. 19Okwo ti izɛgwu vwɛ shɛ ya nu urubwu, ta afwafwa, to owowo, ti i'wɛ'wɛ ya apomɛgranati keeni i'wɛ'wɛ buta te 'weri shi, te kwuni na aka ga zhɛ geri-be-eshe, N zhɛ ma hi pana uwebiye.

Gɛ Zɛrubabɛl shɛ yɛu-ugondu nɛ AGWANGWAMA Teri

20AGWANGWAMA dumananɛ n-ndumwa na Hagai na aka yebi nụ ụjita ata woshi-ni-bɛ-neshi nu upiana ata uko uko, bɛɛ hiɛŋ, 21Mbiso Zɛrubabɛl ugwomina Juda maa, N zhɛ mo zhingitono azuba keeni cɛnjɛ tu unyizo. 22Ngɛɛ zhɛ du ma bizhanga shɛgwuma na tugwama ta aba, N zhɛ kaa ma lashaga tu ukpahiŋ wa aba. N zhɛ mo ubo ihɛŋtu ujasa, ta asụcɛ ibɛ, idɛkwɛ ya aba zhɛ yo 'wo, asụcɛ ibɛ zhɛ mama kwụnanụ. 23AGWANGWAMA na Hwuri Kpaaŋ hiɛŋ, Ụjita ata ci hwuŋ, N zhɛ ma bu shapa gabụ gɛ Zɛrubabɛl yɛu Shiɛltiɛl na shɛ yɛu mi ugondu, ma bu nda gana bukanɛ na aa nda iyi useyida u ticinji. AGWANGWAMA na Hwuri Kpaaŋ hiɛŋ, Gamba m bu twolwo.

Currently Selected:

HAGAI 2: RBT

Highlight

Copy

Compare