HAGAI 1

E Keri Atwamwa Ụhiɛŋshɛ maa e Meeneni Umwono wa Agwatana

1Ti ga Darius yɛ tugwama ti Pɛsia, yaa namɛ shiywa shi yebi, nu upiana ucihiŋ,#1:1 upiana ucihiŋ: Ubwa Ehib ɛ hiɛŋ, Elul, ubwa shɛ Bicihiŋ ba aba, bu namɛ na ashashɛ August ni September nu utakada upiana wo Oyibwo. Ubwa du kaa shɛ Bicihiŋ ba Abassa. nụ ụjita uko, nazhɛ AGWANGWAMA jɛmɛ n-ndumwa nu ugwomina Juda gɛ Zɛrubabɛl yɛu-ye-eyi Shiɛltiɛl keeni uhiu wo onongbo go Joshua#1:1 Joshua: Ti'nyeci ti nya ti Jɛshua ta. Egini ibɛ a shɛ oko oko, bibicinji kwo kaa ubino. #Ezr 4:24—5:2; 6:14 yɛu-ye-eyi Jehozadak tedure nu unu Hagai na shɛ bigesere ga.

2Bɛɛ hiɛŋ, AGWANGWAMA na Hwuri Kpaaŋ hiɛŋ, Atwa ga hiɛŋ, Aka te ci shi maa e meeneni umwono wa Agwatana o. 3Ibɛ po AGWANGWAMA jɛmɛ n-ndumwa na atwa ga tedure na Hagai na shɛ bigesere, bɛɛ hiɛŋ, 4Aka na shɛ maa hi zwogono no shimwono shi hiŋ shi biye na ree, tu umwono ga mu hwuŋzwo? 5Ibɛ po AGWANGWAMA na Hwuri Kpaaŋ, hiɛŋ, Haŋsa ma maa hiɛ kwụbɛ gana na yaa hiɛ shanɛ. 6Hia bila izɛgwu te gembi, ama hie gwube cwɛŋ bana, ahia ya iyi, ama hi shigeji shi o, ahia swa meni, ama i'uyɛ ihi hiŋ shi o, ohio urugono tugwuno, ama mpiala mi hi genji shi tisha o, bụtụ be elele na ba lashɛga ukwuribi wa alubashɛ, bu no zwono uŋ na arɛta na ibwatagwụ 7AGWANGWAMA na Hwuri Kpaaŋ hiɛŋ, Haŋsa ma maa hiɛ kwụbɛ gana na ti yaa hiɛ shanɛ. 8AGWANGWAMA hiɛŋ, Zhaga mungo ma nshama maa hi jwɛ i'wɛ'wɛ maa hi mo umwono ata mu, iwɛ maa ma 'yaga amɛ-olom nu bwa, maa a na ma zhɛba apata. 9Hia jalakaka maa hi 'yaga iyi te gembi, ama hia 'yaga ya cwɛŋ bana, aka na kaa ehi jicinje iŋ ni ihwɛ, Mo hwulupono iŋ. Gamba AGWANGWAMA na Hwuri Kpaaŋ, N hiɛŋ, Imbe kwuŋ poo? Iwɛ umwono ata mu u hwuŋzwo, bụtụ bụtụ kaa meme shi iwɛ umwono ubwa tuma kiri. 10Iwɛ hiŋ ibɛ po eshilo ngbi shi, ibɛ du kaa po iyi elele meci shi na cɛnjɛ. 11Nazhɛ Ngaa karɛ ubata maa ụ 'imɛ cɛnjɛ keeni nshama, waa 'imɛ du iyi izɛgwu, waa 'imɛ du meni mụ tụ'walụ ta afwafwa mu ufwo ta manɛbɛ ma buta, ti iyi elele nɛ cɛnjɛ tɛ bɛcinjɛ, ta atwa, ti iyimabiga, tu ugondu i'ɛlɛ ya aba hwɛɛ.

A Hwụjɛ-unu wa AGWANGWAMA

12Nazhɛ gɛ Zɛrubabɛl yɛu Shiɛltiɛl keeni Joshua yɛu Jehozadak na shɛ uhiu wo onongbo, na atwa vwɛ aba hwụjɛ-unu wa AGWANGWAMA na shɛ Agwatana aba keeni n-ndumwa mu Hagai na shɛ bigesere ata, nu gana na ta AGWANGWAMA na shɛ Agwatana aba tumwanɛ bụ, ibɛ po aa sụmɛ AGWANGWAMA inyɛsɛ. 13Nazhɛ ga Hagai na shɛ butumwa ata ba AGWANGWAMA mbishi atwa ata utumwa wa AGWANGWAMA, bɛɛ hiɛŋ, AGWANGWAMA hiŋ namɛ ne hiŋ. 14Ibɛ po AGWANGWAMA ishicinjɛ ahaŋsa Zɛrubabɛl yɛu Shiɛltiɛl na shɛ ugwomina Juda keeni ahaŋsa Joshua yɛu Jehozadak na shɛ uhiu wo onongbo keeni shihaŋsa sha tumwata ta atwa ata hwɛɛ, aa zhajɛ ee kwuni ugondu u tuma tu umwono ata wa AGWANGWAMA na Hwuri Kpaaŋ, na shɛ Agwatana aba, 15ti ga Darius yɛ tugwama, yaa namɛ shiywa shi yebi, tu upiana ucihiŋ namɛ ijitɛ woshi-ni-bɛ-neshi.

Currently Selected:

HAGAI 1: RBT

Highlight

Copy

Compare