1 TIMOTEO 3
3
Imaynachus iyaw niqkunapaq pusaqninkunaqa kanan kachkan chaymanta
1Kay nisqayqa chiqampunim:
Pichus iglesia pusayta munachkan chayqa, uj allin llank'aq kaytam munan. 2Chayraykum, payqa uj chiqan jinataq mana imakaqmantapas tumpaykunajina kawsayniyuq runa kanan. Uj warmiyuqllam kanan, tukuy yuwaywan jinataq allimpi qhawasqa sumaq kawsayniyuqmi kanan. Wakinkunaman qurpachariq runa jinataq yachachinapaq ancha q'apa runam kanan. 3Manam uj machaykukuq runachu kanan, manallataqmi maqanakuy munaq runapas kananchu, manachayqa munakuyniyuq, llamp'u sunquyuq jinataq mana ancha qulqi munaq runam kanan. 4Wasimpi kaqkunataqa allimpim apaykachakunan, wawankunatapas uyart'akuqta jinataq allin puriykachakuqtam yachachikunan. 5Mayqinchus kikin wasin apaykachakuyta mana atichkan chayqa ¿imaynatataq Diospaq iglesian apaykachayta atinmanri? 6Ajinaqa, iglesia pusaqqa manam uj chhuyu iyaw niqchu kanan, ajinamanta umanta ama uqharikupunampaq, chhikataq ima asut'iytachus Supayqa jap'iqarqan chay kikin asut'iytam jap'iqapunman. 7Ajinallataq tukuy iyaw niq wawqimasikuna chawpipiqa allinmanta qhawasqa runam kanan, ajinamanta ima p'inqaymampas ama chayanampaq jinataq Supaypaq sipitata churasqanmampas ama jalaykunampaq.
Diospaq wasin apaykachaqkuna imayna kanankumanta
8Diospaq wasin apaykachaq runakunaqa tukuypaq allinmanta qhawasqa runakunam kananku, manam llullakunankuchu, manallataq machaykukuqpas kanankuchu, manallataqmi ancha qulqi sunqupas kanankuchu. 9Chaywampas, ima sumaq willaytachus Diosqa quchkawanchis mayqimpichus iyaw ninchis chaymantaqa manam t'ipiqakunankuchu, jinataq ch'uwa sunquyuq runakunam kananku. 10Paykunaqa ñawpaqta uj yanariy pachataraqmi atipananku, chhikachus paykunapi ima mana allinkunapas mana kachkan chhikamantaraqmi Diospaq wasin apaykachaqkunajina llank'ayninkuwan qallaripunanku. 11Kikillantataq warmikunapas allintam puriykachakunanku, mana simita apaykachaspa jinataq yuwayniyuq tukuy imapipas chiqan kaqta ruwaspam puriykachakunanku. 12Diospaq wasin apaykachaqninqa, uj warmiyuqllam kanan jinataq wasinta wawankunatawan allin apaykachakuytam yachanan. 13Diospaq wasin apaykachaqkunachus llank'anankuta sumaqta junt'anqaku chhikaqa, tukuypaq allimpi qhawasqam kanqaku, Cristo Jesuspi iyaw nisqankuraykutaq tukuyninkullataqmi sumaqpi kayta taripanqaku.
Jesucristopi iyaw nisqanchisqa sut'inchakupunmi
14Usqhayllatam qanman rikuq jamuyta munachkani; chaywampas tukuy kaykunataqa 15ichapas mana usqhayta jamuchkayman nispam qilqamuyki. Ajinamantam iglesiapi kaqkunaqa, pikunachus kawsachkaq Diospaq wawankuna kanku chaykuna imaynatachus puriykachananku kachkan chayta yachanki. Iglesiaqa imachus chiqan kachkan chaytam tiyaykuchin jinataq chayllamantataqmi sayqatakun. 16Chiqampiqa, ima puriytachus Cristopi iyaw niqkunajina qatichkanchis chaypaq chiqan kasqanta sut'inchasqamantaqa manam iskayakuna kachkanchu:
Cristoqa runaman tukuspam kaypacham jamurqan.
Ajayutaq mana juchayuqtam payman rikuchirqan.
Angelkunapas paytaqa rikurqankum.
Willayninqa tukuy suyukunaman willasqam karqan,
kaypachataq paypim iyaw nirqan.
Janaqpachaman uqharisqam kapurqan
jinatapaq Diosmi paytaqa athun kayninwan junt'aykuchipurqan.
Currently Selected:
1 TIMOTEO 3: QNBNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Quechua Norte Boliviano © Sociedad Bíblica Boliviana, 2006.
