Tíite 3
3
Boolímínyí aŋa bá sɛmɛgananamɔ́ go ɔyɔ
1Oyánɛ́náa boolímínyí go goŋaá bá bésiisie nnyɔ́dɔ go cí naá busío bá mefuŋe má gɛdɔŋɔ na bá baŋgɔ́mɔnɔ#3.1 O bana, go eninye na Oló 13.1; 1 Píe 2.13., bá bó ɔ́bɛnɔ, bá bɛ́ɛmba na bɛnɔ́gɔ́ bá meŋiigíe. 2Gɔ́nɔ́ bá dɛ dúmée mɔtɔ, bá dɛ díénénée, bá hálamanana basɔ́gɔ́ɔ, bɔ́ ɔyɔ naá bopɔ́ɔ́ na batɔ biimée. 3Ɛɛ́ɛŋ, bɛɛcɔ́ɔ tɔ́nɔ dɛ mba lɛ́ cóá kanɛ bɛnɔ́gɔ́ bá mbééníŋínyí, kanɛ ŋgɔ́bɛnɔ, dɛ ɛnda naá bɛbɛ́ bá pɛ́, na bɛdɛ́mádɛ́má mbɔ́dɔ iŋkimée, dɛ mba lɛ́ dɛ ɔyɔ naá bobɛ́ gadɛ́ɛ, dɛ ágana basɔ́gɔ́ɔ hɛagá go moóma mábɔ́, dɛ bɛlabɛlanɛna. 4Kanɛ́ aŋa Asaŋa, Usódí bɛcɔ́, a mbaá dúfíe gɛnɔ́gɔ́ gɛ́hɛ́ gá odɛ́má na ndɛ́ga yɛhɛ́ go busío bá batɔ, 5gɛ́hɛ́ go có sódio go bɛlɔgɔ bɛ́cɔ́, kanɛ́ caá akɛ́ goŋaá dɛ mba lɛ́ dɛ ŋanana meŋiigíe má tɛ́nɛ́ɛ má go mo nɔ́ɔnɔnɔ, kanɛ́ goana goŋaá a mba có ɛ́ná mahana. A báá có fáá Gimmúmpúu gá Giliíli goŋaá a có soga bobɛ́ bɛ́cɔ́, dɛ bébíene gáandɛ́, dɛ bɛa gɛpáa gá gɛɔyɔ. 6A báá có hóógío nɛhɛ́ gá Yésu Kilítu, Usódí bɛcɔ́. 7Go niibo nɛ́hɛ́, a báá có íyíe bɛtɛ́nɛ́ɛ go goŋaá dɛ bɛ́ɛmba baaná bɛ́hɛ́, dɛ bɛa toodo odɛ́máa ya gɛɔyɔ gá medúgú miimée.
8Dogálɔ dɔ́ɔdɔ ko oyanamɔ́ dɔ́ɔdɔ dó lɛ́ mammana, gɔ́ɔ gó háananamɔ́ go goŋaá o síŋgilide go dó dúfenye goŋaá báaba bó olimonyomú Asaŋa bá báfáa odɛ́má uŋkimée naá go ŋanana gá bɛnɔ́gɔ́ bá meŋiigíe. Dogálɔ dɔ́ɔdɔ dɛ húunenyemú dɔ́ dó lɔ́mɔ́ bese dó gunde dó óhigonyo batɔ. 9Kanɛ́, aáŋa batɔ bá lɛ́ go cuŋí sá kanɛ mbɔ́gɔ́ɔ, o do ágá nyuudé kɔ́ɔ. O do ɛ́dá go cuŋí go ɛgɛlɛ ya bácóá, o do gáláa cáŋɔ́, o do ɛ́dá go bidíe go moóma mɔ́ɔmɔ mó bádáfamɔ́ bicele, goŋaá moóma mɔ́ɔmɔ mó lɛ́ go dugúnú, kanɛ mbɔ́gɔ́ɔ. 10Aáŋa mɔtɔ a lɛ́ hɔ́ɔ mɔ́ɔnyɔ a lónconyomú boolímínyí goŋaá bá dɛ ɔ́bɛ́nɔ́nɔ́ɔ, mo lɔsɛ́nɔ́ɔmɔ́ gémmue, naá gá gáandɛ́ɛ#3.10 O bana, go eninye na Mot 18.15-17., aáŋa a dɛ ɔ́bɔ́, mo bégúnéemú. 11Íyíme go amɔ́ mbɔ́dɔ sá batɔ aŋa sɛ́ɛsɔ nɔ́ɔnɔ sɛ́ lɛ́ naá gonana, bɛlɔgɔ bábɔ́ bɛ́ dúfenye goŋaá bá lɛ́ naá gɛoba.
Ɛsɔ́mɔ há mesúgudinye
12Aŋa nná go dómɛnamɔ́ Atɛmásɛ ɛ́na lí Tisíke, ŋaáa fɛaŋɔ go go nco kuenye naá Nekopolísi, goŋaá ndɔ́mɔ́ bégedíelú go dúmbie gɛcamɛna gá gɛkɔ́nɔ́nɔ́ɔ gá isió hɔ́ɔ. 13Ágá bogaaga, o gedinye Sɛ́nasɛ mɔ́ɔnyɔ a lɔ́mɔ́ odílímíní bɛsɛnɛ nabɔ́ Apolóso#3.13 Apolóso : go ɛ́na Meŋ 18.24; 1 Kɔl 16.12., oŋɛndɔ yábɔ́ bese bese, boóma bá búmmue bó do bó taŋɛ́ná. 14Gó háanana goŋaá bolimóní bɛ́cɔ́ naá Kilítusu bá dómba go bámagana go ŋanana bɛnɔ́gɔ́ bá meŋiigíe, bó óhigonyo báaba bá lɔ́mɔ́ naá mbií ya boóma, bá dɛ sɛmɛ́gánánáa go ɔyɔ gɛɔyɔ gá kanɛ ŋgénéménée.
15Tíite, batɔ biimée báaba bá lɔ́mɔ́ namɛ háalá bá á go bédíígényée. Có bédíígínyéemú naá Kɛlɛ́tɛ hɔ́ɔlɔ́ bolimóní bɛ́cɔ́ bá gioliminyo báaba bá có maamanamɔ́. Ŋgáa Asaŋa a nyó boogo bɛɛnyɔ́ɔ biimée.
