Tíite 2
2
Mammana ya ɛsɔ́mɔ
1Kanɛ́ maamɔ́ɔ, Tíite, oyáa boóma bɔ́ɔbɔ aŋa mammana ya kúunye ya dogálɔ dá Asaŋa yɛ oyamɔ́. 2Oyána bilunú bá banɔ́mɔtɔ́ go goŋaá bɛ́ dɛ ágá giyóló go boóma, batɔ báaba bá ŋanana moóma má goŋaá bá bó hálamanana, bá bɛ́ɛmba na mbééníŋínyí sá bese, bá bɛ́ɛmba besé naá gioliminyo, na gɛnɔ́ɔ́nɛ́nɔ́ na naá go bánona gá odɛ́má.
3Oyána tɔ́nɔ bilunú bá bakɔ́dɔ go goŋaá bɔ́ ɔyɔ gɛɔyɔ gá kanɛ mekesíi, bá dɛ gálágáláa bɛbɛ́ bá dogálɔ, bá dɛ bɛ́ɛ́mbá bɛɔlɛ́ bá nɛnyóa, bá sɛmɛganana go fáanana gɛnɔ́gɔ́ gá ɛsɔ́mɔ, 4go go dúfenye bɛtɔmbɔ́ɔ bá bakɔ́dɔ aŋa bɛ́ háananamɔ́ go lɛ́galɛga banɔ́mɛ bábɔ́ na baaná bábɔ́. 5Bá bɛ́ɛmba na mbééníŋínyí sá bese, bá dɛ ágá oŋgíso go banɔ́mɔtɔ́ bóncoó, bá bɛ́ɛmba goana naá masɔ́mɔ mábɔ́ má niibo, bá bɛ́ɛmba na bɛnɔ́gɔ́ bá caŋa, bá bɛ́ɛmba na gobésiisie na ŋgɔ́bɛnɔ naá boayá bá banɔ́mɛ bábɔ́, mbɔ́dɔ ya ŋaá nogálɔ ná Asaŋa nó do bɛáa cigí.
Ɛsɔ́mɔ go busío bá tɔmbɔ́ɔ, tɔ́nɔ go busío bá bɛɔlɛ́
6Gíndényée tɔ́nɔ bahaŋa go goŋaá bá bɛa bɛnɔ́gɔ́ bá mbééníŋínyí naá boóma buimée, 7o bɛ́ɛmba maamɔ́ɔ moatɛ́ moatɛ gieninye gá bɛnɔ́gɔ́ bá meŋiigíe, gohúunenye gáhɔ gó bɛ́ɛmba mammana na bese, 8nogálɔ ná kɔ́ɔ kanɛ cigíi mbɔ́dɔ ya goŋaá obɛlɔ́bɛlɔ a nóa odóɛ, a dɛ bɛáa boóma bá go gɔnɔ gálɛda.
9Oyána tɔ́nɔ bɛɔlɛ́ ŋgáa bɛ́ bésiisie nnyɔ́dɔ go cí, bɛ́ ɔ́bɛnɔ bagɔ́nɔ́ɔ bábɔ́ go buimée, bɛ́ dɛ sáŋóná boóma bɔ́ɔbɔ bagɔ́nɔ́ɔ bábɔ́ bá bó oyanɛnamɔ́. 10Bá dɛ bɔ́bɔ́ŋɔ́nɛ́nɔ́ɔ moóma má bagɔ́nɔ́ɔ bábɔ́; goana bá bɛ́ɛmba na pídefide iŋkimée nabɔ́; mbɔ́dɔ ya goŋaá kúunye ya Asaŋa Usódí bɛcɔ́ ɛ gɔ́lɔ nigúmi naá boóma buimée.
Boɛ́nɔ bɔ́ɔbɔ bó ɔ́bɔnɛnɔmɔ́ na Asaŋa
11Ɛɛ́ɛŋ, niibo ná Asaŋa niimée, mbɔ́gɔ́ ya gisódio go busío bá batɔ, nɛ́ mba bédúfíe. 12Nɛ́ nɛ́ có dúfenyemú go goŋaá dɛ dɛ́ɛna bɛbɛ́ bá pɛ́ na bɛbɛ́ bá moóma má cí yɛ́ɛyɛ, aŋa dɛ lɔ́mɔ́ ba goŋaá dɛ ɔyɔ naá medúgú má ínoni máama, na nciŋí na botɛ́nɛ́ɛ, dɛ ŋanana moóma mɔ́ɔmɔ mó fɛɛnanɛnamɔ́ Asaŋa. 13Dɛ gɛ́gana buisí bá toodo odɛ́máa yɛcɔ́, buisí moánɛ bó ŋga bɛ́ɛ́mbá goncogunde gá Ogɔ́nɔ́ɔ Asaŋa bɛcɔ́ gɔnɔ́ Usódí bɛcɔ́ Yésu Kilítu naá nigúmi. 14Mɔ́ɔ a mbaá bííŋéné mɔ́ɔ moatɛ́ moatɛ go nigúe go busío bɛ́cɔ́, go go có sódio go bobɛ́ buimée a gɔnɔ có soga dɛ bɛ́ɛmba boɛ́nɔ bɔ́ɔbɔ bó mo ɔ́bɛnɔnɔmɔ́, dɛ bɛ́ɛmba báaba bá lɛ́galɛgamɔ́ go ŋanana bɛnɔ́gɔ́ bá meŋiigíe bɛcamɛna biimée#2.14 O bana, go eninye na Ɛsagɔ 130.8; Esekíele 37.23; Gihúmie 19.5; Bicele 14.2; 1 Píe 2.9; Ɛ́fɛ 2.10..
15Nɔ́ɔnɔ kanɛ́, húúnényée batɔ moóma mɔ́ɔmɔ, o bó fáanana magɛ́nda, o bébégene na nɛgaŋa niimée báaba bá lɔ́mɔ́ bá dɛ lɛ́gálɛ́gáa go ɔ́bɔ bɔ́ɔbɔ Asaŋa a go fáananamɔ́. O do dɛ́ɛ́ná mɔtɔ a dɛ go fáánɛ́ná.
