Olóma 6
6
Gɛɔyɔ na Yésu Kilítu naá nnyimé ya nigúe
1Kanɛ́ aŋa bó lɔ́mɔ́ nɔ́ɔnɔ, dɛ háanana go ándɛnɛna naá gɛlɔgɔ goŋaá Asaŋa á ba ŋanánáa niibo fundufundu o? 2Akɛ́ɛ, bó do báá nɔ́ɔnɔ, aŋa dɛ mbaá dómbá naá nigúe nɛ́ɛnɛ nɛ́ mbaá có ádóná na gɛlɔgɔ dɛ dɛ háánánáa go ɛ́dana naá busío na go lɔgɔ. 3No íyimene bese na bese goŋaá aŋa gɔ́ɔgɔ giyuminye gɛ́cɔ́ gɛ́ mbaá có nebígínyée na Yésu Kilítu, gɛ́ mba có nebígínyée biimée go nigúe nɛ́hɛ́. 4Kɔ́ɔ, go giyuminye gɛ́cɔ́ naá nigúe nɛ́hɛ́, dɛ mba bɛ́ɛ́mbá miéelú olɔŋɔ nɛhɛ́. Kanɛ́ nigúmi ná Isée nɛ́ɛnɛ nɛ́ nɛ́ mbaá fúfúné Kilítusu go goŋaá bɛɛcɔ́ɔ tɔ́nɔ dɛ bɛa gɛpáa gá gɛɔyɔ. 5Nɔ́ɔ gɔ́ɔ, aŋa gɔ́ɔgɔ dɛ mbaá bénebígínyée uŋkimée uŋkimée nɛhɛ́, dɛ báá gúé aŋa mɔ́ɔ, dɛ ŋga bénebígínyée caŋa táŋɛ́ mmue nɛhɛ́, dɛ fúfuge aŋa mɔ́ɔ. 6Ŋgáa dɛ ɔ́bɔ bese go goŋaá: dɛ mba gɛ́ gilénée naá kolósi olɔŋɔ na Kilítusu gɛcóa gɛ́cɔ́ gá gɛɔyɔ, go goŋaá bogaaga bá gɛlɔgɔ naá nnyɔ́dɔ yɛcɔ́ bó bɛ́ɛmba níŋísídéelú, dɛ dɛ gɔnɔ́ bɔ́yɔgɔnɛnɔ gɛlɔgɔ aŋa bɛɔlɛ́. 7Mammana, mɔ́ɔnyɔ a lɔ́mɔ́ ugúe a dɛ báá gɔnɔ́ naá magálá má gɛlɔgɔ. 8Kanɛ́ aŋa gɔ́ɔgɔ dɛ mbaá gúé olɔŋɔ na Kilítusu, dɛ hɛmana goŋaá dɛ ŋgɔ ɔyɔ́ɔ tɔ́nɔ olɔŋɔ nɛhɛ́. 9Dɛ íyimene bese na bese go goŋaá: aŋa Kilítusu a mbaá fúfúgé, a dɛ gɔnɔ́ gúenene, a dɛ báá gɔnɔ́ naá magálá má nigúe. 10Kilítusu a mba gúé go gɛlɔgɔ go busío buiménénée. Godɔ́ɔdɔ a lɛ́ ogɔ́sɔ, gɔ́ɔ gɛɔyɔ gɛ́hɛ́ giiménénée gɛ́ lɔ́mɔ́ go busío bá Asaŋa. 11Nɔ́ɔnɔ, bɛɛnyɔ́ɔ tɔ́nɔ bɔ́gɔ́lɔ́nɔ́ɔmɔ́ nɔnɔ aŋa begúe go gɛlɔgɔ, aŋa bɔgɔ́sɔ naá busío bá Asaŋa go gibénebiginye gɛ́ɛgɛ na Yésu Kilítu.
12Kanɛ́ no do gɔnɔ́ bádɛ́ɛnɛna go goŋaá gɛlɔgɔ gɛ́ ɛ́dana naá busío gɛ́ indenye gigúénú gɛ́nyɔ́ gá nnyɔ́dɔ na golɛ́galɛga gá yɛ́. 13No do gɔnɔ́ go ága nnyɔ́dɔ yɛnyɔ́ go go yɔgɔnɛnɔ gɛlɔgɔ aŋa bɛlɛŋɔ bá bidé bɛ́ lɔ́mɔ́ go go yɔgɔnɛnɔ gɛgáda. Kanɛ́ bííŋénéemú nɔnɔ go go yɔgɔnɛnɔ Asaŋa aŋa bigúénú bɛ́ɛbɛ bɛ́ lɔ́mɔ́ fúfúgéelú bɛ́ báá ncó gunde naá gɛɔyɔ. Ágá nɔnɔ nnyɔ́dɔ yɛnyɔ́ go go yɔgɔnɔ buelí bá go ŋanana besé. 14Gɛlɔgɔ gɛ́ dɛ gɔnɔ́ nyó mánɛgɛna, mammana, no do gɔnɔ́ go ɔ́bɛnɔnɔ na Gicele, kanɛ́ no ná lɔ́mɔ́ go ɔ́bɛnɔnɔ na niibo ná Asaŋa.
Buelí bá botɛ́nɛ́ɛ
15Caá oo! Aŋa bó lɔ́mɔ́ go goŋaá dɛ dɛ gɔnɔ́ go ɔ́bɛnɔnɔ na Gicele, dɛ ná lɔ́mɔ́ go ɔ́bɛnɔnɔ na niibo ná Asaŋa, gɔ́ɔ dɛ gaá nɛ́ ɛ́dánáa naá busío dɛ ŋanana gɛlɔgɔ o? Caá akɛ́ nɔ́ɔnɔ! 16No íyimene no amɔ́ gɔ́ɔgɔ mɔtɔ a bííŋenemú sɔ́gɔ́ mɔtɔ go go mo yɔgɔnɛnɔ, a á bííyíe gɛɔlɛ́ gɛ́hɛ́: akɛ́ gó bɛ́ɛmba go gɛlɔgɔ gɛ́ɛgɛ gɛ́ có indenyemú naá nigúe#6.16 O bana, go eninye na Sáŋ 8.34., akɛ́ gó bɛ́ɛmba go ŋgɔ́bɛnɔ ya Asaŋa yɛ́ɛyɛ ɛ có indenyemú naá gɛɔyɔ gá botɛ́nɛ́ɛ, o lɛ́ gɔgɔ́ gɛɔlɛ́ gá mɔ́ɔnyɔ o báá ní iyídé. 17No á lɛ cóá bɛɔlɛ́ bá gɛlɔgɔ, kanɛ́ godɔ́ɔdɔ yɛ́ɛyɛ no ɔ́bɛ́nɔ́ Asaŋa no báá gɔnɔ́ gumbene ɛsɔ́mɔ hɛ́ɛhɛ no lɔ́mɔ́ bɛáalú na odɛ́má uŋkimée, ŋgáa dɛ béhiigi Asaŋa go busío moánɛ. 18Kanɛ́ godɔ́ɔdɔ, no á húmé naá magálá má gɛlɔgɔ, no báá bííŋéné go go yɔgɔnɛnɔ botɛ́nɛ́ɛ. 19Aáŋa nnyó gálagala cí aá cí, bó lɔ́mɔ́ goŋaá ndɛncana bonɔ́nɔ́ bɛ́nyɔ́ go go ɔ́bɔnɔ. Cóá, no mba lɛ́ no bííŋenene uŋkimée uŋkimée bɛnyɔ́ go go ŋanana moóma má biílo na má go beŋgelenye. Boóma moánɛ bɔ́ bó mbaá ŋaáa goŋaá no báaŋɛga Asaŋa, kanɛ́ godɔ́ɔdɔ, bííŋénéemú nɔnɔ uŋkimée uŋkimée bɛnyɔ́ go go ŋanana botɛ́nɛ́ɛ, go goŋaá gɛɔyɔ gɛ́nyɔ́ gɛ́ bɛ́ɛmba gɛɔyɔ gá kanɛ biílo. 20Gɛcamɛna gɛ́ɛgɛ no mbaá lɛ no gá bííŋenene go gɛɔyɔ gá bɛlɔgɔ no mba lɛ́ filíi go botɛ́nɛ́ɛ bá Asaŋa, bó do mbáa lɛ bó nyó nona. 21Naá gɛcamɛna moánɛ gɛ́ɛgɛ no mbaá lɛ no ŋanana bɛgáda bá moóma bɛ́ɛbɛ no ná lɔ́mɔ́ go nóanana odóɛ go bɛ́ godɔ́ɔdɔ, kasɛ́á besé no mbaá bódá hɔ́ɔ o? Bɛgáda bá meŋiigíe bɛ́ɛbɔ bɛ́ úlenemú goana na nigúe. 22Kanɛ́ godɔ́ɔdɔ, no á húmé naá magálá má gɛlɔgɔ, no báá bííŋéné go go yɔgɔnɛnɔ Asaŋa, besé sɛ́ɛsɛ hɔ́ɔ sɛ́ lɔ́mɔ́ gɛɔyɔ gá kanɛ biílo, naá go ɛ́da súgidinye godáŋaba gá gɛɔyɔ gá medúgú miimée. 23Ɛɛ́ɛŋ, bɛsoɛná bá gɛlɔgɔ bɛ́ lɔ́mɔ́ nigúe, kanɛ́ pááná ya Asaŋa go dugúnú ɛ lɔ́mɔ́ gɛɔyɔ gá medúgú miimée naá gibénebiginye gɛ́ɛgɛ na Yésu Kilítu, Daadáa bɛcɔ́.
Currently Selected:
Olóma 6: YAS
Highlight
Copy
Compare
Share
Want to have your highlights saved across all your devices? Sign up or sign in
