Olóma 5
5
Asaŋa a á meníe gɛsɛnɛ na batɔ, a báá bó sódío
1Mammana, Asaŋa a lɛ́ có íyíelú bɛtɛ́nɛ́ɛ bá batɔ go gioliminyo, kɔ́ɔ godɔ́ɔdɔ dɛ lɔ́mɔ́ naá buumbénú nɛhɛ́ gá Daadáa bɛcɔ́ Yésu Kilítu. 2Dɛ olimonyo, kanɛ́ gá Yésusu gɔ́ɔ dɛ dáŋabanamɔ́ niibo ná Asaŋa, dɛ gɛ́ga kɔ́ɔ ndukíi. Dɛ gɔnɔ békelenye goakɛ́ dɛ bémineminie go bɛa nigúmi ná Asaŋa. 3Dómbá dómbáa dɛ békelenye gɔ́ɔgɔ dɛ ɔ́bɛgɔnɔmɔ́, goakɛ́ gɛɔ́bɛgɔ gɛ úlene na kumbene odɛ́máa. 4Gɔ́ɔgɔ o lɔ́mɔ́ na kumbene odɛ́máa, o bɛanana nigégé akɛ́ bɛdɔmbɔ bɛ́ bɛ́ɛmba nɛɛ́nɛ. Gɔ́ɔgɔ o lɔ́mɔ́ na nigégé o bɛanana mbémineminie. 5Kanɛ́ mbémineminie yɛ́ɛyɛ ɛ dɛ belébélée. Mammana Asaŋa a mba ágá gɛnɔ́ɔ́nɛ́nɔ́ gɛ́hɛ́ naá ɛdɛ́má yɛcɔ́ go bogaaga bá Gimmúmpúu gá Giliíli mɔ́ɔnyɔ a mbaá có fáá.
6Ɛɛ́ɛŋ, gɛcamɛna gɛ́ɛgɛ dɛ mbaá lɔmɔ́ kanɛ bogaaga bá go bóoyo bɛɛcɔ́ɔ moatɛ́, Kilítusu a mba gúé go bɛɛcɔ́ɔ bologílógí naá gɛcamɛna gɛ́ɛgɛ Asaŋa a mbaá sómbá. 7Bó lɛ́ ndɔlɛ makɔ́nɔ́ goŋaá mɔtɔ a hɛma go gúe go busío bá gɛtɛ́nɛ́ɛ gá mɔtɔ; ádaga mɔtɔ a lɛ́ ba go hɛma go gúe go usi ba mɔtɔ. 8Kanɛ́ náana gɔ́ɔ Asaŋa a dúfenyemú goŋaá a có maamana: Kilítusu a mba gúé go busío bɛ́cɔ́, hɔ́ɔlɔ́ dɛ gá lɛ́ bologílógí. 9Ɛ́ná lɛ́ godɔ́ɔdɔ, dɛ lɛ́ ɛ́yáalú bɛtɛ́nɛ́ɛ bá batɔ go nigúe ná Kilítusu, ɛŋɛndɔ inikí kanɛ́ a ná ŋamɔ́ a dɛ có sódío go mpímí ya Asaŋa o! 10Mammana, gɛcamɛna gɛ́ɛgɛ dɛ mbaá lɔmɔ́ dɛ gá lɛ́ babɛlɔ́bɛlɔ bá Asaŋa, a báá có gedíe nɛhɛ́ go nigúe ná moɔnɔ́ bɛhɛ́; aŋa gɔ́ɔgɔ bó lɔ́mɔ́ goŋaá Asaŋa a mba có gedíe nɛhɛ́, kanɛ cuŋíi a ŋga có sódío tɔ́nɔ go gɛɔyɔ go Moɔnɔ́ bɛhɛ́. 11Caá akɛ́ osúge yɔ́yɔ́ɔ, dɛ békelenye na Asaŋa go busío bá Daadáa bɛcɔ́ Yésu Kilítu mɔ́ɔnyɔ a lɔ́mɔ́ có gedíelú godɔ́ɔdɔ na Asaŋa.
Ádama na Yésu Kilítu
12Go nɔ́ɔ gɔ́ɔ, aŋa nigúe nɛ́ mbií íŋéné naá cí go busío bá mɔtɔ ummue Ádama, gɔ́ɔ tɔ́nɔ nigúe nɛ́ mbií íŋéné go busío bá gɛlɔgɔ, nigúe go dómbɛna batɔ biimée goakɛ́ batɔ biimée bá mba ŋaáa gɛlɔgɔ#5.12 Go ɛ́na naá Mabayɛga 2.17; 3.6,17-19.. 13Otóotoɛ yá ŋaá Asaŋa a nco fáa Mɔ́sɛsɛ Gicele, gɛlɔgɔ gɛ́ mbaá ŋá gɛ́ ná lɛ́ naá cí; kanɛ́ gɛ́ lɛ go bɛ́ɛmba gɛ́ dɛ ɛ́nɛ́gánáa goakɛ́ Gicele gɛ́ mbaá ŋá gɛ́ gá lɛ́ gɛ́ dɛ bɛ́ɛ́mbá. 14Hálá, nigúe nɛ́ mba gidée ŋkada gó bayɛga naá gɛcamɛna gá Ádama gó nco húme naá Mɔ́sɛsɛ. Nɛ́ fúugenye batɔ akɛ́ na báaba bá mbaá lɛ kanɛ go ŋa gɛlɔgɔ aŋa gɛ́ɛgɛ gá Ádama mɔ́ɔnyɔ a mbaá ŋaáa Asaŋa edúu. Ádama a mba lɛ́ gieninye gá mɔ́ɔnyɔ a mbaá lɛ ba go úle. 15Gɛoba gá Ádama na pááná ya Asaŋa go dugúnú mó lɛ́ na gɛantá gá tádoga. Mammana, batɔ gɛca bá lɛ́ gúénéné gúénéné go busío bá gɛoba gá mɔtɔ táŋɛ́ ummue. A lɔ́mɔ́ Ádama. Kanɛ́ pááná ya Asaŋa go dugúnú ɛ bɛanana ndénégé ɛ dómbana. Asaŋa a mba ŋaáa pááná ya ndiemi go mɔtɔ táŋɛ́ ummue, a lɔ́mɔ́ Yésu Kilítu. A báá gó sugune niibo nɛ́hɛ́ go gɛcɛcá gá batɔ. 16Pááná ya Asaŋa ɛ yɔgɔnɔ kóka na gɛoba gá mɔtɔ táŋɛ́ ummue. Gɔ́ɔ bó lɔ́mɔ́, naá nnyimé ya gɛoba gá mɔtɔ táŋɛ́ ummue, Ádama, gosómba bɛsɛnɛ gá Asaŋa gó búú úlé na goága gá batɔ biimée naá ncíbo ya gɛaŋɔ́. Ncó go ɛ́na kanɛ́ goŋaá, naá nnyimé ya gɛcɛcá gábɔ́ gá bɛlɔgɔ, pááná ya Asaŋa go dugúnú ɛ báá ncó bó íyie bɛtɛ́nɛ́ɛ bá batɔ. 17Mammana, aáŋa go mɔtɔ táŋɛ́ ummue, go busío bá gɛoba gá mɔtɔ táŋɛ́ ummue gɔ́ɔ nigúe nɛ́ mbaá gidée ŋkada, kanɛ́ tɔ́nɔ gá Yésu Kilítu mokáa gɔ́ɔ batɔ bá dáŋábana makɔ́nɔ́ naá Asaŋa: a bó fáanana niibo nɛ́hɛ́ go dugúnú, a gunde a bó íyienye bɛtɛ́nɛ́ɛ bá batɔ. Go Yésu Kilítu mokáa, bá ŋgɔ ɔyɔ́ɔ, bá gɔnɔ gúme nɛhɛ́.
18Gɔ́ɔ batɔ biimée ba mbɛɛ́ ɛ́dá naá ncíbo ya gɛaŋɔ́ go busío bá gɛoba gá mɔtɔ táŋɛ́ ummue, caŋa táŋɛ́ mmue, buelí bá botɛ́nɛ́ɛ bá mɔtɔ táŋɛ́ ummue bó bíí íyíe biimée bɛtɛ́nɛ́ɛ bá batɔ, bá báá bɛáa gɛɔyɔ. 19Aŋa mɔtɔ táŋɛ́ ummue a mbaá ŋaáa Asaŋa edúu, gɛcɛcá gá batɔ gɛ́ bɛ́ɛ́ ɛ́yá bologílógí; caŋa táŋɛ́ mmue, ŋgɔ́bɛnɔ ya mɔtɔ táŋɛ́ ummue yɛ íyenye gɛca bɛtɛ́nɛ́ɛ bá batɔ naá oŋgíso yá Asaŋa. 20Naá gobola gá Gicele, bɛoba go ɛ́da go dege go tege; kanɛ́ anáa bɛlɔgɔ bɛ́ mbaá lɛ bɛ́ dege go tege, niibo ná Asaŋa nɛ́ báá gɔnɔ́ dege makɔ́nɔ́ nɛ́ báá dómbáa. 21Cóá, gɛlɔgɔ gɛ́ mba lɛ́ na bogaaga buimée bá go ónanɛna; caŋa mmue godɔ́ɔdɔ, niibo ná Asaŋa nɛ́ lɛ́ na bogaaga buimée bá go íyie batɔ bɛtɛ́nɛ́ɛ, go go có indenye naá gɛɔyɔ gá kanɛ mesúge, gá Yésu Kilítu Daadáa bɛcɔ́.
Currently Selected:
Olóma 5: YAS
Highlight
Copy
Compare
Share
Want to have your highlights saved across all your devices? Sign up or sign in
