Meŋiigíe 22
22
1«Bondimóní bámɛ na biisée bámɛ, bódólígínyóomú nɔnɔ boóma bɔ́ɔbɔ ndɔ́mɔ́ goŋaá nnyó oyana go go bɔ́bɔgɔbɔgɔ ɛ́na no lɛ́ ba go ŋgɔ́bɔ.» 2Aŋa bá mbɔɔ́ ɔ́bɔ́ goŋaá a ná lɛ́ go bó gálagala na nohébelée, bá báá lɛ gó máma pɔ́ɔ́, bá báá dámbá edúu. Póolo go ɛ́da na dogálɔ naá busío a amɔ́: 3«Yɔmɔ́ɔ ndɔ́mɔ́ ba Beyúdene, bébíénéelú naá tɛ́sɔnɔ ya Tálasɛ naá gigísi gá cí gá Silisíi. Kanɛ́ háalá naá Yolósalɛmɛ gɔ́ɔ ŋgaá ná gomáa. Geméliele mɔ́ɔ a mbaá lɔmɔ́ iloodio hámɛ, a báa kúúnényée go íyime mammana gicele gá biisée bɛcɔ́. Mmba lɛ́ bííŋénéelú na bogaaga naá buelí bá Asaŋa aŋa bɛɛnyɔ́ɔ no ŋananamɔ́ ínoni. 4Mmba génégényée, mbóo ónáa batɔ báaba bá mbaá lɔmɔ́ bá bienene boóma bɔ́ɔbɔ bá dɔ́ŋɔnɔmɔ́ bá amɔ́ Pɛ́. Mmba gumbénénée batɔ banɔ́mɔtɔ́ na bakɔ́dɔ, mbó ágana naá ncíbo ya gɛaŋɔ́. 5Ogɔ́nɔ́ɔ ba bedúmbí bɛbáágá naá Asaŋa na giimbó giimée gá bafɛanɔ́ɔ bá lɛ́ ba go nyó oyana goŋaá bɔ́ɔbɔ ŋgoyamɔ́ háalá bó lɛ́ mammana. Goakɛ́ bɔ́ɔ bá mbaá ncoóo bakálata go bolimóní bɛ́cɔ́ Beyúdene báaba naá Damáasɛ. Mmba lɛ́ ŋgɛ́dana go go gumbenene boolímínyí báaba hɔ́ɔ, nco gunde nabɔ́ gódá gódá naá Yolósalɛmɛ, go go bó séesenye.
6«Kanɛ́ nná lɛ́ go pɛ́, mekúígíi go go bola naá Damáasɛ, gámɛ go béteme naá gɛantá gá gise gadɛ́ɛ gɛ́ ɛ́da go úlene naá mmoɛná: bó mba lɛ́ boóma bá tólóbóo. 7Ŋgoó obá go cí, gámɛ go ɔ́bɔ ukelú yó kálagala yó amɔ́: “Sóole, Sóole, o céesenyemú goakɛ́ o?” 8Gámɛ go úhune caá: “Daadáa, o lɔ́mɔ́ ánɛ́ɛ o?” A báá lɛ gó ŋgoyana a amɔ́: “Ndɔ́mɔ́ Yésusu ba Násalɛdɛ. Ndɔ́mɔ́ mɔ́ɔ o séesenyemú.” 9Batɔ báaba bá mbaá lɔmɔ́ olɔŋɔ namɛ bá mbɛ ɛ́ná gise, kanɛ́ bá lɛ́ kanɛ go ɔ́bɔ ukelú yá mɔ́ɔnyɔ a mbaá lɔmɔ́ a kálagala. 10Kɔ́ɔ, ŋgúhenemú caá: “Daadáa, ndɔ́mɔ́ ba go ŋa nɛɛ́nɛ o?” Gɛ́hɛ́ go ŋgoyana a amɔ́: “Fadɛ́gɛ́na, go ɛ́dá naá Damáasɛ, bá gaá go oyáná hɔ́ɔ buimée bɔ́ɔbɔ bó úhenemú goŋaá o ŋa.” 11Kanɛ́ aŋa mmbaá ŋá mbáa go oba bigélí na gɛantáanta gá gise gɛ́ɛgɔ, batɔ báaba mmbaá lɛ olɔŋɔ nabɔ́ go kumbene, bá bɛ́ɛ ɛ́dá namɛ naá Damáasɛ.
12«Mɔtɔ ummue a mba lɛ́ hɔ́ɔ, ufíno yɛ́hɛ́ Ananɛ́asɛ, gɛgaaga gá uŋgolímínyí ba Asaŋa, ɛ ɛnda tɛ́nɛ́ɛ aŋa gicele gɛ́cɔ́ gɛ́ oyamɔ́, Beyúdene biimée báaba naá Damáasɛ bá mba lɛ́ ŋgominyo sɛ́hɛ́. 13Kɔ́ɔ Ananɛ́asɛ mɔ́ɔnyɔ a ncomɔ́ kíde hɔ́ɔ, go dɛ́lɛmɛna a amɔ́ gámɛ a amɔ́: “Ondimóní bamɛ Sóole, gɔnɔ́ bayɛga go ɛ́nanɛna.” Hɔ́ɔ na hɔ́ɔ, mbáa bayɛ́gá go ɛ́nana, mbáa mo ɛ́ná. 14Gɛ́hɛ́ go ŋgoyana a amɔ́: “Asaŋa ba biisée bɛ́cɔ́ a mba go iyídé fueké goŋaá o lɛnca ndɛ́ga yɛhɛ́, go ɛ́na mɔ́ɔnyɔ a lɔ́mɔ́ Gɛtɛ́nɛ́ɛ mokáa, o gunde go ɔ́bɔ aŋa mɔ́ɔ moatɛ́ moatɛ a go gálagalamɔ́. 15Mammana, o sɛmɛganana go bɛ́ɛmba ŋgominyo yɛhɛ́ go go oyanɛna batɔ biimée bɔ́ɔbɔ o lɔ́mɔ́ ɛ́náalú, o báá gɔnɔ́ gunde o bɔ́ɔ́ ɔ́bɔ́. 16Kanɛ́ godɔ́ɔdɔ, o gá gɔnɔmɔ́ sumbugugene goakɛ́ o? Fadɛ́gɛ́na, o béyuminye, o dɔ́ŋɛnɔ ufíno yɛ́hɛ́ go go básogona bɛlɔgɔ báhɔ.”
17«Gámɛ go fadɛgɛna, go gunde naá Yolósalɛmɛ. Kanɛ́, ndɛ́ go mbósógólí naá Nnyaŋá ya Asaŋa, mbáa lɛ gó bɛa giínigie. 18Mbɛ́ɛ́ ɛ́ná Daadáa a kálagala a amɔ́: “Bágáyɛ́gáamɔ́, go úlukie naá Yolósalɛmɛ kanɛ go gɛ́ga. Mammana, batɔ báaba hɔ́ɔ bá dɛ ná bósó go ɔ́bɔ boóma bɔ́ɔbɔ o dúfenyemú go yɔmɔ́ busío.” 19Gámɛ gó gundie caá: “Daadáa, bí íyimene bɔ́ɔ moatɛ́ goŋaá yɔmɔ́ɔ ŋgaá lɛ mbɔ́yɔdɛgɔnɔ naá nnyaŋá sá mbósógólí, kumbenene boolímínyí báaba kɔ́ɔ, ŋgágana báaba naá ncíbo ya gɛaŋɔ́, cóala báaba mobágɔ. 20Mmba lɛ́ tɔ́nɔ olɔŋɔ na batɔ báaba bá mboó óná Ítiene, ŋgominyo yahɔ. Mmba lɛ́ ukelú nabɔ́, nnona bɛla bábɔ́.” 21Daadáa go ŋgoyana kanɛ́ a amɔ́: “Ɛ́dá, goakɛ́ yɔmɔ́ɔ mɔ́ɔ ko dómanamɔ́ halaháláa, naá batɔ báaba bá lɔ́mɔ́ bá dɛ bɛ́ɛ́mbá Beyúdene.”»
22Batɔ go bódólonyo Póolo gó báá ncó héme aŋa a mbaá gálɛ́dá dogálɔ dɔ́ɔdɔ; kɔ́ɔ bɛ́ ɛ́damɔ́ go ánca bá amɔ́: «Ségínyée nɔnɔ mɔtɔ mɔ́ɔnyɔ naá cí háalá! A sɛmɛganana na go gúe cá!» 23Bá mba lɛ́ bá bálámancana, bá bálafa bɛla, bá nɔɔnɔnɔ bibúu go mmoɛná. 24Gɔ́ɔ, Ogɔ́nɔ́ɔ ba bisimbi tɔ́sɛnɔ i íŋenemú bogaaga bá go íŋenye na Póolo naá ɛgága, bá mo gide na mobágɔ goŋaá o oyɛda mammana, a dúfie boóma bɔ́ɔbɔ batɔ bá mbaá lɔmɔ́ bá ánca go bɔ́. 25Kanɛ́ aŋa bá mbaá gódá Póolo goŋaá bá mo gide na mobágɔ, gɛ́hɛ́ go oyana ogɔ́nɔ́ɔ ba bisimbi ntɛdɛ mɔ́ɔnyɔ a mbaá lɔmɔ́ hɔ́ɔ a amɔ́: «No bɛanana bogaaga bá go gide na mobágɔ mɔtɔ mɔ́ɔnyɔ ɔ ɔ́bɔnɛnɔmɔ́ na Olóma kanɛ go gálɛda gɛsɛnɛ gɛ́hɛ́ o?» 26Aŋa ogɔ́nɔ́ɔ ba bisimbi ntɛdɛ a mbɔɔ́ ɔ́bɔ́ dogálɔ dá Póolo dɔ́ɔdɔ, gɛ́hɛ́ go ɛ́da go oyana ogɔ́nɔ́ɔ bɛhɛ́ a amɔ́: «O gaá ná ŋaáa nɛɛ́nɛ godɔ́ɔdɔ o? Mɔtɔ mɔ́ɔnyɔ ɔ ɔ́bɔnɛnɔ na Olóma.» 27Kanɛ́ ogɔ́nɔ́ɔ ba bisimbi tɔ́sɛnɔ go nco bégundidene, go úhune Póolo a amɔ́: «Ŋgoyánáamɔ́ ɛ́na mammana go ɔ́bɔnɛnɔ na Olóma.» Póolo a amɔ́: «Ɛɛ́ɛŋ.» 28Ogɔ́nɔ́ɔ ba bisimbi tɔ́sɛnɔ a amɔ́: «Yɔmɔ́ɔ mmba soáa gɛca gá muinyí goŋaá ŋgɔ́bɔnɛnɔ na Olóma.» Póolo a amɔ́: «Yɔmɔ́ɔ, ndɛ́ ba mbíényée.» 29Hɔ́ɔ na hɔ́ɔ, bisimbi bɛ́ɛbɛ bɛ́ mbaá lɔmɔ́ goŋaá bɛ́ mo gide na mobágɔ go dómba go bɔ́gɔ́gɛdɔ. Ogɔ́nɔ́ɔ ba bisimbi tɔ́sɛnɔ moatɛ́ go gɔ́lɔ bofoá aŋa a mbaá ncó go íyime a amɔ́ Póolo mɔ́ɔnyɔ, mɔ́ɔ ogɔ́nɔ́ɔ a mbaá fáá bogaaga bá go mo góda iŋgolí na magala a lɛ́ moɔnɔ́ ba Olóma. 30Ogɔ́nɔ́ɔ ba bisimbi tɔ́sɛnɔ a mba lɛ́ a lɛ́galɛga go íyime ɛkádɛ moatɛ́ gɛ́ɛgɛ Beyúdene bá mbaá lɔmɔ́ bá sɔ́mɛnɔnɔ Póolo. Kɔ́ɔ aŋa gó mbaá bélíe, bá báa lɛ gó mo fulune iŋgolí, a báa fáá bogaaga naá bagɔ́nɔ́ɔ bá bedúmbí bɛbáágá naá Asaŋa na Nɛgála Nɛgɔ́nɔ́ goŋaá bá bábándɛgɛna, go díliminye Póolo naá busío bábɔ́ go kálɔ́.
Currently Selected:
Meŋiigíe 22: YAS
Highlight
Copy
Compare
Share
Want to have your highlights saved across all your devices? Sign up or sign in
