Meŋiigíe 21
21
Póolo ɛ ɛ́dá naá Yolósalɛmɛ
1Aŋa dɛ mbaá ádógáná nabɔ́, gɛ́cɔ́ go bólɛga naá sitíme, dɛ bɛ́ɛ́ ɛ́dá naá Koso; naá gobélie dɛ bɛ́ɛ́ ɛ́dá naá Lóode, dɛ lɛ́ hɔ́ɔ dɛ báá dómbá naá Pataláa. 2Dɛ báá gídé hɔ́ɔ sitíme yɛ́ɛyɛ ɛ mbaá lɔmɔ́ yɛ ɛ́dana naá Fenisíi, gɛ́cɔ́ go bólɛga kɔ́ɔ dɛ báá fídé pɛ́. 3Dɛ ná lɛ ba go bola mekúígíi na Sípele, dɛ báá gó mo dɛ́ɛna ombɔ́gɔ odádɛ́, dɛ báá dúmbényée na oŋɛndɔ yɛ́cɔ́ go go ɛ́da naá Silíi. Dɛ báá lɛ gó siise naá Tíli, hɔ́ɔ háa sitíme ɛ mbaá lɛ ba go siisie bɛbɛa bá yɛ́. 4Aŋa dɛ mbaá gídé boolímínyí hɔ́ɔ, gɛ́cɔ́ go ŋa nabɔ́ medúgú mátáanɔ na máandɛ́. Aŋa Gimmúmpúu gá Giliíli a mbaá lɔmɔ́ a bó dúfenye, bá báá lɛ gó oyana Póolo bá amɔ́ a dɛ hóámá a dɛ ɛ́dá naá Yolósalɛmɛ. 5Kanɛ́ aŋa medúgú má mátáanɔ na máandɛ́ mɔ́ɔmɔ má mbaá maná, gɛ́cɔ́ go ɛ́da akɛ́ nɔ́ɔnɔ na oŋɛndɔ yɛ́cɔ́ naá busío. Boolímínyí bɔ́ɔbɔ biimée, na bakɔ́dɔ bábɔ́ kɛ́, na baaná bábɔ́, go ɛ́da có díligene naá mehéme má tɛ́sɔnɔ. Gɛ́cɔ́ go kunce enúu go cí naá cɔ́lɔ ya máŋɛ́, dɛ báá bósógólónyóo Asaŋa. 6Aŋa dɛ mbaá bédíígénínyée, gɛ́cɔ́ go ádogana nabɔ́, dɛ báá bólɛ́gá naá sitíme, bɔ́ɔ bá báá gundé.
7Dɛ á maná oŋɛndɔ yɛ́cɔ́ naá máŋɛ́ go go fadɛgɛna naá Tíli, go go ɛ́da dɛ́lɛmɛna naá Petoleméyise, hɔ́ɔ gɛ́cɔ́ go bédíigie boolímínyí, dɛ báá ŋaáa nabɔ́ budúgú búmmue. 8Anáa ɛyɛ́nɛ́ɛ, gɛ́cɔ́ go fadɛgɛna dɛ bɛ́ɛ́ ɛ́dá naá Sɛsalɛ́ɛ. Hɔ́ɔ dɛ bíí íŋéné naá nnyaŋá ya Fílibi, uŋguyí Gɛnɔ́gɔ́ gá Cɔ́mɔ ya Asaŋa, dɛ báá bɛ́dɛ́mánáa hɔ́ɔ. A mba lɛ́ ummue mɔ́ɔnyɔ naá batɔ bátáanɔ na báandɛ́ báaba bá mbaá bó iyídé naá Yolósalɛmɛ. 9A mba lɛ́ a bɛanana bimmúkúkúu bá babóla bínni bɛ́ɛbɛ bɛ́ mbaá lɔmɔ́ bɛ́ dúmbenye nogálɔ ná Asaŋa. 10Dɛ mba ŋá dɛ báá go gɛ́ga hɔ́ɔ gɛca gá medúgú, mbúsí mmue, ufíno yɛ́hɛ́ Egébusu, go ɛ́da fadɛgɛna naá Yudée. 11Gɛ́hɛ́ go nco có huenye, go gɔ́lɔ kandáa ya Póolo, go bágóda bɛgɔ́ndɔ́ na ɛmbɔ́gɔ, go oyɛda a amɔ́: «Náana gɔ́ɔ Gimmúmpúu gá Giliíli o oyamɔ́: mɔtɔ mɔ́ɔnyɔ na kandáa yɛ́ɛyɛ, náana gɔ́ɔ Beyúdene bá ŋgaá mo gódáa naá Yolósalɛmɛ, bá gunde bá mo dúe go bámɛɛ́nɔ.»
12Aŋa dɛ mbɔɔ́ ɔ́bɔ́ dogálɔ dɔ́ɔdɔ, bɛɛcɔ́ɔ na boolímínyí bá Sɛsalɛ́ɛ go ɛ́da go bósógolonyo Póolo goŋaá a dɛ ɛ́dá naá Yolósalɛmɛ. 13Kanɛ́ mɔ́ɔ go gundie a amɔ́: «Ɛkádɛ́ gɛ́ lɔ́mɔ́ gá mbií, no gunde no cimbilenye bɛnamá o? Ndɛ́ mekúígíi, caá goana go goŋaá bá kóda bɛnamá, kanɛ́ tɔ́nɔ goŋaá kúe naá Yolósalɛmɛ go ufíno yá Daadáa Yésusu.»
14Aŋa a mbií inyé go có ɔ́bɛnɔ, gɛ́cɔ́ go máma dɛ amɔ́: «ŋgáa gó báŋa aŋa Daadáa a lɛ́galɛgamɔ́.»
15Aŋa dɛ mbaá ŋaáa baaná bá medúgú naá hoóma hɔ́ɔhɔ, gɛ́cɔ́ go bégedie, dɛ báa lɛ gó ɛ́da naá Yolósalɛmɛ. 16Boolímínyí bá Sɛsalɛ́ɛ go có díligene, bá bɛ́ɛ́ ɛ́dá nɛcɔ́ naá nnyaŋá ya mɔtɔ ummue ufíno yɛ́hɛ́ Mɛnasɔ́ŋɔ, mɔtɔ ba Sípele, uŋgolímínyí ba fueké. Dɛ mbaá lɔmɔ́ ba go bɛ́dɛmana hɔ́ɔ.
Póolo a á luméné na Sáakɛ
17Aŋa dɛ mbaá bolá naá Yolósalɛmɛ, boolímínyí go có gɔ́lɔ na bɛyaŋa. 18Budúgú bá gáandɛ́ɛ, Póolo go ɛ́da olɔŋɔ nɛcɔ́ naá Sáakɛ. Bafɛanɔ́ɔ bá giimbó gá boolímínyí bá mba lɛ́ bábándɛ́gɛ́náalú hɔ́ɔ. 19Aŋa Póolo a mbaá bó bédíígíe, gɛ́hɛ́ go ɛ́da go bó oyanɛna búmmue go búmmue, buimée bɔ́ɔbɔ Asaŋa a mbaá ŋanánáa gɛ́hɛ́ naá kadɛ́gadɛ́ɛ ya báaba bá lɔ́mɔ́ bá dɛ bɛ́ɛ́mbá Beyúdene. 20Aŋa bá mbaá mo bódólónyóo, gáábɔ́ go búlugenye Asaŋa. Go oyana Póolo bá amɔ́: «Ondimóní, go ɛ́nana háalá naá Yolósalɛmɛ aŋa batɔ́sɛnɔ batɔ́sɛnɔ bá Beyúdene bá lɔ́mɔ́ ágáalú odɛ́má yábɔ́ naá Yésu Kilítu: biimée bá fídene gicele na bogaaga. 21Bá lɛ́ bó oyánáalú goŋaá maamɔ́ɔ o húunenye Beyúdene báaba bɔ́ ɔyɔmɔ́ naá kadɛ́gadɛ́ɛ ya báaba bá lɔ́mɔ́ bá dɛ bɛ́ɛ́mbá Beyúdene goŋaá bí inye gicele gá Mɔ́sɛsɛ, o gɔnɔ bó oyanɛna goŋaá bá dɛ ancáa baaná bábɔ́, bá dɛ biené caŋa ya Beyúdene. 22Dɛ lɔ́mɔ́ bá go ŋa nɛɛ́nɛ go go dúfie batɔ báaba goŋaá ŋgoyáamɔ́ moánɛ ɛ dɛ báá mammana o? Mammana, bá dɛ gaá lɔbɔ́ kanɛ go ɔ́bɔ goŋaá o báá go bola. 23Ŋaáa kanɛ́ bɔ́ɔbɔ dɛ gaá ná go oyáná: Dɛ bɛanana naá kadɛ́gadɛ́ɛ yɛcɔ́ batɔ bénni báaba bá lɔ́mɔ́ fáalú Asaŋa Mefúnyi. 24Bó gɔ́lɔ́ɔmɔ́, o bɛ́ɛmba nabɔ́ naá giséégé gá gɛsogona, o gunde o soa bɛsoɛná bɛ́ɛbɛ bó úhenemú go gɛmoa gábɔ́. Nɔ́ɔnɔ gɔ́ɔ batɔ biimée bá gaá ní íyímé bá amɔ́ mammana ɛ dɛ báá hɔ́ɔ naá boóma bɔ́ɔbɔ bá bó oyanɛnamɔ́ go busío báhɔ, bí íyime bá amɔ́ maamɔ́ɔ tɔ́nɔ go ɛnda aŋa gicele gá Mɔ́sɛsɛ gɛ́ oyamɔ́. 25Kanɛ́ naá boayá bá báaba bá lɔ́mɔ́ bá dɛ bɛ́ɛ́mbá Beyúdene, báaba bá lɔ́mɔ́ ágáalú odɛ́má yábɔ́ naá Kilítusu, dɛ lɛ́ bó ɔ́ŋɛ́nɔ́ɔlú go go bó oyana bɔ́ɔbɔ dɛ á ná gódá; bɔ́bɔ́ɔ bó lɔ́mɔ́ goŋaá: bá dɛ nyáá mesugé má biséégé bá moɔcɔ, bá dɛ nyáá manɔ́ŋɔ́, bá dɛ nyáá nnyama ya kanɛ go sɛ́sɛda ukelú, bá gunde bá bébeŋe go gɛdáŋa.»
26Anáa nembeli, Póolo go gɔ́lɔ batɔ bá bénni bɔ́ɔbɔ, go ɛ́da nabɔ́ naá giséégé gá gɛsogona. Naá nnyimé ya giséégé, gɛ́hɛ́ go íŋene nabɔ́ naá Nnyaŋá ya Asaŋa go go oyɛda gɛcamɛna gɛ́ɛgɛ medúgú má gɛsogona má ná manamɔ́, nɔ́ɔnɔ gó lɛ́ aá buisí bá go íŋenene gɛbáágá go onyɔ moánɛ#21.26 O bana, go eninye na 1 Kɔl 9.20..
Beyúdene bá á gumbéné Póolo naá Nnyaŋá ya Asaŋa.
27Naá medúgú mátáanɔ na máandɛ́ má giséégé go ɛ́da go go mana, Beyúdene bá go ɛ́da go úle naá Esíi go ɛ́na Póolo naá Nnyaŋá ya Asaŋa. Gáábɔ́ go búlumunce gitúu gá batɔ, bá báá mo gumbéné, 28bá ánca bá amɔ́: «Batɔ bá Ɛ́sɛlahɛ́ɛlɛ, úlé nɔnɔ ncó no có óhiginyo. Mɔtɔ mɔ́ɔnyɔ u úlemú a húunenye batɔ hoóma hiimée, a gálagala dobɛ́ go boɛ́nɔ bá Ɛ́sɛlahɛ́ɛlɛ, dobɛ́ go gicele gá Mɔ́sɛsɛ, gɔnɔ́ dobɛ́ go Nnyaŋá ya Asaŋa yɛ́ɛyɛ. A báa lama i íŋenye batɔ báaba bá lɔ́mɔ́ bá dɛ bɛ́ɛ́mbá Beyúdene naá Nnyaŋá ya Asaŋa, a báá ágá Gimmúmpúu gá Hoóma gɛ́ɛgɛ biílo.» 29Gooya gɔ́ɔgɔ gó lɛ́ goŋaá bá mbaá ŋá bá báa go ɛ́na Tolófime, mɔtɔ ba Ɛ́fɛsɛ, olɔŋɔ na Póolo naá tɛ́sɔnɔ, bá báa lɛ gó fege goŋaá a báa mo íŋenye naá Nnyaŋá ya Asaŋa. 30Odɔ́ŋɛ́nɔ yɔ́ɔyɔ go saa tɛ́sɔnɔ iŋkimée, batɔ go ɛ́da go páca paca maayá miimée. Kɔ́ɔ bá gumbenemú Póolo, go ɛ́da bá mo tútulenye bá báá mo húmíe naá Nnyaŋá ya Asaŋa, bá báá dómbá go buigene bɛasɛ́. 31Bá gá fúmbe go óna Póolo, cɔ́mɔ go ɛ́da bolɛna ogɔ́nɔ́ɔ ba bisimbi tɔ́sɛnɔ goŋaá ologodo a báa go oba naá Yolósalɛmɛ. 32Hɔ́ɔ na hɔ́ɔ, ogɔ́nɔ́ɔ mɔ́ɔnyɔ go dómba go gɔ́lɔ bagɔ́nɔ́ɔ bá bisimbi ntɛdɛ na bisimbi bíntió, bá báá lɛ gó ɛ́da odɛ́dá anáa ologodo a mbaá lɔmɔ́. Aŋa bá mbɛɛ́ ɛ́ná ogɔ́nɔ́ɔ na bisimbi bɛ́hɛ́, gáábɔ́ go dɔmbɔ go gide Póolo. 33Ogɔ́nɔ́ɔ ba bisimbi go báyɛkɛna Póolo, go íŋene bogaaga bá go mo gumbene, bá mo góda iŋgolí na magala máandɛ́. Gɛ́hɛ́ go úhune gitúu a amɔ́: «Mɔ́ɔnyɔ moánɛ a lɔ́mɔ́ ánɛ́ɛ o? A báa ŋa ŋkádɛ o?» 34Kanɛ́, naá gitúu, bá mba lɛ́ bá ánca: báaba bá gálagala náana, báaba náana. Ogɔ́nɔ́ɔ ba bisimbi a dɛ ɔ́bɔ́ boóma bá ŋgénéméné go gɛánca gábɔ́, go íŋene bogaaga bá goŋaá bisimbi bɛ́ gɔ́lɔ Póolo bɛ́ ɛ́da nɛhɛ́ naá ɛgága hábɔ́. 35Aŋa Póolo a mbɛɛ́ ɛ́dá bola nabɔ́ naá bogólá, bisimbi bɛ́ mba háánánáa go mo bádóɛgɛna, goakɛ́ batɔ bá mba lɛ́ bá bó dídigene na bogaaga; 36bá mba lɛ́ bá bienene, bá ánca bá amɔ́: «Ŋgáa a gúe.»
Dogálɔ dá Póolo go go bɔ́bɔgɔbɔgɔ
37Aŋa bá mbaá ŋá bá bíí íŋényé Póolo naá ɛgága, gɛ́hɛ́ go oyana ogɔ́nɔ́ɔ ba bisimbi a amɔ́: «O lɛ́ ba go páa bogaaga bá go go oyana boóma o?» Ogɔ́nɔ́ɔ go mo gálɛda a amɔ́: «Asáa o gálagala nogɛlɛ́gɛ o? 38O do bósó kanɛ́ moɔnɔ́ ba Beegíbítene mɔ́ɔnyɔ a gá lɔ́mɔ́ na go ubie ologodo háalá, a bɛ́ɛ́ ɛ́dá na buúníní tɔ́sɛnɔ ínni naá giolóo gá bodɛ́agadɛ́ o?» 39Póolo go gundie a amɔ́: «Yɔmɔ́ɔ ndɔ́mɔ́ ba Beyúdene, bébíénéelú naá Tálasɛ, gɛkɔ́nɔ́nɔ́ɔ gá tɛ́sɔnɔ naá gigísi gá cí gá Silisíi, ŋgɔyɔ naá tɛ́sɔnɔ yɛ́ɛyɛ ɛ lɔ́mɔ́ na ufíno. Sɔ́kɔlɛ, páamɔ́ bogaaga, kálagala na gɛdɔŋɔ.» 40Ogɔ́nɔ́ɔ go mo fáa bogaaga. Kɔ́ɔ Póolo a dɛ́lɛmɛnamɔ́ naá bogólá, go mémie gɛdɔŋɔ na ombɔ́gɔ. Aŋa bá mbaá mámá pɔ́ɔ́, Póolo go ɛ́da go bó gálagala na nohébelée.
Currently Selected:
Meŋiigíe 21: YAS
Highlight
Copy
Compare
Share
Want to have your highlights saved across all your devices? Sign up or sign in
