2 Tɛsalonɛ́ka 3
3
Bósógólónyóomú nɔnɔ go busío bɛ́cɔ́
1Naá gosúgudinye bolimóní, bósógólónyóomú nɔnɔ go busío bɛ́cɔ́, go goŋaá nogálɔ ná Daadáa nó saa fɛaŋɔ fɛaŋɔ, gó gunde nó bɛa mbúlugie aŋa gɔ́ɔgɔ nó lɔ́mɔ́ naá bɛɛnyɔ́ɔ. 2Bósógólónyóomú nɔnɔ tɔ́nɔ Asaŋa go goŋaá a có sódio naá magálá má batɔ babɛ́ gɔnɔ́ bahándá, goakɛ́ mɔtɔ uŋkimée a dɛ olímónyóo. 3Kanɛ́ Daadáa mɔ́ɔ, a lɛ́ na pídefide; a ná nyó gíndie, a gunde a nyó beŋe go Ombɛ́#3.3 O bana, go eninye na Mot 6.13; Sáŋa 17.15.. 4Daadáa a có fáanana mbémineminie go busío bɛ́nyɔ́. Dɛ íyimene goŋaá no ŋanana boóma bɔ́ɔbɔ dɛ nyó oyanɛnamɔ́, no ná gɔnɔ dúmbenye na go bó ŋanana. 5Ŋgáa Daadáa i indenye ɛdɛ́má yɛnyɔ́ naá gɛnɔ́ɔ́nɛ́nɔ́ gá Asaŋa na naá ɛbágóɛga hɛ́ɛhɛ Kilítusu a fáananamɔ́.
6Bolimóní, dɛ á nyó lɔsɛ́nɔ́ go ufíno yá Daadáa Yésu Kilítu dɛ amɔ́: Úlúkíe nɔnɔ mekúígíi na uŋkimée mɔ́ɔnyɔ ɔ ɔyɔmɔ́ gɛbɛ́, a lɔ́mɔ́ a dɛ bienénée témbuginye yɛ́ɛyɛ dɛ mbaá nyó dúmbínyée. 7Bɛɛnyɔ́ɔ moatɛ́ moatɛ no íyimene aŋa gɔ́ɔgɔ no lɔ́mɔ́ ba go biene ɛbaná nɛ́cɔ́. Dɛ lɛ́ kanɛ go ɔyɔ gɛbɛ́ gá gɛɔyɔ naá boayá bɛ́nyɔ́. 8Dɛ lɛ́ kanɛ go ɔŋɛnɔ mɔtɔ boóma bá go nyáa; kanɛ́ dɛ mba lɛ́ dɛ yɔgɔnɔ aŋa budúgú aŋa sisíi, na gɛɔ́bɛgɔ na gɛdɔmbɔ giimée, goŋaá dɛ dɛ nóɛ́ná mɔtɔ akɛ́ ba búmmue naá bɛɛnyɔ́ɔ#3.8 O bana, go eninye na Meŋ 20.34; 1 Tes 2.9..
9Asáa gɔgɔ́ dɛ mba lɛ́ dɛ bɛanana bogaaga bá go gɛ́ndɛgɛna gióhiginyo gɛ́nyɔ́, kanɛ́ dɛ mbaá ŋaáa nɔ́ɔnɔ goŋaá dɛ nyó dúfie goŋaá no biene ɛbaná nɛ́cɔ́. 10Aŋa gɔ́ɔgɔ dɛ mbaá lɔmɔ́ naá bɛɛnyɔ́ɔ, dɛ mba nyó bébégídíné dɛ amɔ́: aáŋa mɔtɔ a dɛ lɛ́gálɛ́gáa go yɔgɔnɔ, a dɛ háánánáa tɔ́nɔ go nyáa boóma#3.10 O bana, go eninye na 1 Tes 4.11.. 11Asáa gɔgɔ́ dɛ ɔ́bɔnɔ goŋaá batɔ bá lɛ́ hɔ́ɔ naá kadɛ́gadɛ́ɛ yɛnyɔ́ báaba bɔ́ ɔyɔmɔ́ gɛbɛ́ gá gɛɔyɔ; bá dɛ ŋaáa boóma goana go bienene bɛsɛnɛ bá basɔ́gɔ́ɔ. 12Dɛ oyanɛna batɔ bɔ́ɔbɔ, dɛ bó fáanana ɛsɔ́mɔ go ufíno yá Daadáa Yésu Kilítu dɛ amɔ́: Ŋgáa bá yɔgɔnɔ naá buumbénú goŋaá bá bɛa bɔ́ɔ moatɛ́ moatɛ boóma bá go nyáa.
13Go busío bɛ́nyɔ́ bolimóní, no do yodá bɛnamá go go ŋanana besé. 14Aáŋa mɔtɔ a dɛ ŋaáa ŋgɔ́bɛnɔ na bɔ́ɔbɔ dɛ nyó oyanɛnamɔ́ naá kálata yɛ́ɛyɛ, mo bélincígínyéemú nɔnɔ, no dɔmbɔ go ɔyɔ olɔŋɔ nɛhɛ́, goŋaá a nóa odóɛ. 15No do mo gɔ́lɔ́ aŋa obɛlɔ́bɛlɔ, kanɛ́ mo sɔ́mɔ́ɔmɔ́ nɔnɔ aŋa ondimóní bɛ́nyɔ́.
Gɛfona na mbédíígí
16Ŋgáa Daadáa ba buumbénú a nyó fáa mɔ́ɔ moatɛ́ moatɛ buumbénú mbɔ́dɔ iŋkimée go bɛcamɛna biimée. Ŋgáa Daadáa a bɛ́ɛmba nɛnyɔ́ biimée. 17Yɔmɔ́ɔ Póolo ŋgaá nyó bédíígíe na ombɔ́gɔ yámɛ yá moatɛ́. Nɔ́ɔnɔ gɔ́ɔ ŋgɔ́ŋɔmɔ́ naá bakálata bámɛ biimée, goɔ́ŋɔ gámɛ gɔ́ɔgɔ. 18Ŋgáa niibo ná Daadáa bɛcɔ́ Yésu Kilítu nɛ́ bɛ́ɛmba nɛnyɔ́ biimée.
