2 Tɛsalonɛ́ka 2
2
Bɔ́ɔbɔ bó ŋgaá bádómbánáa otóotoɛ yá goncongunde gá Daadáa
1Bolimóní, naá bosɔ́mɔ bɔ́ɔbɔ bó núunemú goncogunde gá Daadáa bɛcɔ́ Yésu Kilítu gɔnɔ́ na gobábándɛgɛna gɛ́cɔ́ gɔ́ɔgɔ naá boayá bɛ́hɛ́, dɛ á nyó bébégídíné dɛ amɔ́#2.1 O bana, go eninye na 1 Tes 4.15-17.: 2no do hóámá no do bádɛ́ɛ́ná goŋaá no yímie fɛaŋɔ nciŋí yɛnyɔ́; ɛ́na akɛ́ no bɛa bofoá go cɔ́mɔ akɛ́ ɛhanɛ́ɛ: tóogio, cɔ́mɔ ya nyuudé, kálata, gɛmbɛ́ná goŋaá moóma mɔ́ɔmɔ mó ncomɔ́ go úlene naá bɛɛcɔ́ɔ, mó gunde mó oya mó amɔ́, buisí bá Daadáa bó báa go bola.
3Mɔtɔ a dɛ hóámá a dɛ nyó nenúgíe akɛ́ go pɛ́ ɛhanɛ́ɛ, goakɛ́ buisí bɔ́ɔbɔ bó do ná bóso go bola otóotoɛ yá goŋaá batɔ bí inye Asaŋa. Gɔnɔ́ abolaboasɛ, Ohándá, gɔ́ɔ mɔ́ɔ a gaá gúé, 4Obɛlɔ́bɛlɔ mɔ́ɔnyɔ a bébúlugenyemú go go dómba buimée bɔ́ɔbɔ bá dɔ́ŋɔnɔmɔ́ bá amɔ́ asaŋa na buimée bɔ́ɔbɔ batɔ bá búlugenyemú. Gó ɛ́dá súge goŋaá, a ŋgɛ ɛ́dá lukumene naá Nnyaŋá ya Asaŋa, a béfínenye a amɔ́ a lɛ́ mɔ́ɔ moatɛ́ moatɛ Asaŋa#2.4 O bana, go eninye na Déniele 11.36; Esekíele 28.2.. 5Mba lɛ́ nyó oyanɛna moóma mɔ́ɔmɔ ká lɛ́ naá bɛɛnyɔ́ɔ, no báa go bófoolio lí? 6Kanɛ́ no íyimene boóma bɔ́ɔbɔ bó gá kíkenyemú ohándá mɔ́ɔnyɔ godɔ́ɔdɔ, bó lɔ́mɔ́ goŋaá abolaboasɛ aŋa gɛcamɛna gɛ́hɛ́ gɛ́ ná háamɔ́. 7Ɛɛ́ɛŋ, bogaaga bá nnindíi bá go báaŋɛga Asaŋa, bó ná lɛ́ go yɔgɔnɔ; kanɛ́ aŋa mɔ́ɔnyɔ a mo kíkenyemú gó nco húme godɔ́ɔdɔ a ŋgaá dɔ́ŋɔ́mɛ́dá, 8Ohándá ba go báaŋɛgana Asaŋa a lɛ go maga boasɛ. Daadáa Yésusu a lɛ go mo fúugie na mefúnyi má nyuudé nɛ́hɛ́, a mo níŋiside kɔndɔ́ go cí na bogaaga bá nigúmi ná mencogunde mɛ́hɛ́. 9Aŋa gɔ́ɔgɔ Ohándá a ŋguú úlé na bogaaga bá Sátana, a ŋga ŋanánáa meŋiigíe má bogaaga mbɔ́dɔ mbɔ́dɔ, na bɛsɛɔ na muune má mbele#2.9 O bana, go eninye na Mot 24.24.. 10A ŋga ŋanánáa mbɔ́dɔ sá moóma mobɛ́ iŋkimée go go bele batɔ báaba bá béyímenyemú bɔ́ɔ moatɛ́ moatɛ. Bá ŋga yímé goakɛ́ bá lɛ́ kanɛ go lɛ́ga mammana yɛ́ɛyɛ ɛ mbaá lɔmɔ́ ya go bó sódio. 11Boóma moánɛ bɔ́ Asaŋa a bó dómanɛnamɔ́ bogaaga bá gonanoga bɔ́ɔbɔ bó bó ŋananamɔ́ go goŋaá bó olimonyo mbele. 12Gɔ́ɔ, biimée báaba bá mbií inyé go olimonyo mammana, kanɛ́ bá bɔ́ɔ́ ɔ́bɔ́ bese go go ŋanana gɛbɛ́, bá ŋga sómbá gɛsɛnɛ gábɔ́.
Gɛ́ndɛ́mɛ́da nɔnɔ naá gioliminyo
13Bolimóní bɛ́cɔ́ báaba Daadáa a maamanamɔ́, dɛ háanana go béhiigi Asaŋa bɛcamɛna biimée go busío bɛ́nyɔ́. Mammana Asaŋa a mba nyó iyídé gó dúme naá mabayɛga, goŋaá a nyó sódio na bogaaga bá Gimmúmpúu gá Giliíli mɔ́ɔnyɔ a nyó íyenyemú bimmúmpúu, gɔnɔ́ go goŋaá no oliminyo mammana. 14Go nɔ́ɔ gɔ́ɔ Asaŋa a mbaá nyó dɔ́ŋɛ́nɔ́ go Gɛnɔ́gɔ́ gá Cɔ́mɔ gɛ́ɛgɛ dɛ mbaá nyó dóógínyóo; Asaŋa a mba nyó dɔ́ŋɛ́nɔ́ goŋaá no bɛa bodáŋɔ naá nigúmi ná Daadáa bɛcɔ́ Yésu Kilítu. 15Gɔ́ɔ kanɛ́ bolimóní, gɛ́ndɛ́mɛ́dá nɔnɔ, no gumbene tɛ́ŋɛ́tɛŋɛ kúunye sɛ́ɛsɛ dɛ mbaá nyó dúmbínyée na dogálɔ dá nyuudé ɛ́na lí na kálata. 16Ŋgáa Daadáa bɛcɔ́ Yésu Kilítu mɔ́ɔ moatɛ́ moatɛ na Asaŋa Isée bɛcɔ́ mɔ́ɔnyɔ a mbaá có maamánáa, a báá gundé a báá có fáá go niibo nɛ́hɛ́, magɛ́nda má kanɛ mmanɛ́náa na gɛnɔ́gɔ́ gá mbémineminie, 17a nyó boobio ɛdɛ́má, a nyó fáa bogaaga bá go ŋanana gɔgɔ́ besé bɛcamɛna biimée naá meŋiigíe na naá dogálɔ.
