2 Píele 3
3
Akɛ́ nɛɛ́nɛ, buisí bá Daadáa bó úlene
1Begúle bámɛ, bó ná lɛ́ kálata ɛ́handɛ́ sɛ́sɛ́ɛ nnyó ɔ́ŋɛnɔmɔ́. Naá kálata iŋkimée ɛ́handɛ́ sɛ́ɛsɔ, ndɔ́mɔ́ goŋaá kɔnɔ nnyó foyona muúne goŋaá nó báá gedíe go bɛa mbééníŋínyí sá tɛ́nɛ́ɛ naá moóma mɔ́ɔmɔ no mbaá hóónáa. 2Bééníŋínyéemú nɔnɔ kanɛ́ dogálɔ dɔ́ɔdɔ bimmúmpúu bá mbúsí sá Asaŋa bɛ́ mbaá gálágáláa cóá, tɔ́nɔ na gicele gá Daadáa, gɔnɔ́ Usódí, gɛ́ɛgɛ baapótɛlɛ bá mbaá nyó békínyée. 3Íyíme manɛ́ nɔnɔ no amɔ́, naá medúgú má go súgudinye, batɔ bá ŋga bológánáa, bá ŋanana bɛbɛ́ bá moóma mbɔ́dɔ iŋkimée aŋa bá lɛ́galɛgamɔ́. Batɔ bá ndiemi bá ŋga nyó táŋɛ́ná táŋɛ́náa, 4bá gálagala bá amɔ́: Ábɔ Yésusu a dɛ mbáá dána a amɔ́ a ná nco gunde o? Kanɛ́ mɔ́ɔ móhaámɔ́ o? Biisée bɛ́cɔ́ bá mbaá go gúenene boóma bá go bénúgie aŋa cí ɛ mbaá bayɛ́gá bó do báá. 5Kanɛ́ naá gogálagala gɔ́ɔgɔ, batɔ bɔ́ɔbɔ bá bófoolonyo boóma búmmue go nɛbɛlɛbɛ́áyɛ́ goŋaá fueké fueké Asaŋa a mba gedíe mmoɛná na cí na nogálɔ nɛ́hɛ́. A báá ádóná cí na miimpo a báá gundé a báá yɛ bándɛ́gɛ́ná naá kadɛ́gadɛ́ɛ ya miimpo. 6Gɔnɔ́ na miimpo má nobólá ná púugie gɔ́ɔ Asaŋa a mbaá fúúgíe batɔ bá cóá#3.6 Go gig. 5 go ɛ́na Mabayɛga 1.6-9 go gig. 6 go ɛ́na Mabayɛga 7.11.. 7Mammana, go busío bá nogálɔ númmue eé númmue, gɔ́ɔ mmoɛná ya ínoni na cí ya ínoni mó lɔ́mɔ́ ɛŋáalú go go lɔ́kɔ naá íyuke há buisí bá go sómba bɛsɛnɛ na goyíme gá bologílógí.
8Begúle bámɛ, kanɛ́ boóma bó lɛ́ hɔ́ɔ búmmue bɔ́ɔbɔ no lɔ́mɔ́ no do háánánáa go bófoolio; bɔ́ bó lɔ́mɔ́ goŋaá naá busío bá Daadáa, budúgú búmmue bó lɛ́ aŋa nnyómá tɔ́sɛnɔ, gɔnɔ́ nnyómá tɔ́sɛnɔ sɛ́ lɛ́ aŋa budúgú búmmue#3.8 O bana, go eninye Ɛsagɔ 90.4.. 9Daadáa a dɛ gɛ́gáa go hóogio tánɔ yɛhɛ́ aŋa batɔ bóncodío bá béeniŋenyemú. Kanɛ́ a gá nyó bélimbemú goakɛ́ a dɛ lɛ́gálɛ́gáa goŋaá bóntió bá fúe. Goana ŋgáa biimée bá békikilidie ɛdɛ́má. 10Buisí bá Daadáa bó ŋgu úlé aŋa uŋgíbi u úlenemú. Buisí moánɛ, mmoɛná ɛ ŋga dómbá na gɛantá gá gigundume. Íyuke hɛ́ ŋga bigídényée moóma má mmoɛná, cí na buimée bɔ́ɔbɔ bó lɔ́mɔ́ kɔ́ɔ bó ŋga bɛgɛ́dáa#3.10 … aŋa uŋgíbi o bana, go eninye na Mot 24.43-44; Lók 12.39-40; 1 Tes 5.2Ŋgɔ́ŋɛ́ síncodío sá cóá cóá sɛ́ gídenine háalá náana: Asaŋa a ŋga bidée cí na buimée bɔ́ɔbɔ bó lɔ́mɔ́ kɔ́ɔ.. 11Aŋa bó lɔ́mɔ́ goŋaá moóma mɔ́ɔmɔ muimée mó ŋga solá, no sɛmɛganana go ɔyɔ bese, no bɛ́ɛmba báaba bɔ́ ɔ́bɛnɔnɔmɔ́ Asaŋa go boóma buimée. 12No sɛmɛganana go gɛ́gana buisí bá Asaŋa go úle, no báfáa magɛ́nda goŋaá bó bola fɛaŋɔ. Bó ŋga bɛ́ɛ́mbá buisí bɔ́ɔbɔ íyuke hɛ́ ŋgaá díéŋíe mmoɛná, moóma muimée mɔ́ɔmɔ kɔ́ɔ mó bɛgɛda púmú. 13Kanɛ́ Asaŋa a mba dáná goŋaá a ŋga gedíe gɛpáa gá mmoɛná na gɛpáa gá cí, anáa botɛ́nɛ́ɛ bó ŋgaá bɛ́ɛ́mbá. Tánɔ yɛ́ɛyɛ yɛ́ dɛ gɛ́ganamɔ́#3.13 Go ɛ́na Iseyíi 65.17; 66.22..
Gɛ́gáa nɔnɔ pɔnyɛ́ɛ
14Begúle bámɛ, aŋa no gɛ́ganamɔ́ budúgú bá ndiemi, báfáamɔ́ nɔnɔ magɛ́nda goŋaá no bɛ́ɛmba kanɛ bɛlɔgɔ naá gobola gá bɔ́, ɛdɛ́má yɛnyɔ́ ɛ bɛ́ɛmba pɔ́ɔ́ na Asaŋa. 15Íyíme nɔnɔ no amɔ́, aáŋa Daadáa a gɛ́ga go nco gunde, bo lɔ́mɔ́ go goŋaá no bɛa gisódio gɔgɔ́ aŋa ondimóní bɛcɔ́ Póolo a mbaá nyó ɔ́ŋɛ́nɔ́ na nciŋí yɛ́ɛyɛ Asaŋa a mbaá mo fáá. 16Náana gɔ́ɔ a mbɔɔ́ ɔ́ŋɔ́ɔ naá bakálata biimée anáa o oyamɔ́ masɛnɛ máama. Kanɛ́ bigísi bá ndɔlɛ bɛ́ɛbɛ naá bakálata bɛ́hɛ́, batɔ bá kanɛ nciŋí ɛ́na bá kanɛ go bámagana bá góŋona gofalona gá bɛ́, caŋa táŋɛ́ mmue aŋa bá ŋananamɔ́ na bigísi bá Ŋgɔ́ŋɛ́ bɛ́ɛbɛ bíntió. Aŋa bá ŋananamɔ́ nɔ́ɔnɔ, bɔ́ɔ moatɛ́ bá bɔ́gɔ́gɔnɔmɔ́ gosola gábɔ́.
17Kanɛ́ bɛɛnyɔ́ɔ begúle bámɛ, godɔ́ɔdɔ no á bɛáa tóogio. Go nɔ́ɔ, bébeŋéemú nɔnɔ, no do biené gɛgɔ́ndɔ́ gá babɛlɔ́bɛlɔ bá Asaŋa na biédie bábɔ́ go goŋaá no do yímíe odɛ́má yɛ́nyɔ́ yá botɛ́nɛ́ɛ. 18Kɔ́ɔ ɛ́dáná nɔnɔ naá busío no goma naá niibo na naá goíyime gá Daadáa bɛcɔ́, Uféŋí bɛcɔ́, Yésu Kilítu. Naá mɔ́ɔ, nigúmi, gó bayɛga godɔ́ɔdɔ na bɛcamɛna biimée! Aamɛnɛ.
Currently Selected:
2 Píele 3: YAS
Highlight
Share
Copy
Want to have your highlights saved across all your devices? Sign up or sign in
