1 Tɛsalonɛ́ka 3
3
1Aŋa dɛ mbaá lɔmɔ́ dɛ dɛ gɔnɔ́ hóda go gɛ́gana gɔ́ɔgɔ, gɛ́cɔ́ go bágálɛdɛna goŋaá dɛ síene bákáa naá Atɛ́nɛ#3.1 Go ɛ́na naá Meŋ 17.15-16., 2dɛ nyó dómɛna ondimóní bɛcɔ́ Timotée. A lɛ́ mɔ́ɔnyɔ dɛ yɔgɔnɔmɔ́ buelí bá Asaŋa nɛhɛ́ naá go dúmenye gá Gɛnɔ́gɔ́ gá Cɔ́mɔ gá Kilítusu. Dɛ lɔ́mɔ́ mo dómáalú goŋaá a nco nyó gúninie a gɔnɔ nyó gúluminye naá gioliminyo, 3go goŋaá mɔtɔ naá olɔŋɔ yɛ́nyɔ́ a dɛ obá bɛnamá go busío bá duséésényée dɔ́ɔdɔ dó có bolanɛnamɔ́. Bɛɛnyɔ́ɔ moatɛ́ no íyimene bese goŋaá dɛ sɛmɛganana go dómba naá dɔ́. 4Gɔ́ɔgɔ dɛ mbaá lɛ naá bɛɛnyɔ́ɔ, dɛ mba lɛ́ dɛ nyó dóoginonyo goŋaá no ŋga dómbánáa naá duséésényée, dɔ́ dɔ́dɔ́ɔ no ná lɔ́mɔ́ kɔ́ɔ, aŋa no íyimenemú nɔ́ɔ bese. 5Go busío moánɛ gɔ́ɔ, naá kanɛ gohóda gogɛ́gana gɔ́ɔgɔ, gɔ́ɔ ndɔ́mɔ́ dómáalú mɔtɔ goŋaá u úle a gɔ́lɔ cɔ́mɔ sá gioliminyo gɛ́nyɔ́. Mmba lɛ́ na bofoá bá goŋaá Agogona a nyó gogona, gɛdɔmbɔ gɛ́cɔ́ gɛ́ dɛ ɛ́ya ba go sola.
6Godɔ́ɔdɔ, Timotée mɔ́nyɔ́ɔ a gá lɔ́mɔ́ na go bola, go go nco go úle gɔ́ɔgɔ naá bɛɛnyɔ́ɔ#3.6 Go ɛ́na naá Meŋ 18.5: Póolo a mbɔ ɔ́ŋɔ́ kálata yɛ́ɛyɛ mɔ́ɔ naá Kɔlɛ́ɛntɛ.. A báá có oyánɛ́náa bɛnɔ́gɔ́ bá cɔ́mɔ go gioliminyo gɛ́nyɔ́ na gɛnɔ́ɔ́nɛ́nɔ́ gɛ́nyɔ́ a amɔ́ no gá lɛ́ no do có bófoolío, no bɛanana ncaná ya go gɔnɔ có ɛ́na, aŋa bɛɛcɔ́ɔ tɔ́nɔ dɛ bɛananamɔ́ ncaná ya go gɔnɔ nyó ɛ́na. 7Gɔ́ɔ bolimóní, naá kadɛ́gadɛ́ɛ ya mecíkílí na bɛdɔmbɔ bɛ́cɔ́ biimée, no á có gúlúmínyée go gioliminyo gɛ́nyɔ́. 8Godɔ́ɔdɔ, dɛ á gɔnɔ́ bɛa masánca go busío bá goŋaá no lɛ́ gɛ́ndɛ́ŋɛ́gɛndɛŋɛ naá Daadáa. 9Mbɔ́dɔ ya bibéhiigí ɛhanɛ́ dɛ lɔ́mɔ́ ba go fáa Asaŋa go busío bɛ́nyɔ́, go bɛyaŋa biimée bɛ́ɛbɛ dɛ bɛananamɔ́ naá busío bá Asaŋa bɛcɔ́ go busío bɛ́nyɔ́? 10Dɛ bósógolonyo kanɛ tɔmbɛ́nɔ́ɔ aŋa budúgú aŋa sisíi goŋaá dɛ bɛa pɛ́ ya go gɔnɔ nyó ɛ́na, dɛ hóogio bɔ́ɔbɔ bó gá lɔ́mɔ́ bó do bɛ́ɛ́mbá naá gioliminyo gɛ́nyɔ́.
11Ŋgáa Asaŋa, Isée bɛcɔ́ moatɛ́, na Daadáa bɛcɔ́ Yésusu bá có buunene pɛ́ ya goŋaá dɛ úle naá bɛɛnyɔ́ɔ. 12Ŋgáa Daadáa a dómba go gumie gɛnɔ́ɔ́nɛ́nɔ́ gɛ́ɛgɛ no bɛananamɔ́ bɛɛnyɔ́ɔ na bɛɛnyɔ́ɔ na batɔ biimée, gɛ́ bɛ́ɛmba naá gieninye gá gɛnɔ́ɔ́nɛ́nɔ́ gɛ́cɔ́ go busío bɛ́nyɔ́. 13Ŋgáa a gúninie kanɛ́ ɛdɛ́má yɛnyɔ́ naá bummúmpúu bá kanɛ cigí naá busío bá Asaŋa Isée bɛcɔ́, aŋa Daadáa bɛcɔ́ Yésu Kilítu a ŋgaá ncó gunde, na biimée báaba bá lɔ́mɔ́ bɛ́hɛ́. [Aamɛnɛ.]
