1 Tɛsalonɛ́ka 2
2
Póolo a dúmenye Gɛnɔ́gɔ́ gá Cɔ́mɔ naá Tesoloníke
1Bolimóní, no íyimene bese bese goŋaá go úle gɛ́cɔ́ gɔ́ɔgɔ naá bɛɛnyɔ́ɔ gó do mbáa lɛ go dugúnú. 2No íyimene tɔ́nɔ goŋaá dɛ mbɔ ɔ́bɛ́gɔ́nɔ́ɔ makɔ́nɔ́ naá tɛ́sɔnɔ ya Filípe, bá báá có sɛgáa. Akɛ́ nɔ́ɔnɔ, Asaŋa bɛcɔ́ a lɛ́ có fáalú magɛ́nda máama má háananamɔ́ goŋaá dɛ bá nyó dúménínyée Gɛnɔ́gɔ́ gá Cɔ́mɔ gɛ́hɛ́ naá kadɛ́gadɛ́ɛ ya bɛdɔmbɔ makɔ́nɔ́#2.2 Go ɛ́na naá Meŋ 16.19-24; 17.1-9.. 3Gɔ́ɔ Gɛnɔ́gɔ́ gá Cɔ́mɔ gɛ́ɛgɛ dɛ nyó dúmeninyemú gɛ́ lɛ́ kanɛ giédie, gɛ́ dɛ báá na bɛgáda bá mbééníŋínyí kɔ́ɔ, ɛ́na akɛ́ na moloolio. 4Kanɛ́ Asaŋa a lɛ́ có magáalú, a bɛ́ɛ́ ɛ́ná goŋaá dɛ lɛ́ naá odɛ́nɛ́ ya go có íŋene Gɛnɔ́gɔ́ gá Cɔ́mɔ gɛ́hɛ́ go go oya, gɛ́ moatɛ́ gɛ́ dɛ oyamɔ́, dɛ dɛ fúmbée goŋaá gásɛ́ batɔ bá có lɛ́gálɛ́gáa, kanɛ́ goana Asaŋa mɔ́ɔnyɔ i íyimenemú ɛdɛ́má yɛcɔ́. 5Mammana, no íyimene goŋaá akɛ́ go buisí, dɛ lɛ́ kanɛ go nyó oyana dogálɔ dá go nyó bɔŋɔbɔŋɔ kɔ́ɔ, ɛ́na akɛ́ go fúmbe go nyó nyɛ́ɛna. Asaŋa moatɛ́ i íyimene nɔ́ɔnɔ. 6Gɔnɔ́ akɛ́ go buisí, dɛ lɛ́ kanɛ go fúmbe goŋaá gásɛ́ batɔ bɛ́ ɛ́ ɛ́dá go có búlugenye, akɛ́ naá bɛɛnyɔ́ɔ háalá, akɛ́ hoóma hóntió. 7Gɔgɔ́ akɛ́ aŋa dɛ mbaá lɛ na bogaaga bá go ŋa nɔ́ɔ, goakɛ́ dɛ lɛ́ baapótɛlɛ bá Kilítusu. Kanɛ́ bɛɛcɔ́ɔ dɛ lɛ́ bɛ́ɛ́mbáalú naá tɛ́mádɛ́má yɛnyɔ́ na bolɛbɛlɛbɛ buimée aŋa bennyeedíi bá baaná báaba bá gɔ́lɔnɔmɔ́ gɛcamɛna go go bó dúge. 8Dɛ mba dómbáa go nyó maamana mbɔ́dɔ yɛ́ɛyɛ ɛ lɔ́mɔ́ goŋaá dɛ mba lɛ́ mekúígíi, caá goana go go nyó dúmbeninye Gɛnɔ́gɔ́ gá Cɔ́mɔ gá Asaŋa. Kanɛ́ tɔ́nɔ, go go íŋene gɛɔyɔ gɛ́cɔ́ go busío bɛ́nyɔ́, goakɛ́ no mbaá ŋá no ná lɛ́ dácɛ naá ɛdɛ́má yɛcɔ́. 9Bolimóní, no béeniŋenye bɛdɔmbɔ bɛ́cɔ́ na gɛɔ́bɛgɔ gɛ́cɔ́. Aŋa siisíi aŋa budúgú dɛ mba lɛ́ dɛ yɔgɔnɔ goŋaá dɛ dɛ bɛ́ɛ́mbá gɛnóɛ́ go busío bɛ́nyɔ́. Nɔ́ɔnɔ gɔ́ɔ dɛ mbaá nyó dúmbénínyée Gɛnɔ́gɔ́ gá Cɔ́mɔ gá Asaŋa. 10Dɛ mbɔ ɔyɔ́ɔ naá tɛ́mádɛ́má ya bɛɛnyɔ́ɔ boolímínyí kanɛ giílo, tɛ́nɛ́ɛ, kanɛ cigíi; bɛɛnyɔ́ɔ moatɛ́ no mbɛ ɛ́ná nɔ́ɔ, Asaŋa tɔ́nɔ a bɛ́ɛ́ ɛ́ná. 11No gɔnɔ go íyimene goŋaá dɛ mba lɛ́ dɛ gɔ́lɔnɔ onyɔ moánɛ naá bɛɛnyɔ́ɔ aŋa isée a lɔ́mɔ́ go baaná bɛ́hɛ́. 12Dɛ mba nyó fáánánáa ɛsɔ́mɔ, dɛ báá nyó gíndényée; dɛ báá nyó fáá ncaná ya go ɔyɔ aŋa Asaŋa a lɛ́galɛgamɔ́, mɔ́ɔ mɔ́ɔnyɔ a nyó dɔ́ŋɔnɔmɔ́ goŋaá no íŋene naá Bufuŋe bɛ́hɛ́, no dáŋaba nigúmi nɛ́hɛ́.
Póolo a ségi gioliminyo gá batɔ bá Tesoloníke
13No mbɔ ɔ́bɔ́ nogálɔ ná Asaŋa nɔ́ɔnɔ dɛ mbaá nyó dúmbínyée; no báá nó gɛ́ndɛ́gɛ́ná caá akɛ́ aŋa nogálɔ ná mɔtɔ, kanɛ́ aŋa boóma bɔ́ɔbɔ nó lɔ́mɔ́ mammana: nogálɔ ná Asaŋa, nó yɔgɔnɔ naá bɛɛnyɔ́ɔ boolímínyí. Go busío moánɛ, bɛɛcɔ́ɔ, dɛ béhiigi Asaŋa kanɛ tɔmbɛ́nɔ́ɔ. 14Bolimóní, akɛ́ naá gɛɔyɔ gɛ́nyɔ́ gɛ́ɛgɛ naá Yésu Kilítu, no bienene ambaná yá biimbó bá boolímínyí Asaŋa bɛ́ɛbɛ naá Yudée, goakɛ́ bɔ́ɔ, Beyúdene bá mba bó séésényée, godɔ́ɔdɔ, boahɔ bɛ́nyɔ́ moatɛ́ moatɛ bá báá nyó séésényée tɔ́nɔ#2.14 Go ɛ́na naá Meŋ 17.5-6.. 15Beyúdene, bɔ́ɔ bá mboó óná Daadáa Yésusu na mbúsí sá Asaŋa; bá báá có séésényée bɛɛcɔ́ɔ tɔ́nɔ#2.15 Go ɛ́na naá Meŋ 9.23,29; 13.45,50; 14.2,5,19; 17.5,13; 18.12.. Go busío moánɛ, bá dɛ fɛɛnánɛ́náa Asaŋa, bá lɛ́ babɛlɔ́bɛlɔ bá mɔtɔ uŋkimée. 16Bá có legene go goŋaá dɛ dɛ dúményée nogálɔ ná Asaŋa naá batɔ báaba bá lɔ́mɔ́ bá dɛ bɛ́ɛ́mbá Beyúdene go goŋaá Asaŋa a bó sódio. Gɛlɔgɔ gá mesúgidinye gɛ́ɛgɛ gɛ́ kanɛ́ gɛ́ ncomɔ́ hóogonyo bɛ́ɛbɛ bíncodío. Kanɛ́ naá mesúgidinye, mpímí ya Asaŋa ɛ lɛ́ bó obɛ́náalú.
Ncaná ya Póolo a amɔ́ gásɛ́ a á gɔnɔ́ go ɛ́na batɔ bá Tesoloníke
17Bolimóní, naá boayá bɛ́cɔ́, dɛ mba ádógáná nɛnyɔ́ go gɛcamɛna, kanɛ́ goana naá nnyɔ́dɔ, caá akɛ́ naá odɛ́má. Dɛ lɛ́ ágáalú bogaaga makɔ́nɔ́ goŋaá gásɛ́ dɛ á gɔnɔ́ nyó ɛ́na, goakɛ́ dɛ mba lɛ́ na ncaná moánɛ makɔ́nɔ́. 18Go busío moánɛ, dɛ mba lɛ́gálɛ́gáa go úle naá bɛɛnyɔ́ɔ, yɔmɔ́ɔ moatɛ́ moatɛ Póolo, ɛŋɛndɔ gɛca, kanɛ́ ohándá a mba lɛ́ a có legene.
19Aŋa dɛ ŋgaá bɛ́ɛ́mbá olɔŋɔ na Daadáa Yésusu naá goncogunde gɛ́hɛ́, bɛɛnyɔ́ɔ báa no ŋgaá bɛ́ɛ́mbá toodo odɛ́máa yɛcɔ́, bɛyaŋa bɛ́cɔ́, na ufíno yɛ́cɔ́. 20Ɛɛ́ɛŋ, bɛɛnyɔ́ɔ báa no lɔ́mɔ́ nigúmi nɛ́cɔ́, gɔnɔ́ bɛyaŋa bɛ́cɔ́.
