1 Sáŋa 3
3
1Ɛ́ná nɔnɔ kasɛ́á mbɔ́dɔ ya gɛnɔ́ɔ́nɛ́nɔ́ yɛ́ɛyɛ Baaba Asaŋa a mbaá có ŋaáa! Gɛnɔ́ɔ́nɛ́nɔ́ gá ndiemi gɛ́ lɛ́ ŋaáalú goŋaá bá có dɔ́ŋɔnɔ bá amɔ́ baaná bá Asaŋa#3.1 O bana, go eninye na Sáŋ 1.12.; dɛ lɛ́ mammana baaná bɛ́hɛ́. Go busío moánɛ gɔ́ɔ batɔ bá cí bá lɔ́mɔ́ bá dɛ có íyíménée, goakɛ́ bá lɛ́ kanɛ go mo lɛnca.
2Bámɛ bá odɛ́má, godɔ́ɔdɔ, dɛ lɛ́ baaná bá Asaŋa, kanɛ́ bɔ́ɔbɔ dɛ ŋgaá bɛ́ɛ́mbá bó gá lɛ́ bó do bédúfíe dalaŋanyɛ. Dɛ íyimene dɛ amɔ́, aŋa Kilítusu a ŋgaá bédúfíe cegegi, dɛ ŋga bɛ́ɛ́mbá púényí sɛ́hɛ́ goakɛ́ dɛ ŋga mo ɛ́ná aŋa a lɔ́mɔ́. 3Kɔ́ɔ uŋkimée mɔ́ɔnyɔ a ágamɔ́ toodo odɛ́máa aŋa yɛ́ɛyɛ náana naá mɔ́ɔ, a bííyienye kanɛ biílo aŋa mɔ́ɔ a lɔ́mɔ́ kanɛ biílo.
4Uŋkimée mɔ́ɔnyɔ a ŋamɔ́ gɛlɔgɔ, a á dómbá tɔ́nɔ gicele gá Asaŋa, goakɛ́ gɛlɔgɔ gɛ́ lɔ́mɔ́ gopalabɛna gá gicele gá Asaŋa. 5Kanɛ́ no íyimene bese bese no amɔ́ Kilítusu a mbu úlé go go úlie bɛlɔgɔ, mɔ́ɔ mɔ́ɔnyɔ a lɔ́mɔ́ kanɛ gɛlɔgɔ. 6Uŋkimée mɔ́ɔnyɔ a lɔ́mɔ́ báladáalú nɛhɛ́ a dɛ gɔnɔ́ ŋanana gɛlɔgɔ; uŋkimée mɔ́ɔnyɔ a ŋananamɔ́ gɛlɔgɔ, a gá báasa a dɛ mo ɛ́ná, a dɛ mo íyíménée.
7Baaná bámɛ, no do bádɛ́ɛ́nɛ́ná mɔtɔ a dɛ nyó neníe. Mɔ́ɔnyɔ a ŋananamɔ́ meŋiigíe má botɛ́nɛ́ɛ a lɛ́ gɛtɛ́nɛ́ɛ, aŋa mɔ́ɔ moatɛ́ a lɔ́mɔ́ gɛtɛ́nɛ́ɛ. 8Mɔ́ɔnyɔ ɛ ɛ́danamɔ́ naá busío a ŋanana gɛlɔgɔ a lɛ́ ba Ohándá, goakɛ́ Ohándá a lɛ́ ulogílógí gó dúme naá mabayɛga. Goúle gá Moɔnɔ́ ba Asaŋa gó mbaá lɔmɔ́ go go nco díeŋie moyogónyóo má Ohándá.
9Uŋkimée mɔ́ɔnyɔ a lɔ́mɔ́ ɛ́yáalú moɔnɔ́ ba Asaŋa, a dɛ gɔnɔ́ ŋanana gɛlɔgɔ, goakɛ́ bogaaga bá gɛɔyɔ gá Asaŋa bó lɛ́ naá mɔ́ɔ. Gɔ́ɔgɔ Asaŋa a lɔ́mɔ́ Isée, a dɛ báá ba go gɔnɔ go ɛ́dana naá busío a ŋanana gɛlɔgɔ. 10Uŋkimée mɔ́ɔnyɔ a lɔ́mɔ́ a dɛ ŋanánáa bɔ́ɔbɔ bó lɔ́mɔ́ tɛ́nɛ́ɛ, ɛ́na lí a dɛ maamánáa ondimóní, a dɛ báá ba Asaŋa; hɔ́ɔlɔ́ gɔ́ɔ bá lɛncanamɔ́ dalaŋanyɛ baaná bá Asaŋa na baaná bá Ohándá.
11Moánɛ, cɔ́mɔ yɛ́ɛyɛ no mbɔɔ́ ɔ́bɔ́ gó dúme naá mabayɛga ɛ lɔ́mɔ́ yɛ amɔ́: Ŋgáa dɛ no maamanɛna#3.11 Go ɛ́na Sáŋ 13.34.. 12Dɛ dɛ bɛ́ɛ́mbá aŋa Kéyine; a mba lɛ́ ba Ombɛ́, a bóó óná ondimóní. Kanɛ́ a mbaá mo óná goakɛ́ o? Mammana, meŋiigíe má Kéyine má mba lɛ́ gɛbɛ́, máama má ondimóní bese#3.12 Go ɛ́na Mabayɛga 4.1-8 a mba lɛ́ ba Ombɛ́ dɛ lɔ́mɔ́ bá go gɔnɔ go oyɛda dɛ amɔ́ a mba lɛ́ naá magálá má ohándá.. 13Bolimóní bámɛ, no do békúkée aáŋa batɔ bá cí yɛ́ɛyɛ bá nyó bɛlabɛla#3.13 O bana, go eninye na Lók 6.22; Sáŋ 15.18-19; 17.14.. 14Bɛɛcɔ́ɔ dɛ íyimene dɛ amɔ́ dɛ lɛ́ úlúkíelú naá nigúe, dɛ bíí íŋéné naá gɛɔyɔ. Dɛ íyimenemú nɔ́ɔ goakɛ́ dɛ maamana bondimóní bɛ́cɔ́. Mɔtɔ mɔ́ɔnyɔ a lɔ́mɔ́ a dɛ maamánɛ́náa a gá lɛ́ naá nigúe. 15Uŋkimée mɔ́ɔnyɔ a bɛlabɛlamɔ́ ondimóní a lɛ́ uŋgúníní batɔ. No gunde no íyimene no amɔ́ akɛ́ uŋgúníní batɔ ba ummue a dɛ bɛanánáa gɛɔyɔ gá kanɛ mesúge naá mɔ́ɔ. 16Dɛ íyimenemú bɔ́ɔbɔ bó lɔ́mɔ́ gɛnɔ́ɔ́nɛ́nɔ́ go náana: Yésu Kilítu a mbi íŋéné gɛɔyɔ gɛ́hɛ́ go busío bɛ́cɔ́. Kɔ́ɔ, bɛɛcɔ́ɔ tɔ́nɔ, dɛ háanana go íŋene gɛɔyɔ gɛ́cɔ́ go bondimóní bɛ́cɔ́. 17Mɔtɔ a amɔ́ a bɛa bonɔ́mɛ bá cí yɛ́ɛyɛ, a bɛ́ɛ́ ɛ́ná ondimóní a háanahana, a báá mo ɛ́lɛ́ná odɛ́má#3.17 O bana, go eninye na Bicele 15.7-8., nɛɛ́nɛ kanɛ́ a lɔ́mɔ́ ba go oyɛda a amɔ́ a maamana Asaŋa o? 18Baaná bámɛ, dɛ dɛ háánánáa go maamana bolimóní bɛ́cɔ́ goana na nyuudé ɛ́na lí na bɛlágálága. Kanɛ́ dɛ háanana go bɛa mammana ya gɛnɔ́ɔ́nɛ́nɔ́ yɛ́ɛyɛ ɛ bédúfenyemú naá meŋiigíe.
19Hɔ́ɔlɔ́ gɔ́ɔ dɛ ŋgií íyímé go goŋaá dɛ lɛ́ bá mammana. Hɔ́ɔlɔ́ gɔ́ɔ dɛ ŋgaá bɛ́ɛ́mbá na toodo odɛ́máa naá busío bá Asaŋa. 20Mammana, aáŋa odɛ́má yɛ́cɔ́ yó có goomanɛna go boóma, Asaŋa a lɛ́ gɛkɔ́nɔ́nɔ́ɔ a dómbana odɛ́má yɛ́cɔ́, i íyimene boóma buimée.
21Bámɛ bá odɛ́má, aáŋa odɛ́má yɛ́cɔ́ yó do có goománɛ́náa go boóma, dɛ oyanɛna Asaŋa bɛsɛnɛ bɛ́cɔ́ na toodo odɛ́máa; 22ɛkádɛ giimée gɛ́ɛgɛ dɛ mo ɔŋɛnɔmɔ́, a có fáanana, goakɛ́ dɛ bɛ́dɛgana bɛlɔsɛnɔ bɛ́hɛ́, dɛ ŋanana bɔ́ɔbɔ bó mo fɛɛnanɛnamɔ́. 23Kanɛ́ gɛlɔsɛnɔ gɛ́hɛ́ gɛ́ lɔ́mɔ́: dɛ háanana go ága odɛ́má yɛ́cɔ́ naá Moɔnɔ́ bɛhɛ́ Yésu Kilítu, dɛ gunde dɛ maamanɛna aŋa gɔ́ɔgɔ a mbaá có fáá gɛlɔsɛnɔ#3.23 Go ɛ́na Sáŋ 13.34; 15.12,17.. 24Uŋkimée mɔ́ɔnyɔ a bɛ́dɛganamɔ́ bɛlɔsɛnɔ bá Asaŋa a gɛ́ga báladáalú nɛhɛ́, Asaŋa tɔ́nɔ a lɛ́ nɛhɛ́. Bó lɔ́mɔ́ go Gimmúmpúu gá Giliíli mɔ́ɔnyɔ a mbaá có fáá gɔ́ɔ dɛ lɛncanamɔ́ goŋaá Asaŋa a gɛ́ga báladáalú nɛcɔ́.
Currently Selected:
1 Sáŋa 3: YAS
Highlight
Share
Copy
Want to have your highlights saved across all your devices? Sign up or sign in
