Luk 10
10
Jesus tum ghel njio-sebaa əmsaamba
1Se lu ɛybame əbnəə nɛ̂ ghan, Báàba gese chokte ghel ɛylee njio-sebaa əmsaamba, è tum ghene ɛbaa-ɛbaa ge ghene yɛ ndu ɛ yi mbiy ɛ ntɛk sejim nɛ̀ əblike wɛ əb nè shiin se yɛ jɛle ghan. 2Əb loo tume ghene di, è suuy ge: Ɛsaŋe biymen se ɛydio, ghel ɛdənene se laaye. Ghɛn lon se Bay wɛ ba ɛylem ge əb tinse ghel ɛydən ɛsaŋ nə wen. 3Ghɛn ndu! Ghɛne lóò ndu, ghɛn yɛ ke ge mɛ tume ghɛn ka ghon ə bvəyse njiɛ ɛ məme baase. 4Ghɛne lóo ndu ghàà ghɛn liɛ əbkaa, kene kebam, kene guose ɛvəə selee, è gese yɛ ke se yɛ teem chakte ghel. 5Naa ghááy wɛ ghɛn nduun è yɛ lii ɛ ndaa, ghɛn kɛɛte suuy ge: Ɛybose yɛ lu ɛ ndaa fɛn! 6Yɛ lu nɛ wel əmnyiaŋ lu ɛ ndaa fo, é ɛybose me yɛ lu se wen; yɛ lu nɛ əb wiy, é ɛybose tene kase gwiy se ghɛn. 7Ghɛne ndu è bɛ̀ɛ̀ naa ɛ ndaa ɛykɛ, ghɛn yɛ lu se yɛ chii kɛn ɛ ndaa nɛ̂ fo. Ɛ́ fó naa ghɛ se ghɛn, ghɛn yɛ yiɛ gese nəə, bek ge wel əbfɛlen lu se yɛ ki əblaake wen. Ghàà ghɛn nɛ̂y yɛ diaŋtene ndaase. 8Naa ɛ leghɛ wɛ ghɛn liin ɛ ntɛk, ɛ́ fiisen ghɛn, ghɛn yɛ yiɛ naa ghɛ kɛ ɛ́ foon ge ghɛn yíɛ́, 9è yɛ chuke ghel ɛyafkene ghɛ́ ntɛk foo, suuye se ghene ge: Ɛysak ə Feyine shi kɛn ɛ keghoo. 10Yɛ lu wɛ ghɛn lii ɛ ntɛk ɛ́ jia fiisen ghɛn, ghɛn yɛ chia, jaŋe nduu ɛ jiise fo ge: 11Chèmè lu kebvəle kɛ́ ghɛne ntɛke kɛ ke koon se ghɛs ə ɛvəə, fene ghɛse tɛte, é ke ndu se ghɛn. Dî, nɛ ghɛn keele kine ge ɛysak ə Feyine shi kɛn ɛ keghoo. 12Jesus suuy dì, è suuy se ghene ge: Mɛ suuy se ghɛn ge, kɛ́ ɛylak Sodome yî yɛ ghoblen ɛ kechii nsak chia kɛ́ ntɛk foo.
Lon se ntɛk sɛ ghele tene báà fo ɛytem se Feyine
(Mat 11.20-24)
13Lòn se ghɛne ghɛ́ Cholazin! Lòn se ghɛne ghɛ́ Betsaida! Mɛ nè bóy se nɛɛy əbnəə əbchio əbyúméné wɛ mɛ nè nɛɛyen ɛ ghɛne ntɛk nɛ lu ɛ Taya ghene Sidon, fene ghele ghɛ́ ghoo nè yimen mak əbaame è gese fək kebvəl ɛkiy se ghene ɛyghun naa se nguk se din ge ghene lu nɛ ɛ́ kubsen tetem ə ghen è fiile se ɛybame mbee. 14Dî nɛ ke ko yî yɛ ghoblen se ghele Taya ghene ghele Sidone ɛ kechii nsak chia kɛne. 15Se ghɛne ghɛ́ Kabanaume, ɛ́ lɛ náà lose ghɛn, é ghɛn chin naa ɛyyio-a? Ɛngaŋ. Feyine náà səkse ghɛn səksen è lɛm kɛn ɛ ɛybee.
16Jesus me gese suuy se ghɛ́ ntum ghii ge: Naa ndɛ wɛ əb yionen se ghɛn yionen nɛ lu se mɛ, nɛ naa ndɛ wɛ əb tunsen ghɛn tunse nɛ lu mɛ. Dî nɛ naa ndɛ wɛ əb tunsen mɛ tunse nɛ lu Feyin wɛ əb nè tumen mɛ.
Ghel ghɛ njio-sebaa əmsaamba ghii kase gwiy
17Ghel ghɛ njio-sebaa əmsaamba ghi ndu è kase gwiy nɛ̀ ɛysaŋlee è suuy ge: Báàba, chèmè lu tefim fene te ko nè lô se yionen se ghɛs ɛ əbliy wɛ ghɛs nè kwanten ghene əbtaawe ɛyghel nə wɛ̀.
18Jesus bente è suuy ge: Ɛɛn, mɛ ne lô yɛn naa ka Satan lòòn ɛ ɛyyio è fɛy ɛ ntiɛ ka ɛyghuu ɛyliakene. 19Yɛn-a: Mɛ fomen əbtaawe se ghɛn wɛ lòó ghɛn jɛl è chia ɛ ketuu yiose ghene ngámse, é ngɛk jia gan se ghɛn, è gese fo kediak ge ghɛn taa è chia wel əbbaanese nə ghɛn. 20Dî nɛ ghàà ghɛn yɛ saŋle ge əbyioy ɛyfime yionen se ghɛn. Ghɛn yɛ saŋle nɛ lu ka ɛ́ nyakenmen teghel ə tɛn se ŋwaale ɛyyio.
Jesus bente ghel ghɛ njio-sebaa əmsaamba
(Mat 11.25-27; 13.16-17)
21Kɛn ɛ əbliy fo, Keyioy Kelanene lun se Jesus ɛytem əb se saŋlee, è suuy ge: Ba ə wom, wɛ̀ lu Ba ɛyyio ghene ntiɛ. Mɛ bɛ́ɛ̀lè wɛ̀ bek ge wɛ̀ letemen əbluuy se ghel ghɛ ɛ́ dinen ɛytof, ghii dii ghɛ́ yiɛkenmen, è din nɛ lu se ghon ɛtɛlɛɛ. Ɛɛne Ba ə wom, ke lu kɛn ka wɛ̀ nè koŋen ge ke yɛ lu. 22Əb gese suuy se ghene ge: Ba ə wom viimen əbnəə əbjim ɛ mɛ keghoo. Wele báà se lu wɛ əb keen wel wɛ luun wán, buu kɛn Bay; nɛ̀ wele báà se lu wɛ əb keen Bay buu kɛn wán, gese nɛ̀ ghel ghɛ wan choken se dine Bay se ghene. 23Jesus me benle, è chəmten se ghon-ɛyfɛl nə wene ge: Ke lu kejuŋ se ghii dii ghɛ ɛ́ yɛ́nen əbnəə wɛ ghɛne yɛ́nen. 24Mɛ suuy se ghɛn ge: Ghele ntum nə Feyine se ɛydio ghene tefone nè ki shii se yɛn əbnəə wɛ ghɛne yɛ́nen, dî è jia yɛn, gese shii se yio əbnəə wɛ ghɛne yion, dî è jia yio.
Ngan yɛ kum wele Samalia əbjuŋ
25Nè lu ɛ kechii kelee wel əblee wɛ əb nè dinten tesak ə Moses me kokte è gwiy ge yi mom Jesus, è bif se wen ge: Ndinte, lòó mɛ nɛɛy ghɛ se geese náà se kiile ɛyboy?
26Jesus fise ge: Ɛ́ nyak gee ghɛ ɛ ŋwaale-Feyin? Wɛ̀ jaŋe wɛ̀ yio gee ghɛ?
27Əb fise ge: Ɛ́ nyak ge: “Wɛ̀ lu se yɛ koŋe Báàba Feyin nɛ̀ ɛytem ə yiɛ ɛjime, nɛ̀ keyioy kiɛ kejime, nɛ̀ kediak ə kiɛ kejime gese nɛ̀ ɛykwaate yiɛ ɛyjime, è gese yɛ koŋe wel wɛ əb baksen se wɛ̀ kɛn ghɛɛ-ghɛɛ ka wɛ̀ koŋen ngeŋ ə yiɛ.”
28Jesus me suuy ge: Wɛ̀ fise ɛ titiy, yɛ nɛɛye yì dì, é wɛ̀ náà me kiile ɛyboy.
29Wel vi me se kɛŋe se din ge ɛybif ə yii kè lu ɛ titiy, è gese bif se Jesus ge: Wel wɛ əb báksen se mɛ lu ndɛ?
30Se fise ɛybif yin, Jesus maa ngan yin ge: Wel əblee nè lô lòò ɛ Jolesalem, è se chio ɛ Jeliko, è too ɛchoŋ ɛghoo. Ghene faŋ wen, è tɛl è sayte ndəyse, è fii əbfua ə wen naa əbjim, è nyiŋ, è vəse wen se fo nɛ əb se kuo. 31Ke me gan ge wele ntaŋle əblee wɛ̂ ndaa-ɛykokse Feyin yɛ chio ɛ jii fo. Ka əb chion dî ɛ leghɛ è yɛn wen, è me diaŋsen jii è chia-chian. 32Wel əbfɛlen wɛ ndaa-ɛykokse əblee gese se chia fo sɛy, è chin fo è yɛn wen, è ko diaŋsen jii è chia-chian. 33Dî wele Samalia ko gese se chia ɛ jii fo sɛ̂y, è tum ɛ wel vi ketuu, ɛysene koo wen naa se ŋaŋ. 34Əb chia, è suu əblɛɛme wel vi, è vii kefuu se ten, è kul, è kokse wen se wene ketuu nyam, è ndu nɛ̀ wen se kebɛɛle, è se toknen so. 35Əbtəke yio, əb loo lòò, è fəyse ɛshiɛ əbkaa kekas ɛbaa, è fo se wel wɛ əb nè fɛ́len ɛ kebɛɛle fo, è suuy se wen ge: Yɛɛ toknen nɛ̀ wel vin, wɛ̀ chèmè yese, è lɛy əbkaa ɛ wene ketuu nɛ əb chia vine, mɛ nɛ̂y kase gwiy wɛ̀ suuy, é mɛ seese se wɛ̀.
36Jesus mɛyse ngan yi, è me bif se wel vi ge: Ɛ məme ghel ghɛ ɛtal ghin, wɛ̀ kwaate ge wel wɛ̀ əb nè dinen ge yi lu wel wɛ əb baksen se wel wɛ ɛchoŋe nè lɛmsen lu ndɛ?
37Əb fise ge: Lu wel wɛ əb nè dinen ɛykoosen ɛysen. Jesus me suuy se wen ge: Ndu è yɛ nɛɛye sɛ̂y dì.
Jesus shik ɛyghan se Malta ghene Mɛɛle
38Jesus ghene ghon-ɛyfɛl nə wene lòò, è se nduu, è chin ɛ ntɛk ɛylee, əbvii əblee nɛ ɛ́ toŋte ge Malta fiisen ghene ɛ wen ə ndaa. 39Əb nè lu ghene wan-no ə wen əblee nɛ ɛ́ toŋte ge Mɛɛle. Mɛɛle nɛ̂ vin me diom ɛ Báàba ɛyshiɛ è se yiote əbnəə wɛ əb nè dinten. 40Ke ghak Malta ka əb luŋen nɛ̀ ntal wen nyiŋ, əb chia è bif se Báàba ge: Wɛ̀ bene wiy se nkan ge wan-no ə wom vəse ge mɛ yɛ luŋ mɛ nyiŋ-a? Lam é əb gwiy è yɛ giamtene mɛ.
41Báàba fise ge: Malta! Malta! Wɛ̀ luŋe gese fofe nɛ̀ əbnəə naa se ɛydio, 42nɛ kenəə kɛ ke luun ɛ shii lu kɛn kemok. Mɛɛle chokmen keghene, nɛ lòó wel jia yî fii se wen.
Currently Selected:
Luk 10: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012