Luk 9
9
Jesus tum ghɛ́ ntume ghɛ njio-sebaa ɛyvəm
(Mat 10.5-15; Mak 6.7-13)
1Jesus nɛy tooy ghɛ́ ntum nə wen ghɛ njio-sebaa ɛyvəm, è fo kediak ghene əbtaawe se ghene ge ghene yɛ jume tefim, gese chuke teyaf, 2è me tum ghene ge, ghene ndu è yɛ fekte kenəə kɛ kum ɛysak ə Feyin, è gese yɛ chuke ghel ɛyafkene. 3Əb nè lô suuy se ghene ge: Ghɛne loo ndu ɛyjɛl yin ghàà wel liɛ kefaa ka mbàŋ, kene kebam, kene əbfua-əbyíɛ́ne, kene əbkaa, chèmè nɛ̀ ndəy selee. 4Ghɛne lii naa ɛ ndaa ɛykɛ, ghɛn yɛ chii kɛn ɛ ten se chin ka ghɛne nɛ̂y lòò se ntɛk fo. 5Yɛ lu ge ghele jia fiisen ghɛn naa ghááy, ghɛne loo lòò se ntɛk fo, ghɛn tɛte kebvəl se ghɛn ə ɛvəə, ka əbchəyte se din ge kenəə kɛ ghene nɛɛyen báà jof. 6Ghene me lòò è se lii nduu ntɛk nɛ̀ ntɛk, fekte nduu nɛ̀ sakghɛ əbjuŋ gese chuke ghel ɛyafkene əblik əbjim.
Helod se fane ge Joon kasemen loole se ɛykuo
(Mat 14.1-12; Mak 6.14-29)
7Helod wɛ əb nè saken keleŋe Galilee, yio əbnəə əbjim wɛ əb nè chian, ə́b se foo ngɛk se wen, bek ge ghel ɛlee nè suuye ge: Ɛ́ kasemen lose Joon wɛ əb nè fóon moo se ghele, se ɛykuo. 8Nɛ ghel ɛlee suuye ge lu Elija ka əb kasen è gwiy, nɛ ɛlee suuy kɛ́ ghene ge lu wele ntum nə Feyine wɛ̂ əmməən əblee ka əb kasen è loole se ɛykuo. 9Helod me se kante ge: Mɛ nè tenmen ketuu ə Joon, vin se lu ndɛ wɛ mɛ yion əbnəə vin kum wen. Əb kante dì è me vii viin ge yi ko lu se yɛne wen.
Jesus yíɛ́se ngose wel
(Mat 14.13-21; Mak 6.30-44; Jn 6.1-14)
10Ghɛ́ ntum nə Jesus ghii nɛy kase se fiile ɛ leghɛ, è me fiɛl se wen ka ɛyjɛl ə ghene nè luun naa ɛyjim. Jesus me liɛ ghene, ghene ghene bak əbghun, è fəy è ndu ɛ ntɛk ɛyghaken ɛylee nɛ ɛ́ toŋte ge, Betsaida. 11Ghele keele, è me jumte ndu nɛ̀ wen. Əb fiisen ghene, è se fekte kenəə kɛ kum ɛysak ə Feyin se ghene, è gese se chuke ghel ghɛ ɛ́ nè shiin nchuk.
12Əbtəke loo jiɛ, ghɛ́ ntum ghɛ njio-sebaa ɛyvəm ghii kokte è gwiy è suuy se wen ge: Lam é ghele giabsen è ndu se ntɛke sɛ keleŋ fɛne gese nɛ̀ se teghaŋ əbkwak, ka lòó ghene kiile əblik əbchiine gese nɛ̀ əbfua-əbyíɛ́ne bek ge ghɛsen lu fɛn ɛ əbkwak.
13Jesus suuy se ghene ge: Ghɛn fó əbfua-əbyíɛ́ne se ghene se ghɛne ngeŋ. Ghene me suuy ge: Ghɛs ki kɛn ntukse keban setan nɛ̀ səə sebaa. Ke loo lu dì é ke yɛ din ge ghɛse ndu è yun əbfua-əbyíɛ́ne se ngose wel yin ɛ jii ɛykɛ? 14Ghene nè suuye dì bek ge, kɛn ɛluumen nè lu fo ka nkam setan di. Jesus me suuy se ghon-ɛyfɛl nə wene ge: Ghɛn suuy é ghene diom è ndu wel əmmtan-əmmtan.
15Ghene suuy dì, wel əbjim me diom. 16Jesus liɛ ntukse keban sɛ setan shii gese nɛ̀ səə sɛ se baa shii è kiy ɛyyio è bɛ̀ɛ̀lè Feyin è bɛkte, è me fo se ghon-ɛyfɛl nə wene ge ghene gia se ghele. 17Ghel ɛjime yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, əb lun nkaase njio-sebaa ɛyvəm.
Bita Suuy ge Jesus lu Mboyse
(Mat 16.13-19; Mak 8.27-29)
18Se lu ka Jesus nè jemen wen nyiŋ ɛ kechii kelee nɛ lu kɛn ghene ghon-ɛyfɛl nə wene, əb bif se ghene ge: Ghele suuy ge mɛ lu ndɛ?
19Ghene fise ge: Ghel ɛlee suuye ge wɛ̀ lu Joon Nfoo Moo, nɛ ɛlee suuye ge wɛ̀ lu Elija, nɛ ɛlee ko suuy ge wɛ̀ lu wele ntum nə Feyine wɛ əmməən ka əb kasen è loole se ɛykuo.
20Əb me bif ge: Ghɛne suuye kɛne ge mɛ lu ndɛ? Bita fise ge: Wɛ̀ lu Vi wɛ Feyine nè Yiosen. 21Jesus chiise se ghene ge, ghàà wel yi suuy kenəə ten se wel.
Jesus din Ngɛk yɛ Əb nɛ̂y yɛn
(Mat 16.20-28; Mak 8.34–9.1)
22Əb ko gese suuy ge: Wanwel tiy se yɛne ngɛk ɛ jiise se ɛydio, é chɛɛse ghene ghele mbiye se ghɛ́ ntaŋlee gese nɛ̀ ndintese tesake tunse wen, ɛ́ yúy wen, é əbchii lun əbtal, é əb loole se ɛykuo.
23Əb me suuy se ghel ɛjime ghɛ ɛ́ nè luun fo ge: Naa ndɛ wɛ əb kɛŋen se yɛ jumte ɛybam ə yom lu se yɛne ngeŋ ə wen ka kefaa lólò, se bɛɛy kentam#9.23 Bɛɛy kentam: Se bɛɛy kentam lu se yɛ yɛne ngɛk yɛ Jesus nè yɛnen è kuo. ə wen se yɛ jɛl so ɛ mɛ ɛybam əbchii əbjim. 24Bek ge naa ndɛ wɛ əb kɛŋen se babte ɛychii ə wene náà lɛy ɛyghene, nɛ naa ndɛ wɛ əb lɛyen ɛychii ə wen bek mɛ lu nɛ əb náà yɛ ki ɛychii. 25Əb me gese bif ge: Wel lɛ chèmè kè ki mbi yin ɛyjim, è maay ngeŋ ə wen è lɛy se lólò, é njuŋe ten yɛ lu ghɛ se wen. 26Naa ndɛ wɛ əb ghuumen mɛ gese ghuumen giɛ ə som lu vi di wɛ Wanwele yî ghuumen se wen ɛ əbliy wɛ əb gwiy ɛ wen əbghaake wɛ luun wɛ ba ə wen ghene nchiyse wene se lanene. 27Dî nɛ mɛ suuy əbluuy se ghɛn ge, ghel ɛlee tiy ɛ ghɛn ɛ məm fɛn nɛ ɛ́ jia nɛ̂y kuo nɛ ɛ́ báà yɛn ɛysak ə Feyin.
Əbghun ə Jesuse kubsen ɛyshiɛ nə ghon-ɛyfɛl nə wen ɛlee
(Mat 17.1-8; Mak 9.2-8)
28Se lu ɛ ɛybam əbwɛy əbful ka Jesus suuyen əbnəə vin, əb me liɛ Bita nɛ̀ Joon, gese nɛ̀ Jɛms, ghene ghene kok ɛ kfən se jem. 29Se lu ka Jesus nè jemen, ɛykek ə wene kubsen, ndəyse wene kubsen è se njante ka ɛyghuu ɛyliakene. 30Ɛ́ loo chin ghele se suŋnen ghene ghe Jesus ɛbaa, nɛ lu Moses ghene Elija. 31Ghene nè yɛnsen fo nɛ̀ əbghaake wɛ ɛyyio è se suŋnen se Jesus kum ɛykuo yɛ əb nɛ̂y kuo ɛ Jolesalem, é kenəə kɛ Feyine nè lɛmen kwɛn. 32Nè lu dî nɛ Bita ghene ngoo wen chiɛme chiɛmen nɛ̀ mbuunese. Ghene se kamkee è yɛn Jesus ɛ wen əbghaake, nɛ ghel ghii ɛbaa tiy ɛ wen ɛybee. 33Ghel ghii ɛbaa se lòò ɛ leghɛ, Bita suuy se Jesus ge: Babɛy, ke lu kejuŋ ka ghɛs luun fɛn. Lame é ghɛs baklé əmtaa əmtal, viɛ nɛ̀ wɛ Moses gese nɛ̀ wɛ Elija, suuye dì, chèmè ke wiy kenəə kɛ əb suuyen.
34Ka əb suŋnen dì ɛ leghɛ, mbàkse gvəm è chite ghene; se chite dì ghe Bita me se fane. 35Giɛ ɛylee fəy gwiy ɛ məme mbàkse fo ge: Vin lu wan wom wɛ mɛ chokenmen, ghɛn yɛ yio se wen.
36Ka giɛ yi ghusen ɛ leghɛ, ghene yɛn nɛ Jesus shi kɛn wen nyiŋ, è me gok ɛ chichi è jia nɛ̂y fiɛl kenəə kɛ ghene nè yɛ́nen nɛ̂ kin naa se nkan ɛ əmchii fo.
Jesus Jum Ɛyfim se Wándɛ Əbghun
(Mat 17.14-18; Mak 9.14-27)
37Nɛy se lu ka əbtəke yionmen, ghene chio se kfən ɛ leghɛ, ngose wel gwiy se yɛne Jesus. 38Wel əblee ɛ məm nə ghel ghii toŋ ge: Ndinte, mɛ beŋte wɛ̀ ge wɛ̀ giamten wán ə wom vin bek ge lu kɛn mɛy mɛy wan əbluumen nə mɛ lɛ. 39Kefaa lóó ke mak wen, əb toŋ ɛ giɛ ɛytaa, è yɛ tak, nɛ kefəfəye fəye əbchio. Ke báà se foo jii se wen se nkan, me mɛyse wen kɛn mɛysen. 40Mɛ kè beŋtemen ghon-ɛyfɛl nə wɛ̀ ge ghene jum, ghene mom lolo.
41Jesus me suuy ge: Ghɛne ghɛ́ ntem fɛne báà fo ɛytem se Feyine, gese nduu nɛ̀ ɛybame. Ghɛne kɛŋe ge mɛ nɛ̂y yɛ lu ghɛsen se chin lɛɛy nɛ ghɛn geese beeme? Əb suuy dì è me suuy se ba ə wan vi ge: Gwiye nɛ̀ wan ə viɛ vi fɛn.
42Ɛyfim yi ko me liɛ wán nɛ əb bo gwiye gwiyen è təm se ntiɛ, əb se take. Jesus me wam keyioy ɛyfime yɛ tene ke fəy se wan nɛ̂ vine əbghun, əb bonen, əb kase fo wen se ba ə wen. 43Ghel ɛjime yɛn kembɛɛ əbtaawe nə Feyine, əbchio yum ghene.
Jesus gese din ɛynkii ɛykuo yɛ əb nɛ̂y kuo
(Mat 17.22-23; Mak 9.30-32)
Se lu nɛ ghele bo bɛɛy nɛ̀ əbchíò əbyúméné kum əbnəə mbɛm əbjim wɛ Jesus nè nɛɛyen, əb suuy se ghon-ɛyfɛl nə wene ge: 44Ghɛn loote yiote kenəə kɛ mɛ suuy se ghɛn. Ɛ́ nɛ̂y din Wanwel é ghele koo. 45Ka Jesus suuyen dî ghene jia keele kenəə kɛ əb suuy, ka Feyine buksen fɛ ghene keele, ghene me se fane se chèmè se bif ge əb sɛ suuye gee ghɛ-a?
Chia ndɛ ghel ɛjim
(Mat 18.1-5; Mak 9.33-37)
46Ghon-ɛyfɛl nə Jesuse me se beke ge sɛ lòó yɛ lu ndɛ wel əbghaken ɛ ghene məm-a? 47Jesus keele kenəə kɛ ghene kwaaten ɛ ghen ə tetem, è liɛ wán əbtɛlɛ è gwiy è tiyse ɛ wen ɛybee, 48è me suuy se ghene ge: Naa ndɛ wɛ əb fiisen wán vin bek mɛ lu nɛ əb fiisen mɛ, nɛ̀ naa ndɛ wɛ əb fiisen mɛ lu nɛ əb fiisen wel wɛ əb nè tumen mɛ. Bek ge, naa ndɛ wɛ əb layten è ləysen ɛ ghɛne məm, lu wen wɛ əb ngaŋten è chia.
49Joon me suuy ge: Ndinte, ghɛs ne lô yɛn wel nɛ əb jume ɛyfim nɛ̀ əbtaawe ɛyghel nə wɛ̀, è se suuy ge ghàà əb se mom bek ge əb ne wiy wele ngoo nə ghɛsen.
50Jesus suuy se ghene ge: Ghàà ghɛn yɛ tun bek ge, wel wɛ əb baken wiy ghɛn lu nɛ əb toke ghɛn token.
Ghele ntɛke Samalia tɛn se fiisene Jesus
51Se lu ka əbliye nè se kwɛnen ka Jesuse kase è kok se ɛyyio, əb me lɛm ge yi ko ndu se Jolesalem, è me lòò. 52Əb nè lô tum ghel ge ɛ́ yɛ ndu se mbiy, ghene ndu è lii se ntɛk ɛylee ɛ Samalia è se siyse əbnəə se wen ka əb lóó gwiy. 53Dî ghele ghɛ́ ntɛk foo jia beeme se fiisene wen, bek ge əb nè gwiye se chia se ndu nɛ lu ɛ Jolesalem. 54Ghon-ɛyfɛl nə wen ghɛ Jɛms ghene Joon yɛn kenəə nɛ̂ kin è bif ge: Báàba, lɛ lòó ghɛs suuy é Feyine tinse əbvəs é əb nyok ghel ghin-a?
55Jesus sɛ̂y benle è kɛy ghene kɛyen. 56Ghene ghene me lòò è ndu ɛ ntɛk ɛychin.
Ngɛk se yɛ jumte ɛybam ə Jesus
(Mat 8.19-22)
57Se lu ka ghene nè jɛ́len nduun ɛ jii, əbluumen əblee gwiy è suuy se Jesus ge: Mɛ yɛ jumte wɛ̀ naa ghááy ghaa wɛ̀ nduun.
58Əb fise ge: Ndumse ki əbbuk ə ghen, nɛ əmnənme ki ndaase ə ghen, dî nɛ Wanwel ki wiy kelik kɛ əb nyiŋse ketuu ə wen ɛ ten è zəəle.
59Jesus suuy se əblee ge: Gwiye é lòò. Əbluumen ten fise ge: Báàba, vəse é mɛ kase fiile è ndu, è náà gvəəme ba ə wom se geese gwiy.
60Jesus fise ge: Vəse é ghii dii ghɛ ɛ́ lɛyenmen yɛ gvəəme ghel ə ghen ghɛ ɛ́ kuon, é kiɛ yɛ lu ge wɛ̀ ndu è yɛ fekte sakghɛ əbjuŋ kum ɛysak ə Feyin.
61Əblee ko gese suuy ge: Mɛ yɛ jumte gwiy nɛ̀ wɛ̀ Báàba, dî nɛ wɛ̀ vəse é mɛ kase ndu è suuy se ɛyshaa ndaa nə mɛ ge, ɛ́ yɛ bɛɛse.
62Jesus fise se wen ge: Wel kɛɛte se yɛ jumte mɛ, è kase yɛ kiy ɛybam fene əb báà se lu kekwɛnten se yɛ fɛl ɛ məme ɛysak nə Feyine.
Currently Selected:
Luk 9: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012