Luk 11
11
Jesus dinte ka lòó ɛ́ yɛ jem
(Mat 6.9-13; 7.7-11)
1Nè lu ɛ kechii kelee Jesus se lu ɛ kelik kelee jeme. Se lu ka əb nè mɛysenmen, wan-ɛyfɛl nə wen əblee suuy se wen ge: Báàba, dinte ka lòó ghɛs yɛ jem kɛn ka Joon nè dinten se ghon-ɛyfɛl nə wene.
2Əb suuy se ghene ge: Ghɛne loo jem, ghɛn yɛ suuy ge:
Ba ə wɛs, nɛɛy é ghele yɛ ngvəmle ɛyghel ə yiɛ,
nɛɛy é ɛysak ə yiɛ gwiy se ghele.
3Fó əbfua-əbyíɛ́ne se ghɛs kechii kejim,
4è lɛyse mbee ə sɛs, bek ge ghɛse lɛyse sɛ ghel ɛjime ghɛ ɛ́ jasen se ghɛs,
Nɛɛy é ghɛs jia lii se ɛymomse.
5Əb gese suuy se ghene ge: Ɛ́ liɛ ge wel əblee ɛ ghɛne məm ki sun ə wen, loo lu nɛ̀ ɛyteme ntəke əb ndu se wen è suuy ge: Sun ə yom, kiy wɛ̀ foose mɛ nɛ̀ ntukse keban setal, 6bek ge wel ɛyjɛl nə mɛ loo ndu ɛyjɛl è bɛ̀ɛ̀ ghɛse wen nɛ mɛ ki wiy kefaa kɛ əb yíɛ́. 7Wele wɛ̂ məme ndaa sɛ́y jaŋ è suuy ge: Ghàà yɛ foo ngɛk san, əbchio ndaa shi əbkumen, nɛ ghɛse ghon ə ghome shi əmkun. Di lòó mɛ jia loole se fo kefaa se wɛ̀ naa se nkan. 8Mɛ suuy se ghɛn ge: Ke loo lu dì, əb yɛ beŋte kɛn wel vi beŋten, é əb loole è fo kefaa kejim kɛ əb kɛŋen nɛ wiy kɛn bek ka luun sun ə wen.
9Mɛ me se suuye se ghɛn ge: Ghɛn yɛ bif kɛn bifen, é Feyine fó se ghɛn; è yɛ kɛŋ kɛn kɛŋen, é Feyine din se ghɛn; è yɛ kfənte kɛn əbchio ndaa kfənten, é Feyine dise se ghɛn. 10Bek ge naa ndɛ bife, é Feyine fó se wen, nɛ naa ndɛ kɛŋe, é Feyine din se wen. Naa ndɛ yɛ kfənte əbchio ndaa, é Feyine dise se wen. 11Lu ndɛ ba ə wan ɛ ghɛne məm wɛ wán ə wen bifen səə, é əb fó nɛ lu yio? 12Kene əb bif ɛyghum, é əb fó nɛ lu ngam? 13Ghɛn ghɛ ghele mbeese lɛ ke se fo əbfua əbjuŋe se ghon ə ghɛne lɛ, é Ba ə wɛn wɛ əb luun ɛ ɛyyio jia fo Keyioy Kelanene se ghii dii ghɛ ɛ́ bifen se wen è chia jii yɛ ghene fóon əbfua ten-a!
Kediak ə Jesuse lòò ghááy
(Mak 12.22-30; Mak 3.20-27)
14Jesus nè lô se jume ɛyfim se wel əbghun ɛ kechii kelee nɛ ɛy nɛɛy wel vi se lu kechichi, ɛy se fəye ɛ leghɛ, kechichi ki me se suŋnene, əbchio yum ghel ghɛ ɛ́ nè luun fo. 15Ghel ɛlee sɛ́y suuy ge: Əb jume tefim nɛ̀ əbtaawe Beelzebul wɛ əbfon ɛyfim.
16Ɛlee se momse wen, suuye ge əb nɛɛy kenəə əbchio əbyúméné kɛ ke dinen ge əbtaawe ə wene lòò se Feyine. 17Jesus me keele kenəə kɛ ghene kwaaten, è suuy se ghene ge: Naa ketum kekɛ, kɛ ghele luun ɛ ten ɛ əbnkakten əbnkakten, noo ngeŋse ghen, lòó ke jia teem; nɛ̀ ɛyshaa ndaa ɛykɛ yɛ ghele luun ɛ ten ɛ əbnkakten əbnkakten, noo ngeŋse ghene nɛ̂y giabsen. 18Satan lɛ giabsen ɛ əbnkakten əbnkakten è yɛ noo ngeŋ ə wen, é ɛysak ə wene bo teem lɛɛy? Mɛ suuy lɛ bek ge ghɛne suuye ge mɛ jume tefim ɛ əbtaawe nə Beelzebul. 19Ke lɛ loo è yɛ lu ge mɛ jume tefim ɛ əbtaawe nə Beelzebul, fene ghele ngoo nə ghɛne jume əbtaawe nə ndɛ-ɛ? Ghɛn keele yi ge, ko nɛ̂y se dine ghele ghɛn nɛ̂ ghin ge ghɛn sɛ kwaate ɛ titiy-a. 20Ɛngaŋ, dì foo keyioy ə Feyin əbtaawe ge mɛ yɛ jum ɛyfim so. Kii nɛ̂ kine lu se din ge ɛysak ə Feyine shi ɛ ghɛne məm.
21Ghɛn keele ge wel əbtaa ghal əbfua ɛyghoŋ è yɛ chiye kebɛy ə wen, fene lòó kefaa jia shik əbfua ə wen. 22Dî nɛ wel wɛ əb taan chian wen gwiy, è ghal wen se əbnoo, è chia wen é əb fii əbfua ɛyghoŋ nə wen vi wɛ əb kè lɛmen ɛykwaate ge lòó əb giamten yi, è liɛ əbfua ə wen è giate ghene ngoo wen.
23Naa ndɛ wɛ əb wiyen ghɛse wen lu nɛ əb noo mɛ, nɛ̀ naa ndɛ wɛ əb báà se giamten mɛ se baate, lu nɛ əb takse ghel taksen.
Ɛyfime kase fiile ɛy yɛ chɛf
(Mat 12.43-45)
24Loo lu əbliy wɛ keyioy ɛyfime fəyen se wel əbghun, ke ndu əbkwak əbyume è yɛ jɛle kɛŋ bene fɛ ke bɛɛ. Ke kɛŋ è jia yɛn, ke me suuy ge: Mɛ kase è fiile se ndaa yɛ mɛ kè lòòn ɛ ten. 25Ke kase fiile è yɛn nɛ ndaa yɛ ke kè lòòn ɛ ten se shi nɛ ɛ́ loote yɛyte è lɛm kejuŋ, 26ke me kase ndu è beŋte əbyioy ɛyfim əblee saamba nɛ əb befe chia keghene, ghene ghene me lii è yɛ chii fo. Ke gane dì, ɛychii ə wele tene me yɛ befe chia naa ka ɛy nè luun se mbiy.
Kechɛkle kɛ́ əbluuye
27Se lu nɛ Jesus bo suuye əbnəə vin, əbvii əblee ɛ məme kenon fo me jaŋ è suuy ge: Ke lu kejuŋ se əbvii wɛ əb nè biin wɛ̀ è nyoŋse.
28Jesus fise ge: Ke lu naa kejuŋ se ghel ghɛ ɛ́ yion kenəə ə Feyin nɛɛy ka ke dinen.
Əbchəyte ə Jona
(Mat 12.38-42)
29Se lu ka ngose wel yi nè gisen gwiyen ɛ Jesus ɛybee, əb suuy ge: Ghele ghɛ́ ntem fɛne loote lu ghel ɛbee. Ghene kɛŋe əbchəyte əbchio əbyúméné, dî nɛ ɛ́ jia din əbchəyte se ghene buu kɛn wɛ́ Jona-a. 30Ka Feyine nè nɛɛyen Jona se lu əbchəyte se ghele Nineve, lu kɛn ɛyghɛl ka Wanwele nɛ̂y yɛ lu əbchəyte se ghele ghɛ́ ntem fɛne. 31Ɛ́ náà loo lu ɛ kechii nsak, é no ə ntoke Sheba teem ghene ghele ghɛ́ ntem fɛne, è gham ghene bek ka əb nè lô lòò naa əbtəm è gwiy se yiote əbnəə əbfee wɛ Solomon nè dinten. Se lu nɛ wel lu fɛn wɛ kenəə ə wene chian kɛ Solomone. 32Ghele Nineve nɛ̂y loole sɛ̂y ɛ əbliye nsak fo è gham ghele ghɛ́ ntem fɛne, bek ge ghene nè lô yio kenəə kɛ Jona nè fekten è kubsen tetem ə ghen. Se lu nɛ wel lu fɛn ɛ leenen chia Jona, ghɛne jia se yɛne.
Ɛyban yɛ ɛy kaksen wel
(Mat 5.15; 6.22-23)
33Wele sɛɛ jia chəke kekaaken, əb lete leten, kene əb kfəəse ɛyshaa keghen. Əb chəke əb tom nɛ lu ɛ ketatan, ka wel loo lii ɛ ndaa é əb yɛ yɛn ɛyban. 34Ɛshiɛ ə ghiɛ lu kefaa kɛ ke foon ɛyban se əbghun ə viɛ, nɛ ɛshiɛ ə ghiɛ kè loo lu è yɛ yɛn əblik, fene əbghun əbjime lu ɛ ɛyban. Dî nɛ ɛshiɛ ghiɛ loo lifle, é əbghun ə viɛ əbjime yɛ lu ɛ fiine. 35Yɛɛ toknene yi nɛ ɛyban yɛ wɛ̀ kiin lòò è sɛɛ se nfiine. 36Loo lu əbghun ə viɛ əbjime yɛ ki ɛyban, nɛ ɛybee ɛylee fiine wiy, fene əbghun ə viɛ əbjime bane ka kekaakene loo ban ke yɛ kaake wɛ̀.
Jesus kak lonse ntuufe
(Mat 23.1-36; Mak 12.38-40)
37Jesus nɛ̂y mɛyse kesuŋnen ə wen, wele kenone Falisee əblee suuy ge ghene wen ndu è yiɛ ɛ yi ə ndaa. Ghene wen ndu, əb diom se yɛ yiɛ. 38Wel vi yɛn ka Jesus yiɛn nɛ əb bɛɛy ghàà suu ɛghoo ɛ ndee ɛylak, əbchio yum wen. 39Báàba me suuy se wen ge: Ghɛn ghɛ Faliseese suu ɛybom ghene əbghene ɛbɛy-ɛbɛy, dî nɛ tetem ə tɛne lun nɛ̀ keŋwɛye gese nɛ̀ tekwaate tebee. 40Ghɛn lu əbngoo! Mbom yɛ ɛy nè bomen ɛməme kefaa, ko lu yɛ ɛy nè bomen ɛbɛye ten. 41Ghɛn lu se yɛ fəyse əbfua wɛ əb luun ɛ məm foo se ghɛ́ ketane, é əbnəə əbjime me yɛ lu əbjuŋ se ghɛn.
42Lòn se ghɛne Faliseese! Chèmè lu əbfua wɛ ɛ́ lóó ɛ́ yɛ naaye mbas so, fene ghɛne liɛ, ɛ́ ko nyifte əblik ɛyvəm è fo kemok se Feyine. Dî nɛ ghɛne nɛɛye wiy əbnəə se ghele ɛ titiy, koŋe wiy Feyin. Vii nɛ̂ vine lu əbnəə wɛ ghɛn luun se yɛ nɛɛy, se geese yɛ nɛɛy əmnəətese əmlee. 43Lòn se ghɛne Faliseese! Ghɛne loo lu ɛ ngayse ɛyjem, wel yɛ luŋ kɛn ge yi diom ɛ əbchio kiy, è ndu ɛ əbwɛy ghɛn yɛ koŋ ge ɛ́ yɛ chakte ghɛn nɛ̀ ɛyngvəmlee. 44Lòn se ghɛn! Ghɛn lu ka tesɛy tɛ te yɛnsen wiy, nɛ̀ ghele chia ɛ ketuu ten ke wiy.
45Jesus suuy əbnəə vi dì, ndinte tesak ɛylee me suuy se wen ge: Ndinte, wɛ̀ suuy əbnəə vin lɛ tɛye sɛy ghɛs.
46Jesus me suuy ge: Lòn sɛ̂y se ghɛn ghɛ ɛ́ dinten tesak. Ghɛne lóó ɛ́ kokse kediile se wele ketuu, nɛ ɛ́ cheme jia lose wán-keghoo è tok so. 47Lòn se ghɛn! Ghɛne bome tesɛye ghele ntum nə Feyine nɛ ko nè yuyten ɛbaa-ɛbaa ə ghɛn ghene. 48Ghɛne nɛɛye dì, tokte kenəə kɛ ɛbaa-ɛbaa ə ghɛne nè nɛɛyen. Ghene nè yuyte ghele ntum nə Feyine, ghɛne yese è se bome tesɛy ə ghen.
49Ghan kenəə kɛ Feyin nè suuyen nɛ̀ əbfee ə wene ge: “Mɛ náà tum nfektese gese nɛ̀ ghɛ́ ntume se ghene, é ghene yuy ɛlee è nəkse ɛlee.” 50Ke me se lu ge Feyine náà gham ghele ghɛ́ ntem fɛne, bek ɛyyúyte yɛ ɛ́ nè yuyten nfekte sejim se kɛɛ ka mbi nè kɛɛten, se gwiy se chin lan. 51Əb náà kɛɛ se ghame ghene se ɛyyuy yɛ ɛ́ nè yuyen Abel se kok se chin se ɛyyuy yɛ ɛ́ yuyen Zakalia, wɛ ɛ́ nè fiaksen ɛ ndaa-ɛykokse ɛ fetetene ketatane ntaŋle ghene kelik ɛykokse. Mɛ suuye se ghɛn ge Feyine náà gham ghɛn se ɛyyuy yɛ ɛ́ nè yuyen ghene ɛjim.
52Lòn se ghɛn ghɛ ɛ́ dinten tesak! Ghɛn letemen jii yɛ ghele lòó ɛ́ chia ɛ ten è kiile ɛytof. Ghɛn lu nɛ ɛ́ tɛnmen se chia ɛ ten è me gese fen jii se ghel ghɛ ɛ́ kɛŋen se chia.
53Jesus loo lòò se fo, ndintese tesak ghene ghele kenone Falisee loole ɛ wen əbghun è se bifte əbnəə se wen ɛ gof ɛ gof, 54yiote əbchio ə wen ge ə́b sɛ suuy ge ghɛ, é ghene ko-a?
Currently Selected:
Luk 11: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012