Ŋɡɑlɑ̂t 1
1
CɛꞋlɛ
1Yɔ ŋwɑꞋnɛ fú mbɔ̌ mɔ Pɔ̂l, ŋɡɑŋntúu-Yɛ́su Kɛlístɔ, mbɔ pʉɔmɛsɔŋ ŋ́kɑɑnɛ wɑ́ɑ tsɔ́Ꞌ, wɛcɔ́ ŋumɛsɔŋ kɛ́ mbɔɔ wɑ́ɑ túu. Yɛ́su Kɛlístɔ pɔ́p Sɛ́ tɑ́t kɑ túunɛ wɑ́ɑ. Jʉ́ tɑ́t kɑ ɡɛnɛ lɑ Yɛ́su zẅíimɛ nǔu nɛvú. 2Pɛk pɛ́ pɔ́ɔpɛ́mɑ́ pi pɛk pɛ́pɔ́p zɑꞋnɛ tɛmtɛ́nɛ ŋ́ɡɑ́ yɔ ŋwɑꞋnɛ mbɔ̌ mɛcúꞌlɛ-pʉɔ-kɛlístɔ mi ɛ́ tsɛt ŋɡɔŋ-Ŋɡɑlɑsîi. 3Pɛk sɛ́ ńtsɑ́ɑ ŋɡɔ Tɑ́t wɛkŋɛ Sɛ́ mbɑ Tsɑpʉɔ pɔ́ nɛ́ pʉʉ, ḿbɔ́ ńníꞋ mɔ́fíitɛ tʉ́m pʉʉ. 4Pʉʉ sɛ́ ńjí ŋɡɔ Kɛlístɔ ɛ̂wɑ́ kɑ ɡɑ́ tú yɛ́ nǔu mɛnu kɛpɔŋ mɛkŋɛ nɛlɔk ɛ́fɛꞋ ndɔɔ yɛkŋɛ, pɔ́Ꞌɔ nɛfú mbɔ̌ yɔ kɛm njí yi ɛ́ yɛ kɛpɔŋ ńcẅɛɛtɛ wɛkŋɛ. Mɔnɛ mɛnu pɔ́ pɔ pɑ́Ꞌ Tɑ́t wɛkŋɛ Sɛ́ kɑ zɑ́pnɛ. 5Pʉɔmɛ́sɔŋ ŋ́ɡúꞋlɛ Sɛ́ mɛŋɡuꞋ mɛŋɡuꞋ, Ɛ́ pɔ́Ꞌɔ.
Ŋkʉʉ Sʉ́Ꞌnɛ pɔ́ pɔ wɛ́mɔ́Ꞌ
6Ɛ́ kʉꞋnɛ wɑ́ɑ tɛꞋ nǔu pɑ́Ꞌ Sɛ́ kɑ lɛɛnɛ nǔu Kɛlístɔ, ɛ́fúŋ wʉ́ʉ, ŋ́ɡɑ́ fuꞋ fɛ̌ɛ yʉ́ʉ, ŋ kɑ cẅɛt tsɛtsɛt pʉʉ, pʉʉ shɔtnɛ nzʉʉ wɛ́, tɛ ńtsʉ́Ꞌ ńzúꞋ pɔ yɛcɔ́ Ŋkʉʉ sʉ́Ꞌnɛ wɛ ndɛꞋ. 7Ŋ kɑ́ pɔ́ ńdɔk ńcú ŋɡɔ yɛcɔ́ Ŋkʉʉ sʉ́Ꞌnɛ pɛn ḿbɔ́ ɡú pɔ́, pɛcɔ́ pʉɔ sɛ́ ḿbɔ́ ḿbúunɛ tú yʉ́ʉ, ḿbɔ́ ńdɔɔ nɛkúpmɛ Ŋkʉʉ Sʉ́Ꞌnɛ-Kɛlístɔ. 8Pɛk kɑ kɛ́mɔ́ ńdɑ́Ꞌ ńcẅi Ŋkʉʉ Sʉ́Ꞌnɛ mbɔ̌ pʉʉ. Tɛ wɛcɔ́ ŋu lɑɑ ḿbɛn ńtɔ́ ŋkɔ̂ɔnɛ, kɛ pɔ ŋu wɛk ɔɔ, kɛ pɔ Cʉ̈ɔꞋ-Sɛ́ ɛ́fú tʉ́nɛ́pú ɔɔ, ńcẅi wɛcɔ́ Ŋkʉʉ sʉ́Ꞌnɛ wɛ ndɛꞋ mbɔ̌ pʉʉ, tɛ ɛ́ pɔɔ pɔ́ pɔ ẅi pɛk kɑ cúnɛ pɔ́, mbɔ ɛ́ píkŋɛ ŋɡɔ Sɛ́ níꞋ ndɔɔ tú-ŋɡɑŋ. 9Pɛk kɑ zɛɛ ńcú mbɔ̌ pʉʉ. Mɔ ŋkɔ̂ɔnɛ ḿbɛn ŋ́kẅíitɛ kẅíitɛ́nɛ ŋɡɔ, ŋu lɑɑ ńtɔ́ ńcẅi wɛcɔ́ Ŋkʉʉ sʉ́Ꞌnɛ wɛ ndɛꞋ mbɔ̌ pʉʉ, tɛ ɛ́ kɛ́ ḿbɔɔ pɔ́ pɔ ẅi pɛk kɑ cẅinɛ pɔ́, mbɔ ɛ́ píkŋɛ ŋɡɔ Sɛ́ níꞋ ndɔɔ tú-ŋɡɑŋ.
10Pʉʉ sẅíi wɑ́ɑ nɛ́ nu yi ɛ fúnɛ nɛcú lɑɑ, ɛ́ nyɛt ŋɡɔ mɔ sɛ́ ńtsɑ́ɑ ŋɡɔ nu yɑ́ɑ pɔŋ pʉɔmɛsɔŋ kɛ ŋɡɔ ɛ́ pɔŋ pɔ Sɛ́? Mɔ pɑ́Ꞌɑ ḿbɔ́ ńtsɑ́ɑ nɛɡɛ yúu mi ɛ́ ɡʉ ḿbɔŋ pʉɔmɛsɔŋ? Ɛ́ pɛ́Ꞌnɛ, m bɔ́ ńdɔɔ mbɑ nɛɡɛ yúu mi ɛ́ ḿbɔŋ pʉɔmɛsɔŋ, mbɔ ŋ kɑ́ pɛn ḿbɔ́ ŋu ẅí ɛ fɑꞋnɛ fɑꞋ-Kɛlístɔ pɔ́.
Ŋkʉʉ Sʉ́Ꞌnɛ ẅi Pɔ̂l cẅinɛ fú ndʉ́ŋndʉŋ mbɔ̌ Kɛlístɔ
11Pɔ́ɔpɛ́mɑ́, tsʉ́Ꞌnɛ ɛ sẅíi wʉ́ʉ, Ŋkʉʉ Sʉ́Ꞌnɛ ẅí pʉʉ kɑ zúꞋnɛ ŋ́kɑɑ kwɑŋɛ-ŋumɛsɔŋ pɔ́. 12Ŋumɛsɔŋ ŋkɑɑnɛ zɛɛ ɛ́fɛ́ɛ ẅîwɑ́ Ŋkʉʉ mbɔ̌ mɔ pɔ́. Ŋumɛsɔŋ kɛ́nɛ ḿbɔɔ wɑ́ɑ zíꞋ, Yɛ́su Kɛlístɔ kɑ ɡɛnɛ n jí.
13KwɑꞋ pʉʉ kɑ zɛɛ ńzúꞋ pɑ́Ꞌ ŋ kɑ pɔ́ ŋ́ɡɛ pɔ́Ꞌɔ, ŋkɑ́ yi ŋ kɑ pɛ́t ḿbɔ́ ŋ́ɡúꞋlɛ Sɛ́ nǔu ntɛ́ yɛ́ pɑyúdɑ. Pʉʉ sɛ́ ńjí ntɛ́ yi ŋ kɑ pɔ́ ńdɔk ɛ́sɑ́Ꞌ tʉʉ ńtsɔ́Ꞌ ku-cúꞋlɛ-pʉɔ-zẅikŋɛ kɛpɔŋ ḿbɛn ńdɔɔ nɛpík wɔ́p pɔ́Ꞌɔ. 14Ɛ́ ɡʉ nǔu nɛɡúꞋlɛ Sɛ́ nǔu ntɛ́ yɛ́ pɑyúdɑ, mbɔ n dɑtnɛ nǔu tɛ ńdɛɛ ŋkɑŋ yɛk pɔ́ɔ-Yúdɑ. Ŋ kɑ pɔ́ ḿmɑꞋ mbʉʉ yɑɑ tɛꞋ nǔu mɑt ẅí pɛtɑ́t pɛk kɑ zíꞋnɛ wɛ́k, n dɛɛ wɔ́p.
15Pɑ́Ꞌ mbɔ ŋ kɑ pɛ́t pɔ nɛpɛm, Sɛ́ tsɔ́Ꞌ wɑ́ɑ, ŋ́ɡɛ ŋ́ɡɑ́ fuꞋ yɑ́ɑ, ɛ́fúŋ wɑ́ɑ ŋɡɔ n tsʉ́Ꞌ ḿbɔ́ pɔ nǔu mɛ́ mbɔ́. 16A kɑ pɛn ńnɑ́ŋ tɛ ńjʉ́ɔ ŋɡɔ ɑ ɡʉ ŋ́ɡɛ n jí Mɔ́ɔ nɛ, nɛpɔ́ yi mɔ ŋ́ɡʉ ńcẅi Ŋkʉʉ ẅí ɛ́ líŋɛ́nɛ Mɔ́ɔ nɛ ɛ̂wɑ́ mbɔ̌ pʉɔ pi pɔ́p kɑ́ pɔ́ pɑyúdɑ pɔ́. N jʉ́ɔ Mɔ́ɔ nɛ ɛ̂wɑ́, mbɔɔ pɛn ḿbíkŋɛ ŋu nɛ́ yɛcɔ́ nu pɔ́. 17Ŋ kɛ́ mbɔɔ pʉʉ Yɛlúsɑlɛm, ńjʉ́ɔ pʉɔ pi pɔ́p kɑ piitɛ́nɛ ḿbɔ́ ɡɑŋntúu-Yɛ́su lɑ n tɔ́ yɑ́ɑ pɔ́; tɛ ńtsʉ́Ꞌ pɔ́Ꞌɔ, mbɔ ŋ kɑ ɡʉ pɔ tsɛt ŋɡɔŋ-Alɑbîi, ŋ́ɡɛ ḿbɛn ḿbɛn tʉ́sɔŋ-Ndɑ́mɑ́s.
18Ŋ kɑ lɑ́Ꞌ ŋ́ɡɔ ḿbʉʉ Yɛlúsɑlɛm nɛɡʉ ńjʉ́ɔ Pyɛ̂#1.18 Pɛ́ zɑꞋnɛ mbɑ nǔu kɛm 2.9, 11, 14 ɛ́fúŋ wɛ́ ŋɡɔ Kɛfɑs. pɛknɛ jínɛ mɛmbʉʉ mɛkŋɛ, mbɔ ɛ́ lɛɛ ŋɡuꞋ yɛ́tɑ́t. Ŋ kúu zúꞋu pɛknɛ nɑ́ŋ lɛ́Ꞌ ntsɔ̌pɛ́tɑɑ nɛ́ nɛɡɛ́m, 19ɑ kɑ́ pɔ́ ndɑꞋ jʉ́ pɔ́, mbɔ mɔ ŋkɑɑ pɛn ńjʉ́ɔ wɛcɔ́ ŋɡɑŋntúu-Yɛ́su wɛ ndɛꞋ pɔ́, ŋ kɑ pɛn ńjʉ́ɔ pɔ Jɑ̂k mɔ́ɔmɑ́ pɛ Tsɑpʉɔ. 20Yúu mi ŋ ŋwɑꞋnɛ́nɛ ɛ́sẅíi wʉ́ʉ lɑɑ, ɛ́ nɛ́nẅín. Mɔ, n tʉ́ʉ pɑ́Ꞌɑ mbi Sɛ́, ńcú ŋɡɔ ŋ kɑ́ pɔ́ ńcʉ̈ɔt nu pɔ́.
21Ŋ kɑ pɑ́ɑtɛ ŋ́ɡʉ tsɛt mɛlɑ́Ꞌ-ŋɡɔŋ-Silîi mbɑ tsɛt mɛ́ Silisîi, 22ŋ́ɡɔ ḿbɔ́ ńnɛn ɛ́fɑꞋ pɔ́Ꞌɔ, mbɔ pʉɔ-Kɛlístɔ pi pɔ́p Judɛ̂ ŋkɑɑ mɔ́ jʉ́ɔ nɛzíi nɑ́ɑ pɔ́. 23Ɛ́ kɑ ɡɔ́ ḿbɔ́, mbɔ pɔ́p kɑ zúꞋ pɔ pɑ́Ꞌ pɛ́ sɛ́ ńcú ŋɡɔ: Ŋu ẅí ɑ kɑ pɔ́ yɛcɔ́ ŋkɑ́ ḿbɔ́ ńtsɔ́Ꞌ ku yɔ́p kɛpɔŋ lɑ́, ɑ ŋkɔ̂ɔnɛ ḿbɔ́ ńcẅi Ŋkʉʉ Sʉ́Ꞌnɛ, ńcú nu nǔu nɛzɑ́p tʉ́m nǔu Yɛ́su ẅí ɑ kɑ pɔ́ yɛcɔ́ ŋkɑ́ ɛ́sɑ́Ꞌ tʉʉ pɔ nɛpík lɑ́. 24Ɛ́ lɛɛ pɔ́Ꞌɔ, pɔ́p pɔ́ ŋ́ɡúꞋlɛ Sɛ́ ntɛ́ wɑ́ɑ.
Currently Selected:
Ŋɡɑlɑ̂t 1: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017
