MATEO 7
QCHI04
7
Pitapish mana juchachinallachu nishcami
(Lc 6:37–38, 41–42)
1Ama juchachichu. Canpish ama juchachishca cangui. 2Ima shinami shujtajta juchachingui, chashnallatajmi juchachishca cangui. Imahuanmi shujtajta medingui, chai shinallatajmi medishca cangui. 3Cambaj quiquin ñahuimanta jatun caspita manaraj anchuchishpaca, ¿ima nishpataj cambaj huauquipaj ñahuipi ujsha tiyacujtaraj ricungui? 4Cambaj ñahuimanta jatun caspita manaraj anchuchishpaca ¿ima shinataj: “Cambaj huauquitaca shuyai cambaj ñahuimanta ujshata anchuchisha” ninguiyari? 5¡Mishqui shimi, jayaj shungu! Cambaj quiquin ñahuimanta jatun caspitaraj anchuchiyari. Chashna cashpamari, cambaj huauquipaj ñahuipi tiyacuj ujshataca alli ricushpa anchuchingui.
6Taita Diospajlla cajtaca, allcucunamanca ama cuichijchu. Ñataj tigrarishpa c'utsa c'utsata ruranman. Cancunapaj perlacunatapish, c'uchicunapaj ñaupajpica ama shitaichijchu. Paicunaca sarungallacunami.
Taita Diosta ima shina mañanami
(Lc 11:9–13; 6:31)
7Mañaichij, paica cungami. Mashcaichij, japinguichijmi. Huasiyuj nichij, paica pascangami. 8Mañajcunaca tucuicunami chasquin. Mashcajpish japinmi. Huasiyuj nijpipish yaicuchingami. 9¿Maijan cancunataj cambaj churi tandata mañajpica, rumita cunguichijman? 10Chalhuata mañajpipish culebrata cunguichijman. 11Cancunaca millaicuna cashpapish, cancunapaj huahuacunamanca imatapish allicunata cunatami yachanguichij. Jahua pachapi caj cancunapaj Yayacarin, paita mañajcunamanca ashtahuan yalli allicunatamari cunga. 12Shina cajpica, shujtajcuna cancunapaj allita rurachun nishpaca, cancunapish paicunapaj allita ruraichij. Chashnami mandashcacunapipish mandan, profetacuna huillashcapipish huillan.
Quichqui punguta yaicunami
(Lc 13:24)
13Quichqui punguta yaicuichij. Chingarinaman pushajca pungupish anchomi, ñanpish yallitaj anchomi. Chaitaca achcacunami yaicuncuna. 14Causaiman pushajca pungupish quichquimi, ñanpish quichquimi. Chaitaca ashacunallami chasquincuna.
Grano p'ucujpimi ima yura cashcataca rijsinguichij
(Lc 6:43–44)
15Llullashpa yachachijcunamanta huaquichirichij. Paicunaca oveja shina churarishcami cancunapajmanca shamuncuna. Ashtahuanpish paicunapaj shunguca millai atujcuna shinami. 16Paicunataca granota p'ucujta ricushpa pi cashcata rijsinguichij. Uvastaca casha yurapichari tandanguichij. Higotapish abrojo cashapichari tandanguichij. 17Tucui alli yurapimi, alli grano p'ucun. Mana alli yuraca, mana alli granollatami p'ucun. 18Alli yuraca mana alli granotaca, mana p'ucunchu. Mana alli yurapish alli granotaca mana p'ucunchu. 19Mana alli granota p'ucuj yurataca, tucuicunatami p'itishpa ninapi shitan. 20Chaimanta paicunapi p'ucushca granota ricushpa pi cashcata rijsinguichij.
Taita Dios mandacunpica mana tucuicuna yaicungachu
(Lc 13:25–27)
21Ñucata: “¡Mandaj Jesús, Mandaj Jesús!” nijcunaca, Taita Dios mandacunpica mana tucuicuna yaicungacunachu. Ashtahuanpish jahua pacha ñuca Yayapaj munaita rurajcunami, chaimanca yaicungacuna. 22Chai punllapica achcacunami ñucataca: “Mandaj Jesús, Mandaj Jesús, cambaj shutipimi huillarcanchij, cambaj shutipimi supaicunata llujshichircanchij, cambaj shutipimi achca milagrocunatapish rurarcanchij” ningacunami. 23Shina nijpica paicunataca: “Cancunataca nunca mana rijsircanichu. ¡Ñucamanta anchuichij, millaita rurajcuna!” nishami.
Sinchi allpapipish t'iyu allpapipish huasichijcunamanta parlashcami
(Lc 6:46–49)
24“Maijanpish cai ñuca yachachishcacunata uyashpa chaitataj rurajtaca, yacu rumi jahuapi huasichij alli yuyaiyuj runahuanmi ch'imbapuragrini. 25Alli yuyaiyuj runa huasichishca q'uipa tamyajpica, achca yacu jatarishpa, achca huaira p'ucushpa chai huasipi huajtarijpica, mana urmarcachu. Chaica ucujta allashpa yacu rumi jahuapi huasichishcamantami mana urmarca. 26Maijanpish cai ñuca yachachishcacunata uyashpapish mana rurajtaca, t'iyu allpa jahuallapi huasichij yuyai illaj runahuanmi ch'imbapuragrini. 27Chai huasitaca achca tamya shamushpa, achca yacu jatarishpa, achca huaira p'ucushpa sinchita huajtajpica urmarcallami. Chaipica jatun llaquimi carca” nircami.
28Cai shimicunata parlashpa Jesús tucuchijpica, paipaj yachachinata yachachishcataca achcatami mancharircacuna. 29Mandashcata quillcajcuna shinallaca mana yachachircachu. Paica mandaj cashcatataj ricuchishpami yachachirca.

Texto Bíblico © Sociedades Bíblicas Unidas, 1989.

Dios Rimashca Shimicunami © Sociedades Bíblicas Unidas, 1989.

Texto: Biblia en Quichua Chimborazo, 1989

Learn More About Dios Rimashca Shimicunami