MATEO 18
18
Jahua pachamanta mandacujpica ¿maijanshi jatun cashun? nishcami
(Mr 9.33-37; Lc 9.46-48)
1Chai punllacunapimi yachacujcuna Jesuspajman c'uchuyashpaca:
–Jahua pachamanta mandacujpica ¿maijanshi jatun cashun?– nishpa tapurcacuna.
2Chaimi Jesusca shuj huahuata cayashpa, paicunapaj chaupipi churashpaca, 3–Diospajman mana cutirishpa, huahuacuna shina mana tucushpaca, jahua pachamanta mandacunpica manataj yaicunguichijchu. Chashnatajmi canga. 4Maijanpish cai huahua shina cumurijmi, jahua pachamanta mandacunpica jatun nishca canga. 5Maijanpish cai huahua shina caj ñuca Shutipi shamujta chasquijca, ñucatami chasquin nircami.
Juchapi urmachinaca jatun llaquimi
(Mr 9.42-48; Lc 17.1-2)
6Cai uchilla huahuacuna shina ñucata crij tucujpi paicunata pandachijtaca, maijan cajpipish burrohuan cutana rumita cungapi huatashpa, mama cuchapi ucujta shitanami alli canman. 7¡Aij, cai pachapi causaj pandachijcunalla! Cai pachapica pandarinacunaca tiyanataca tiyangallatajmi. Chashna cajpipish ñucata ama catichun pandachijcunaca ¡aij, imachari tucunga! 8Chaimanta cambaj maqui cashpa, chaqui cashpa maipi pandachisha nijpica, p'itishpa shitangui. Ishqui maquindij, ishqui chaquindij, huiñaita rupacuj ninapi shitashca canapaj randica, shuj chaqui illajlla, shuj maqui illajlla cashpapish causaiman yaicunami ashtahuan alli canga. 9Shinallataj cambaj ñahui maipi urmachisha nijpica, surcushpa shitangui. Ucu pacha ninapi ishqui ñahuindijtaj shitashca canapaj randica, chulla ñahuillahuan causaiman yaicunami ashtahuan alli canga.
Chingarishca ovejamanta yuyachishpa parlashcami
(Lc 15.3-7)
10Maijan cai uchillacuna shinataca ama yanganchinguichijchu. Chaimanta cashnami nini: Jahua pachapi caj ñuca Yayapaj ñaupajpi caj angelcunami paicunataca ricuracuncuna. 11Runa Aichayujca, chingarishcacunata quishpichingapajmi shamurca.
12Shuj runa patsaj ovejacunata charijca, shuj chingarijpica ¿imatashi ruranman? ¿Manachu iscun chunga iscunta saquishpa, urcucunata rishpa chai chingarishcata mashcagrin? 13Chaita japishpaca, caishuj iscun chunga iscun mana chingarishcacunamanta yallimi cushicunman. Chaica chashnatajmi. 14Chashnallatajmi jahua pachapi caj cancunapaj Yayapish, cai uchillacunamanta shujllapish chingarichunca manataj munan.
Ima shina perdonanacunami
(Lc 17.3)
15Chaimanta cambaj huauqui canta llaquichishpa juchallijpica, paillahuan parlashpa chai mana allita rurashcata yuyachishpa rimangui. Can rimashcata pai uyajpica, canmi paitaca Diospajman tigrachingui. 16Ashtahuanpish can rimashcata mana uyajpica, shujta cashpa, ishquita cashpa pushashpa cutin paipajman ringui. Paicunami imallata uyashcata alli huillajcuna canga. 17Paicuna rimashcatapish mana uyajpica, tandanacushca crijcunaman huillangui. Tandanacushca crijcunatapish mana uyajpica, Diosta mana rijsij, millai runallataj cashcata yuyangui. 18Maijanta cai pachapi can huatajpica, jahua pachapipish huatashcami canga. Maijanta cai pachapi can cacharijpica, jahua pachapipish cacharishcami canga. Chaica chashnatajmi. 19Chaimanta cashnami nini: Cai pachapi cancunapuramanta ishquindij shuj yuyailla tucushpa, jahua pachapi caj ñuca Yayata imatapish mañajpica cungallami. 20Ishquillapish, quimsallapish ñuca shutipi tandanacujpica, ñucapish chaipimi paicunapaj chaupipi cani– nircami.
21Pedro c'uchuyashpaca:
–Amito, ñuca huauqui ñucata llaquichishpa juchallijpica ¿mashna cutintaj perdonasha? ¿Canchis cutincamachu perdonasha?– nishpa tapujpi, 22Jesusca:
–Mana canchis cutinlla ninichu, ashtahuanpish canchis chunga canchiscamami perdonacuilla nini– nircami.
Mana perdonasha nij runamanta yuyachishpa parlashcami
23Jahua pachamanta mandacunca, shuj jatun mandaj paipajta rurajcuna mashnata debishcata allichingapaj cayaj shinami. 24Mashnalla debishcata ricui callarishpaca chunga huaranga talento cullquita debij servijtami cayachirca. 25Chai debishcata mana pagai tucujpimi chai debimanta japingapajca paindij, paipaj huarmindij, huahuacunandij, ima charishcacunandij c'atugrichij nishpami chai amoca mandarca. 26Chaimi amopajta rurajca cungurishpa: “Amito, ama p'iñarishpa shuyapai, tucuita pagashallami” nishpa rogarirca. 27Chai amoca paipajta rurajta llaquina yuyai tucushpami, shinashpaca saquilla ama chai debitaca pagaichu nishpa cacharca.
28Ashtahuanpish paipajta ruraj chaimanta llujshishpaca, chai amopaj shujtaj servij paiman patsaj denario cullquita debijhuan tupashpami, paitaca cungapi sipishpa: “Ñucaman debishcata pagai” nirca. 29Chaipimi, chai runaca paipaj ñaupajpi cungurishpa: “Shuyapai, ama p'iñaripaichu. Cambaj tucui cullquita pagashallami” nishpa rogarirca. 30Ashtahuanpish paica mana saquisha nishpami, debishcata tucui pagangacama carcelpi churarca. 31Chai amopajta ruraj caishujcuna chaita ricushpaca, achcata llaquirishpami paicunapaj amoman tucui ima tucushcacunata huillagrircacuna. 32Chaita huillajpi paipaj amo cayashpaca: “Millai servij, can shuyapai nijpica, ñucaca saquilla ama tigrachinguichu nircanimi. 33Ñuca canta llaquishca shinallatajmi, ñucapajta ruraj caishuj runataca canpish llaquina carcangui” nircami. 34Chaimantami chai amo p'iñarishpaca, pai debishcata tucui tigrachingacama macajcunaman curca. 35Maijan huauqui cancunata p'iñachishcacunata caishuj, chaishuj mana tucui shunguhuan perdonajpica, jahua pachapi caj ñuca Yayapish cancunataca chai shinallatajmi llaquichinga– nircami.
Currently Selected:
MATEO 18: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.