MATEO 17
17
Jesusca shujtajyarishcami
(Mr 9.2-13; Lc 9.28-36)
1Sujta punlla q'uipami Jesusca, Pedrota, Jacobota, Jacobopaj huauqui Juantapish paicunallata pushashpa, shuj jatun urcuman rirca. 2Chaipimi Jesusca paicunapaj ñaupajpi shujtajyarirca. Paipaj ñahuipish inti shina lamyacujmi tucurca. Paipaj churanacunapish, luz shina yurajllami tucurca. 3Chaipica Moisespish, Eliaspish Jesushuan parlanacucujmi ricurirca. 4Chaita ricushpami Pedroca, Jesustaca: “Amito, ñucanchij caipi canaca allimari cashca. Can munajpica, quimsa chugllacunata rurashun: Shujtaca cambaj, caishujtaca Moisespaj, chaishujtaca Eliaspaj” nircami.
5Pedro chashna rimacujpirajmi, paicunapaj jahuaman achijnicuj p'uyu shamushpa taparca. Chai p'uyumantaca: “Caimi, ñuca c'uyashca Churi. Paipimi cushicuni. Paita uyaichij” nishpa rimashcami uyarirca. 6Chaita uyashpami yachacujcunaca achcata mancharishpa cungurishpa urisinga sirirircacuna. 7Jesús paicunapajman c'uchuyashpaca, maquihuan tuparishpami: “Jatarichij, ama manchaichijchu” nirca.
8Paicuna huichilla ricushpaca, pi shujtajtaca mana ricurcacunachu, Jesuslla chaipi cajtami ricurcacuna.
9Chai urcumanta uriyamucushpami, Jesusca paihuan rij yachacujcunataca:
–Runa Aichayuj huañushcacunapaj chaupimanta causaringacama, muscuipi shina ricushcataca, pajta piman huillanguichijman– nishpa mandarca.
10Chaipimi Jesuspaj yachacujcunaca:
–¿Ima nishpataj mandashcata quillcajcunaca, Eliasrajmi shamunga nincuna?– nishpa tapujpi, 11Jesusca:
–Ari, chaica chashnami. Eliasraj punta shamushpami, paica tucuita allichinga. 12Ashtahuanpish cancunamanca cashnami nini: Eliasca ñami shamurca. Ashtahuanpish paitaca mana rijsishpami, paicuna munashcata rurarcacuna. Runa Aichayujpish paicunapaj maquipi llaquita apangatajmi– nircami.
13Yachacujcunaca, Bautizaj Juanmanta rimacushcatami entendircacuna.
Uraticu huambrata Jesús alliyachishcami
(Mr 9.14-29; Lc 9.37-43)
14Gentecuna maipi canman Jesús paipaj yachacujcunandij chayamujpica, shuj runami paita ricushpa paipaj ñaupajman c'uchuyashpa cungurishpaca, cashna nirca:
15–Amito, ñuca huahuata llaquihuayari. Uraticu tucushpami yallitaj llaquita apacun. Ninapipish, yacupipish achca cutinmi urman. 16Cambaj yachacujcunapajmanpish apamurcanimi, paicunaca mana alliyachi tucurcacunachu– nircami.
17Jesús cutichishpaca:
–¡Huahua huahuami mana crij millaicuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? Chai huambrata caiman pushamuichij– nircami.
18Supaita Jesús sinchita rimajpi chai supai chai huambramanta llujshijpica, chai pachamantami huambraca alliyashca saquirirca. 19Yachacujcuna Jesuspajman c'uchuyashpaca:
–¿Ima nishpataj ñucanchijca mana llujshichi tucushca cashun?– nishpami, paillata tapurcacuna.
20Jesusca paicunataca:
–Cancunaca ashallata crijcuna cashcamantami mana llujshichi tucushcanguichij. Cashnatajmi nini: Uchilla mostaza muyu shinallatapish crinata charishpaca, cai urcutapish: “Caimanta chaiman ri” nijpica, rinmanmi. Imapish mana sinchi canmanchu. 21Chai shina supaicunaca mana llujshinllachu, Diosta mañashpa ayunajllapimi llujshincuna– nircami.
Caihuanca ishqui cutin pai huañuna cashcata Jesús huillashcami
(Mr 9.30-32; Lc 9.43-45)
22Jesusca paipaj yachacujcunandij, Galileapi cashpami cashna nirca: “Runa Aichayujtaca runacunapaj maquipi churajpi, 23huañuchingacunami. Ashtahuanpish quimsa punllapica causaringallami” nijpimi, paicunaca achcata llaquirircacuna.
Diospaj huasipaj impuestota cushcami
24Capernaumman paicuna chayajpimi, ishqui dracma cullquita japijcuna Pedropajman c'uchuyashpaca:
–Cancunapaj Yachachijca Diospaj huasipajca ¿ishqui dracma cullquitaca manachu cunata yachan?– nijpi, 25Pedroca:
–Ari– nirca.
Huasiman Pedro yaicugrijpica Jesusrajmi:
–¿Imatataj yuyangui, Simón? Cai pachapi jatun mandajcunaca ¿maijancunamantataj tributocunata, impuestocunataca japincuna? ¿Paicunapaj llajtapi causajcunamantachu, mana cashpaca shujtaj llajtamanta shamushcacunapajtachu japincuna?– nirca.
26Shina nijpi Pedroca:
–Shujtaj llajtamanta shamushcacunapajtami japincuna– nijpi, Jesusca:
–Shinashpaca, quiquin llajtapi causajcunaca mana cunachu. 27Shina cajpipish cullquita japijcunata ama p'iñachingapaj, cuchaman rishpa, chalhua japina ipita cuchapi shitashpa, punta llujshij chalhuata japishpa, shimita pascashpaca shuj cullquitami japingui. Chaitaca ñucamanta, canmantapish cugringui– nircami.
Currently Selected:
MATEO 17: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.