JOSUÉ 3
3
Israelcuna Jordán yacuta ch'imbashcami
1Cayandij tutamanta utca jatarishpami, Josueca Sitim pambamanta tucui israelcunandij Jordán yacu c'uchuman rircacuna. Chai yacuta manaraj ch'imbashpami chaillapi samarircacuna. 2Quimsa punllata chaipi cashca q'uipaca, israelcunata mandajcunaca tucui carpa huasicunata rishpami, 3cashna nishpa mandarcacuna: “Levita curacunami Mandaj Dioshuan ari ninacushca quillcata huaquichina arcata apashpa ñaupangacuna. Chaita ricushpaca tucuicuna paicunata catishpa ringuichij. 4Cancunaca maijanpish manaraj cai ñantaca purijcunachu canguichij. Chaimanta paicuna ñaupashpa rijpi maita rina cashcata yachanguichij. Diospaj arcata apacujcunapajmanca ama c'uchuyanguichijchu. 900 metro shina carupi catishpa ringuichij” nishpami mandarcacuna.
5Josuepish israelcunataca: “Tucuicuna allichirishpa ima mapa illajlla tucuichij. Cayami Mandaj Diosca, pi mana ruraipajta rurashpa cancunaman ricuchinga” nircami. 6Chai q'uipaca curacunatami Josueca: “Dioshuan ari ninacushca quillcata huaquichina arcata apashpa, israelcunata ñaupashpa richij” nijpi curacunaca chai arcata apashpa israelcunata ñaupashpa rircacuna. 7Chaipimi Mandaj Diosca Josuetaca: “Cunan punllamantami cantaca, tucui israelcunapaj ñaupajpi jatun cashcata ricuchigrini. Moiseshuan shinallataj ñucaca canhuanpish cashcata paicuna yachachunmi chashna rurasha. 8Ñucahuan ari ninacushca quillcata huaquichina arcata apaj curacunataca Jordán yacu uriman chayashpaca, yacupi yaicushpa shayarichun mandai” nircami.
9Shina nijpimi Josueca, israelcunataca cashna mandarca: “Shamuichij, cancunata Mandaj Dios imallata rimashcata uyanguichij” nirca. 10Josueca cashnapish nircami: “Cancunaca caita ricushpami causaj Dios cancunahuan cashpa, chai Canaán llajtapi causacuj heteocunata, heveocunata, ferezeocunata, gergeseocunata, amorreocunata, jebuseocunata cancunapaj ñaupajmanta llujshichishpa cachanataj cashcata yachanguichij. 11Tucui cai pachata mandaj Jatun Dioshuan ari ninacushca quillcata huaquichina arcaca tucui cancunata ñaupashpami Jordán yacu chaupiman ringa. 12Cunanca, chunga ishqui aillucunamanta cada aillumanta shuj shuj runacunata agllaichij. 13Tucui cai pachata Mandaj Jatun Dioshuan ari ninacushca quillcata huaquichina arcata apacuj curacunapaj chaquicuna Jordán yacuman yaicujpica, chai yacuca chaupirishpa pata shina tucungallami. Chaimi janajmanta shamucuj yacuca jarcarishpa, mana ashtahuan shamunga” nircami.
14Shina nijpimi israelcunaca, Jordán yacuta ch'imbangapaj paicunapaj carpa huasicunamanta rircacuna. Dioshuan ari ninacushca quillcata huaquichina arcata apaj curacunaca paicunata ñaupashpami rircacuna. 15Jordán jatun yacuca cozicha punllacunapica, tucui chai punllacunapimi yallitaj yacu mirarishpa, lado pambacunacama jundaj carca. Chaimantami Dioshuan ari ninacushca quillcata huaquichina arcata apacuj curacuna Jordán yacu uriman chayajpica, paicunapaj chaquicunataca shutujyachirca. 16Chaimi janajmanta shamucuj yacuca Saretán pueblo c'uchupi caj Adam shuti pueblomanta carupi jarcarirca. Israelcuna ch'imbacushcamanta uriman ricuj yacupish, Arabá shuti pambapi caj Cachisapa Cuchacamami chaquirca. Chai yacu chashna chaquijpimi, tucui israelcuna Jericó pueblo derechota ch'imbarcacuna. 17Tucui israelcuna ch'imbangacamami curacunaca, Dioshuan ari ninacushca quillcata huaquichina arcahuan, Jordán yacu chaquirishca chaupipi imata mana manchashpa shayacurcallacuna. Israelcunaca tucuicunami chaquishca allpata ch'imbarcacuna.
Currently Selected:
JOSUÉ 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.