JOSUÉ 2
2
Jericó pueblota purij shinalla ricumugrijcunata Josué cachashcami
1Nunpaj churi Josueca, Sitim pambamantami ishqui runacunata Jericota purij shinalla ricushpa tigramuchun cachangapaj cashna nirca: “Jericó ima shinalla cashcata purij shinalla ricushpa tigramugrichij” nijpimi chai runacuna rishpa Jericoman chayashpaca, huainayashcahuan causaj Rahab shuti huarmipaj huasiman chayarcacuna. Chaipimi chai tutaca pacarircacuna. 2Paicuna chai puebloman chayashcataca, maijancunami Jericota jatun mandajmanca:
–Cunan tutami maijan israelcunaca, cai Jericó ima shina cajta purij shinalla ricunaman shamushcacuna– nishpami huillashca carca.
3Chaimi Jericota jatun mandajca Rahab huarmipajman rishpa:
–Cunan tuta cambaj huasiman chayamuj runacunata canllaman llujshichi. Paicunaca cai pueblo ima shina cashcata purij shinalla ricunaman shamujcunamari cashca– nigrichunmi chai huarmipajman cacharca.
4Chai huarmica, chai ishqui runacunata pacashpaca:
–Picuna cashpaca ñuca huasimanca shamunataca shamurcatajmari. Paicuna maimanta cashcataca mana yachashcanichu. 5Ña tucui tutayashcata cai pueblomanta llujshina punguta huichcana shinallapimari caimantaca rircacuna. Chaimantaca maitachari rircacuna mana yachanichu. Utca catishpa richij japinguichijmi– nircami.
6Chai huarmica chai ishqui runacunataca, huasi jahuata pambajllata rurashcaman huichiyachishpami, lino ujsha chaupipi pacashca carca.
7Jatun mandaj cachashca soldadocunaca, Jordanman rina ñanta jatun yacuta maitami ch'imbanallacamami chai runacunata catishpa rircacuna. Paicuna chaimanta rijpimi, chai pueblomanta llujshina pungutaca huichcarcacuna. 8Chai runacuna manaraj dormijpimi, huasi jahuaman paicunapajman huichiyashpa Rahab huarmica cashna nirca:
9–Ñucaca cai llajtataca, cancunata Mandaj Dios cancunaman cushca canatami crini. Cancunata uyashpaca, tucui ñucanchijmi achca manchaihuan canchij. Cancunata manchashcamantaca, tucui cai llajtapi causajcunamari jatun manchaihuan huañucuncuna. 10Cancuna Egiptomanta llujshishpa, Puca Cucha yacuta ch'imbachunpish, Mandaj Diosca chai yacuta chaquichishcatami yacharcanchij. Jordán jatun yacumanta ch'imbaman caj amorreocunata mandaj Sehón shuti, Og shuti jatun mandajcunatapish mishashpa tucuchishcatapish yachanchijmi. 11Chaicunata uyashpami, cancunataca tucuicuna manchanchij. Cancunahuan macanacunataca pi mana c'ariyanchu. Cancunata Mandaj Diosca jahua pachapipish cai pachapipish caj Diosmi. 12Ñuca cancunapaj allita rurashca shinallataj, cancunapish ñuca yayapaj paipaj huasipi tucui cajcunapaj allita rurangapaj Mandaj Diospaj ñaupajpi ari nishcata ricuchishpa shuj ricuchinata rurachunmi cunanca rogani. 13Ñuca yaya mamata, ñuca turicunata, ñañacunatapish ama huañuchipanguichijchu. Tucui ima charishcacunatapish ama imata rurapanguichijchu– nircami.
14Chaimi paicunaca:
–Can ñucanchijta cunan mana huillashpa mana japichijpica, ñucanchijpish cancunataca mana huañuchishunchu. Mandaj Dios ña cai llajtata ñucanchijman cujpi japishpaca cancunataca mana imata rurashunchu. Ñucanchij nishcataca pajtachishuntajmi– nircacuna.
15Rahab huarmipaj huasica, pueblo muyundij jatun pirca jahuapi huasichishcami carca. Chaimantami paicunataca huascahuan huatashpa huasha lado ventanata canllaman uriyachirca. 16Paicunataca cashna nishpami cacharca:
–Cancunata catishpa rinchij nijcuna cancunahuan ama tupachunca urcuman richij. Paicuna cai puebloman tigrangacama chai urcupi quimsa punllata pacatucunguichij. Chai q'uipaca cancunapaj ñanta japishpa ringuichijlla– nircami.
17Chaimi chai runacunaca:
–Ñucanchijca ima juchachina illaj saquiringapajca, canhuan ari nishcataca pajtachishuntajmi. 18Ñucanchij ña cai llajtaman yaicumujpica, canca ñucanchijta canllaman uriyachishca cai puca huascatami ventanapi huarcuna cangui. Cambaj yaya mamatapish, turicunatapish, cambaj yayapaj familiacunataca tucuicunata cambaj huasipi tandachingui. 19Cambaj huasipi tandachishca jahua chaimanta llujshishpaca, paipaj jahuallatajmi canga. Paita huañuchijpica ñucanchijca imata mana juchachishca cashunchu. Cambaj huasillapitaj cajpi ñucanchijpuracuna maijanta huañuchijllapimi, ñucanchij jahua canga. 20Ñucanchij caimanta rishcata, ñucanchijta mashcajcunaman can huillashpa japichijpica, can mañashcata pajtachingapaj ari nishcataca ña mana pajtachishunchu. Ima juchachina illajmi saquirishun– nircacuna.
21Chaimi Rahab huarmica:
–Cancuna nishca shina cachun– nishpa minchacama nijpica, chai runacunaca rircallacuna. Chai huarmipish puca huascatami ventana canlla ladoman huarcurca.
22Paicuna chaimanta rishpa urcuman chayashpaca, paicunata mashcacujcuna puebloman tigrangacamami quimsa punllata chaipi saquirircacuna. Paicunata mashcacujcunaca tucui ñanta mashcashpapish manataj japircacunachu. 23Chai q'uipami chai ishqui runacunaca urcumanta uriyashpa, Jordán jatun yacuta ch'imbashpa Nunpaj churi Josuepajman shamurcacuna. Paipajman ña chayashpaca, paicuna imalla tucushcata tucuita parlashpami, 24Josuemanca: “Mandaj Diosca tucui chai llajtatami ñucanchijman cushpa ñucanchij maquipi churashca. Tucui chai llajtapi causajcunami ñucanchijta manchashpa manchaihuan huañucuncuna” nircacuna.
Currently Selected:
JOSUÉ 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.