JOSUÉ 24
24
Israelcunata Josué cunashpa caya minchacama nishcami
1Josueca, Israel tucui aillucunata Siquem llajtapi tandachishpami, paicunata cunaj yuyajcunata, mandajcunata, juezcunata, pushajcunata cayajpi Mandaj Diospaj ñaupajpi tandanacurcacuna. 2Chaipimi Josueca, tucui israelcunataca:
–Israelcunata Mandaj Diosca cashnami nin: Cancunapaj ñaupa yayacunaca Éufrates jatun yacu ch'imbanij llajtapimi manapish dioscunata adorashpa causarcacuna. Paica Abrahampaj Nacorpaj yaya Taré shutimi carca. 3Cancunapaj yaya Abrahamtaca, chai jatun yacu ch'imbanijmanta cai Canaanmanca ñucami pushamurcani. Tucui cai llajtapimi, caipi chaipi causarca. Ñucaca achca huahuacunayuj tucuchunmi paimanca Isaac churita curcani. 4Isaacmanca Jacob, Esaú churicunatami curcani. Esaú causachunca Seir urcutami curcani. Jacob, paipaj churicunandijca Egiptomanmi uriyarcacuna ninmi. 5Chaimanta llujshichingapajca Moisesta, Aaronta cachashpami, Egiptopi causajcunataca jatunta llaquichishpa, cancunataca paicunapaj chaupimanta llujshichimurcani. 6Cancunapaj ñaupa yayacunata Egiptomanta llujshichimujpi ña paicuna cucha c'uchuman chayamujpica, egipciocunaca macanacunapaj carrocunandij, caballocunapi tiyarishcacunandijmi Puca Cuchacama catimurcacuna. 7Chaipimi ñucataca Mandaj Dioslla nishpa caparishpa israelcuna mañajpica, cancunata caticuj Egipto runacunahuan, cancunahuan chaupipica jatun amsata churarcani. Egipcio runacunataca, mama cucha yacupimi tucuita pambarcani. Tucui chaicunataca cancunapaj ñahuihuantajmi ricurcanguichij.
Chai q'uipaca shitashca pambapimi, achca punllacunata causarcanguichij ninmi. 8Chaimantaca Jordán jatun yacumanta inti llujshin ladoman caj amorreocunapaj llajtamanmi pushamurcani. Chaipimi amorreocunaca cancunahuan macanacungapaj jatarircacuna. Shina cajpipish paicunataca cancunapaj maquipi ñuca churajpimi, misharcanguichij. Paicunapaj allpataca cancunapaj cachunmi japircanguichij ninmi. 9Chai q'uipaca, Zipor runapaj churi jatun mandaj Balacmi, pai mandacushca Moabpi causajcunata pushashpa cancunahuan macanacungapaj jatarircacuna. Chai jatun mandaj Balacmi, Beor runapaj churi Balaamtaca, cancunata llaqui tucushca canman nichun cayanaman cacharca. 10Balaam runa israelcunata llaqui tucushca canman nichunca ñuca mana saquijpimi, paica israelcunata llaqui tucushca canman ninapaj randica, alli cashca cachun nishpa cutin cutin nirca. Chashnami cancunataca paicunapaj maquimanta quishpichircani. 11Shinallataj Jordán jatun yacuta cancuna ch'imbashpaca, Jericomanmi chayamurcanguichij. Jericopi causaj amorreocuna, ferezeocuna, cananeocuna, heteocuna, gergeseocuna, heveocuna, jebuseocunaca cancunahuanmi macanacurcacuna. Paicunataca ñucami cancunapaj maquipi churarcani ninmi. 12Amorreocunapaj ishqui jatun mandajcunataca, mana cancunapaj espadahuan, cancunapaj arcohuan mishashpachu llujshichishpa cacharcanguichij. Ashtahuanpish ñucami tábano chuspicunata cachashpa, manaraj cancuna chayamujpi llujshichishpa cacharcani. 13Ñuca cushca allpacunapi cancuna cunan causacunpica, mana cancunachu trabajarcanguichij. Pueblocunatapish mana cancunachu shayachircanguichij. Ashtahuanpish mana cancuna tarpushca cashpapish, uvatapish olivostapish micucunguichijmi ninmi.
14Chashna cashcamanta cunanca Mandaj Diosta manchashpa mana nij tucushpalla tucui shunguhuan paipajta ruraichij. Cancunapaj ñaupa yayacuna Éufrates yacu uripi cashpa shujta dioscunapajta rurashcatapish, Egiptopi cashpa shujta dioscunapajta rurashcatapish cancunapaj chaupimanta anchuchishpa, Mandaj Diospajllata ruranguichij. 15Mandaj Diospajta rurashpa causana mana alli yuyachijpica, cunanllataj maijan diospajta rurasha nishpapish alli yuyaringuichij. Cancunapaj ñaupa yayacuna, Éufrates jatun yacu uripi caj llajtapi causacushpa shujtaj dioscunapajta rurashca shina rurasha nishpapish, mana cashpaca cunan cancuna causacun cai llajtapi causaj amorreocunapaj dioscunapajta rurashun nishpapish alli yuyaringuichij. Ashtahuanpish ñucapish, ñuca huasi familiapish Mandaj Diospajtami rurashun– nircami.
16Shina nijpi israelcunaca:
–Mandaj Diospajta ruranata saquishpa, shujtaj dioscunapajta rurana yuyaica amataj tiyashca cachun. 17Mandaj Diosmari ñucanchijtapish, ñucanchij ñaupa yayacunatapish Egiptopi causajcunata huatashca shina paicunapajta ruracunmanta jatun mancharinacunata rurashpa llujshichimurca. Paillatajmi ñucanchij maita shamucujpipish cuidamurca. Pueblocunata shamucujpipish pai cuidajpimi pasamurcanchij. 18Mandaj Diosmi ñucanchij pasamuna llajtacunapi causajcunataca ñucanchij ñaupajmanta anchuchirca. Shinallataj cai llajtapi causaj amorreocunatapish paimi anchuchirca. Chaimanta ñucanchijpish Mandaj Diospajta rurashpami causashun ninchij. Paimi ñucanchij Dios– nircacunami.
19Chaimi Josueca:
–Mandaj Diospajtaca cancunaca mana rurai tucunguichijchu. Paica jucha illaj Diosmi. Paipajlla causachun munajmi. Cancuna paita mana cazujpica, chai juchacunamantaca manataj saquingachu. 20Mandaj Diosca chashna cashcamantami paita saquishpa shujtaj dioscunapajta rurashpa causajpica, cancunataca jatunta llaquichinga. Cancunapaj cai tucui allicunata rurashca cashpapish, tucui chingachingacamami llaquichinga– nircami.
21Chaimi israelcunaca:
–Mana chashna rurashunchu, Mandaj Diospajtami rurashun– nircacuna.
22Shina nijpi Josueca:
–Mandaj Diospajta ruranata cancunallataj agllashca jahua, cancunallataj mana pajtachishpaca cancunapaj jahuallatajmi canga– nijpimi israelcunaca:
–Ari, ñucanchij jahuallataj cana cashcata yachanchijmi– nircacuna.
23Chaimi Josueca:
–Shinashpaca cancunapaj chaupipi caj manapish dios cajcunataca tucuita anchuchishpa, israelcunata Mandaj Diosta shungucuna cumurishpa paillata cazujcunataj tucuichij– nirca.
24Shina nijpi israelcunaca Josuetaca:
–Ñucanchijca Mandaj Diospajtami rurashun, pai ima nishcatami cazushun– nircacunami.
25Chai punllallatajmi Josueca, Siquem pueblopica paicuna Mandaj Diospajta rurashuntajmi nishpa ari nishcata quillcarca. Ima shina causanata yachachishca mandashcacunatapishmi curca. 26Josueca chai shimicunataca mandashcacunata Dios quillcachishca libropimi quillcarca. Chai q'uipaca jatun rumita japishpami, Diospajlla carpa huasi c'uchupi caj encina yura ucupi churarca. 27Chashna churashpami Josueca tucui israelcunataca:
–Mandaj Dios cancunata imallata mandashcataca, cai rumimi tucuita uyarca. Cai rumica Dios ñucanchijta imallata mandashcata yuyachijmi. Cancuna Diosta p'iñachishpa imata llullagrishpapish cai rumita ricushpa, ama llullachunmi cai rumitaca caipi churani– nircami.
28Chai q'uipaca Josueca tucui israelcunata paicunapaj llajtacunaman cacharcallami.
Josué huañushcami
(Jue 2.6-10)
29Tucui chaicuna q'uipami Mandaj Diospajta ruraj Nunpaj churi Josueca patsaj chunga huatacunayuj cashpa huañurca. 30Josuetaca, Efrainpaj urcupi caj Timnat-sera shuti pai japishca allpallapitajmi pambarcacuna. Chai allpaca, Gaas urcumantaca janaj ladomanmi carca. 31Josué causacui punllacunapica, israelcunaca Mandaj Diospajllata rurashpami causarcacuna. Josué huañushca q'uipaca Mandaj Dios israelcunapaj imallata rurashcata ricuj Josuehuan huiñaillataj caj caishuj yuyajcuna causai punllacunacamallami Mandaj Diospajta rurashpa causarcacuna.
Josepaj tullucunata Siquem pueblopi pambashcami
32Israelcunaca Egiptomanta apamushca Josepaj tullucunataca, Siquem pueblopimi pambarcacuna. Chai allpataca yaya Jacobmi, Siquem shuti runapaj yaya Hamorman patsaj cullquipi randirca. Chai allpacunami Josepaj huahuacunapaj tucurca.
Eleazar huañushcami
33Aaronpaj churi Eleazarpish huañurcami. Paitaca paipaj churi Fineespaj allpapi caj urcupimi pambarcacuna. Chai allpaca, Efraín aillupaj urcupimi carca.
Currently Selected:
JOSUÉ 24: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.