JOSUÉ 23
23
Israelcunata Josué cunashcami
1Achca punllacuna q'uipami Mandaj Diosca israelcunataca paicunapaj muyundij llajtacunahuan ña mana macanacushpa sumajta causachun churarca. Josuepish achca huatacunata causashpa, ña yuyaj cashpami, 2tucui israelcunata, paicunata cunaj yuyajcunandij, mandajcunandij, juezcunandij, pushajcunandij cayachishpa cashna nirca:
“Ñucaca ña achca huatacunata causashcamanta ña yuyajmi cani. 3Cancunata Mandaj Dios cai llajtapi causajcunata cancunapaj allipaj imallata rurashcataca cancunallataj allimi ricurcanguichij. Cancunata Mandaj Diosmari cai llajtapi causajcunahuanca cancunamanta macanacurca. 4Cancuna japina cashca cai llajtacunataca, ñucami cancunapaj aillucunamanca sorteashpa curcani. Ña quichushca llajtacunatapish, manaraj quichushca llajtacunatapish, inti llujshin ladoman caj Jordán yacumantaca, inti huashicun ladoman caj mama cuchacamami chashna curcani. 5Chai manaraj quichushca llajtacunapi causajcunataca, Mandaj Diosmi cancunapaj ñaupajmanta llujshichishpa cachanga. Mandaj Dios cusha nishca shinallatajmi, chai llajtacunataca cancuna japinguichij.
6Moisesman quillcachishca mandashcataca alli ladomanpish lluqui ladomanpish amataj anchurishpa, chaitataj pajtachichun nishca mandashcataca tucui fuerzahuan pajtachishpa causanguichij. 7Cancuna, causacun cai llajtapi causaj saquirishca mana israelcunahuan ama tandanacungapajmi chashna cana canguichij. Paicunapaj dioscunatapish ama adoranguichijchu. Chai dioscunapaj shutipipish ama imata ninguichijchu, chai dioscunapajtaca ama ruranguichijchu, paicunapaj ñaupajpipish, ama cunguringuichijchu. 8Cancunaca cunancama ima shina caticushca shinallataj cancunata Mandaj Diosllata catinguichij. 9Mandaj Diosmari cai jatun llajtapi causaj sinchi achca runacunataca cancunapaj ñaupajmanta llujshichishpa cacharca. Chaimantami cunan punllacama cancunahuan macanacungapajca pi mana shayari tucuncuna. 10Mandaj Diosca pai nishca shinallataj cancunapaj allipaj pai macanacujpimi huaranga runacunatapish shujllataj manchachishpa cachanguichijlla. 11Mandaj Diosta c'uyashpaca cancunapaj causaitami cuidanguichij. 12Cai llajtapi mana israelcuna saquirishcacunahuan shujlla tucushpa, Mandaj Diosmanta caruyanguichijman. Chashna caishujmanta chaishujmanta tandacushpa, ñataj cancunapaj huahuacunatapish cazarachinguichijman. Chashna rurajpica, 13cai llajtamanta chai saquirishca gentecunataca, Mandaj Dios cancunapaj ñaupajmanta mana anchuchina cashcata yachaichij. Ashtahuanpish paicunaca laziyana angu shina cancuna churarishpa urmanapajmi canga. Cancunallatataj huashapi macana angu shina, ñahuipi casha tiyacuj shinapishmi canga. Cancunata Mandaj Dios, cancunaman cushca cai sumaj llajtamanta cancunata tucui chingachingacamami chashna llaquichishca canguichij. 14Ñucaca tucuicunallataj cai pachamanta rina ñanpimi ña yaicugrini. Chaimantami caita nini: Cancunata Mandaj Diosca, pai imalla allicunata rurasha nishcataca, shujllatapish mana saquishpami tucuita pajtachishca. Chaimanta cancunapaj tucui shunguhuan, tucui almahuan Diosta pagui nichij. 15Cancunata Mandaj Dios tucui allicunata cusha nishcacuna cancunapajman jahuanpi jahuanpi shamushca shinallatajmi, mana cazujpipish Mandaj Dios cushca sumaj llajtamanta tucui cancunata chingachingacama jahuanpi jahuanpi llaquicuna shamunga. 16Cancunahuan Mandaj Dioshuan ari ninacushcata p'aquishpa, rurashcalla dioscunata adoranaman, paicunapaj ñaupajpi cungurinaman rijpica, nina sindirij shina p'iñarishpa Mandaj Dios jatunta llaquichijpimi, cancunaca pai cushca sumaj llajtamantaca utca chingaringuichij” nircami.
Currently Selected:
JOSUÉ 23: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.