JUAN 19
19
1Chashna nijpimi Pilatoca, Jesusta azotichun mandarca. 2Soldadocunaca Jesusmanca cashayuj caspita coronata rurashpami umapica churachircacuna. Amsa puca capata p'achallichishpami, 3cashna nircacuna:
–¡Judiocunapaj jatun Mandaj allimari cangui!– nishpami ch'ajyachircacuna.
4Pilatoca cutin canllaman llujshishpami:
–Riquichij, paipica ima millaita rurashcata mana japinichu. Chaimantami cancuna entendichun cutin canllaman pushamuni– nirca.
5Jesusca casha coronata umapi churashca, amsa puca capata p'achallishcami canllaman llujshirca. Chaipimi Pilatoca:
–¡Caipimi chai runaca!– nirca.
6Jesusta ricushpaca curacunata mandajcunapish, Taita Diospaj huasita cuidajcunapish:
–¡Chacatai! ¡Chacatai!– nishpa caparinacujpimi Pilatoca:
–Ñucaca paipica ima huañuipaj juchata rurashcata mana japinichu. Cancunallataj pushashpa chacatagrichijlla– nirca.
7Chaimi judiocunaca:
–Ñucanchijca shuj mandashcatami charichij. Chai mandashcapi nishca shinaca Taita Diospaj Churimi cani nishcamantaca paica huañunatajmi can– nircacuna.
8Chashna nijta Pilato uyashpaca, ashtahuanmi mancharirca. 9Pilatoca mandashpa tiyana ucuman cutin yaicushpami Jesustaca:
–Canca ¿maimantataj cangui?– nijpi ashtahuanpish Jesusca imata mana nircachu. 10Chaimi Pilatoca:
–¿Ñucahuanchu mana rimangui? ñucaca canta chacatasha nishpaca chacatai tucushcata, cacharisha nishpapish cachari tucushcataca ¿manachu yachangui?– nirca. 11Chaimi Jesusca:
–Canca ñucata imata rurachun jahua pachamanta mana saquijpica, ñucataca imata mana rurai tucunguichu. Chaimanta ñucata canman cujca, canta yalli juchayujmari– nircami.
12Chaimi Pilatoca, ima shinapish Jesusta cacharinata yuyacurca. Chashna yuyacujpipish judiocunaca:
–Cai runata cacharishpaca, mana Cesarhuan apanacujchu cangui. Pipish jatun mandaj tucusha nijca, Cesarta p'iñajmi– nishpami caparircacuna.
13Chaita Pilato uyashpaca, Jesusta canllaman llujshichishpami, mandashpa tiyanapi tiyarirca. Chai tiyarina pambaca rumihuan rurashcami carca. Chaica hebreopica Gábata nisha ninmi. 14Pascua punllapaj allichirina chaupi punlla shinatami Pilatoca judiocunataca:
–¡Caipimi cancunata jatun Mandajca!– nijpi,
15paicunaca:
–¡Paitaca chacatashpa huañuchilla!– nishpa caparircacuna.
Chaimi Pilatoca:
–¿Cancunata jatun Mandajtachu chacatasha?– nijpi, curacunata mandajcunaca:
–¡Ñucanchijca Cesarllatami jatun mandajtaca charinchij!– nircacuna.
16Chaimi Pilatoca, chacatashpa huañuchichun paicunaman cujpi, Jesustaca pushashpa rircacuna.
Jesusta chacatashcami
(Mt 27.32-50; Mr 15.21-37; Lc 23.26-49)
17Jesusca paita chacatana cruzta aparishcami, Uma Tullu shuti urcuman llujshirca. Chai urcuca Hebreopica Gólgota nisha ninmi. 18Chaipimi shujtaj ishqui runacunandij, Jesustaca chaupipi churashpa chacatarcacuna. 19Pilatoca: “Caica Nazaretmanta Jesusmi, judiocunata jatun Mandajmi” nishpa quillcashcatami, cruz jahuapi churachirca. 20Jesusta chacatashcaca, Jerusalén c'uchullapi cajpimi, chai quillcataca achca judiocuna rezarcacuna. Chai quillcaca hebreo, griego, latín rimaicunapimi carca. 21Chaita ricushpaca, judiocunapaj curacunata mandajcunami Pilatotaca:
–“Judiocunata jatun Mandaj” nishpaca, mana quillcanachu carcangui. Ashtahuanpish: “Caica judiocunata jatun Mandajmi cani nishpa paillataj nirijmi carca” nishpami quillcana carcangui– nigrircacuna.
22Ashtahuanpish Pilatoca:
–Ima shina quillcashcaca, chashnami saquiringa– nircami.
23Soldadocunaca Jesusta chacatashpaca, Jesuspaj churanacunataca chuscu soldadocunami shuj shuj japircacuna. Ucu churanatapishmi japircacuna. Chaica mana sirashca, jahuamanta ucucama tucui muyushpa ahuashcami carca. 24Chaimantami caishuj chaishuj cashna nircacuna:
–Caitaca ama lliquishpa chaupishunchijchu, maijanpaj urmachunpish chai churana jahuallapitaj sorteashunchij– nircacunami.
Chashna rurajpica:
“Ñuca churanacunataca, paicunapurami chaupircacuna.
Ñuca churana jahuallapitajmi sortearcacuna” nishpa Quillcachishcami pajtarca.
Soldadocunaca chashnatajmi rurarcacuna. 25Jesusta chacatashca cruz c'uchupica, paipaj mamapish, paipaj mamapaj ñañapish, Cleofaspaj huarmi Mariapish, Magdalamanta Mariapishmi carcacuna. 26Jesusca, paipaj mamata, paipaj c'uyashca yachacujta chaipi cajta ricushpami paipaj mamataca:
–Huarmi, paimi cambaj churi– nirca.
27Shinallataj yachacujtapish:
–Riqui, paimi cambaj mama– nirca.
Chai pachamantami yachacujca, Jesuspaj mamataca paipaj huasiman pusharca.
28Chai q'uipaca, Jesusca ña tucuita tucuchishcata yachashpa, Quillcachishcapi nishca pajtachunmi:
–¡Yacunanca!– nijpi,
29soldadocunaca shuj mangapi vinagre junda tiyacujpimi, esponjata satishpa hisopo caspi puntapi churashpa, Jesuspaj shimiman pajtachirca. 30Jesusca vinagreta ubyashpaca:
–¡Ña tucuchishcami!– nishpaca, umata huarcushpa paipaj espirituta Taita Diosman mingashpa huañurcallami.
Jesuspaj costillapi lanzahuan satishcami
31Chai punllaca, Pascuapaj judiocuna allichirinami carca. Chaimantami samana punllapajca, huañushcacuna cruzpi ama saquirichun, changacunata p'aquishpa paicunata anchuchichun Pilatota nigrircacuna. (Chai samana punllapica jatun fiestami cana carca). 32Chaimi soldadocunaca Jesushuan chacatashcacunapajman chayashpaca, caishujpaj chaishujpajtapish changacunata p'aquircacuna. 33Jesuspajman c'uchuyashpaca, paitaca ña huañushca cajta ricushpami, changacunataca mana p'aquircacuna. 34Shuj soldadollami paitaca costilla quinripi lanzahuan satijpi yahuarndij, yacundij llujshirca. 35Chashna tucushcata ricujmi huillani. Chashna ricushcataca ima shina cashcatataj yachashcamantami huillani. Cancunapish crichunmi, chashnaca huillani. 36Tucui caicunaca: “Paipaj tulluca shujllapish mana p'aquishcachu canga” nishpa Quillcachishcapi nishca pajtachunmi, chashnaca tucurca. 37Shinallataj Taita Dios Quillcachishca shujtajpipish: “Paita lanzahuan satijtapish ricungacunami” nicunmi.
Jesusta pambashcami
(Mt 27.57-61; Mr 15.42-47; Lc 23.50-56)
38Tucui chaicuna chashna tucushca q'uipami Arimateamanta Joseca, Jesuspaj cuerpota apangapaj Pilatota mañagrirca. Pilatoca apailla nijpimi, Jesuspaj cuerpotaca apashpa rirca. Joseca judiocunata manchashcamanta, pacalla Jesuspaj yachacujmi carca. 39Sarunman Jesuspajman tuta shamuj Nicodemopishmi shamurca. Paica mishquijllata ashnacujta, mirrahuan, aloehuan chagrushcatami, patsaj libra shinata apamurca. 40Paicuna Jesuspaj cuerpota apashpaca, judiocuna ima shina ruraj cashca shinallatajmi, mishquijllata ashnacujhuan churashpa linsocunahuan pilluchircacuna. 41Chai chacatashca c'uchullapimi, shuj huerta tiyarca. Chai huertapica pita manaraj churashca, mushuj jutcumi tiyarca. 42Pascuapaj judiocuna allichirina punlla ñalla tucurigrijpimi, chai jutcupish c'uchullapi cashcamanta, Jesuspaj cuerpotaca chaipi churarcacuna.
Currently Selected:
JUAN 19: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.