JUAN 20
20
Jesús causarishcami
(Mt 28.1-10; Mr 16.1-8; Lc 24.1-12)
1Semana callari tutamanta manaraj alli pacarijpimi, Magdalamanta Mariaca, Jesusta pambashca jutcuman rirca. Chaiman chayashpaca, jutcumanta rumita anchuchishcatami ricurca. 2Chaimantaca Simón Pedropajman, Jesús c'uyashca caishuj yachacujpajmanpish callpashpa rishpami paica:
–Mandaj Jesustaca jutcumanta apashcacunamari. Maipichari churarcacuna, mana yachanchijchu– nirca.
3Chaimi Pedropish, caishuj yachacujpish llujshishcahuan jutcuman rircacuna. 4Ishquindij callpashpa rishpaca caishuj yachacujca, Pedrota mishashpami jutcumanca punta chayagrirca. 5Paica cumurishpa ricushpami, linsocunalla chaipi cajta ricurca. Ashtahuanpish mana yaicurcachu. 6Simón Pedroca, paipaj q'uipa chayashpaca jutcuman yaicujta rishpami linsocunalla chaipi cajta ricurca. 7Jesuspaj umata c'hungullichishca linsoca, mana caishuj linsocunahuanchu cashca carca. Pilluchishpa ch'ican churashcami cashca carca. 8Chai q'uipami, jutcuman punta chayaj caishuj yachacujpish yaicurca. Chaita ricushpami crirca. 9Quillcachishcapi nishca shina: Huañushcacunapaj chaupimanta Jesús causarinataj cashcataca, manaraj entendircacunachu. 10Chashna ricushpaca yachacujcunaca paicunapaj huasiman tigrarcallacunami.
Magdalamanta Mariaman Jesús ricurishcami
(Mr 16.9-11)
11Ashtahuanpish Mariaca jutcu c'uchupi canllallaman huacacushpami, chai jutcu ucuta cumurishpa ricurca. 12Chashna ricushpaca Jesuspaj cuerpota maipi churashca cashcapi ishqui angelcuna yurajlla churanata churashca shujca umaman, caishujca chaquiman tiyacujtami ricurca. 13Chai angelcunaca:
–Huarmi ¿imamantataj huacacungui?– nijpi, chai huarmica:
–Ñuca Mandaj Jesustamari apashcacuna. Paita maipi churashcatamari mana yachani– nirca.
14Shina nishcahuan tigrarishpa ricujpica, Jesusmi chaipi shayacushca carca. Ashtahuanpish paica Jesús cashcataca mana rijsircachu. 15Jesusca:
–Huarmi ¿imamantataj huacacungui? ¿Pitataj mashcacungui?– nijpimi, huertata allichijmi yuyashpa chai huarmica:
–Mandaj Jesusta, can apashca cashpaca, maipi churashcata huillahuai, ñuca apangapaj– nirca.
16Chaimi Jesusca:
–¡María!– nijpi, pai tigrarishpaca:
–¡Raboni!– nirca. (Raboni nishcaca: “Yachachij” nisha ninmi).
17Chaimi Jesusca:
–¡Ama ñucapi charirichu! ñuca Yayapajman manaraj huichiyanichu. Ñuca Yayapajman, cancunapaj Yayapajman, ñuca Taita Diospajman, cancunapaj Taita Diospajman huichiyagrinimi ninmi nishpa ñuca huauquicunaman huillagri– nircami.
18Chaimi Magdalamanta Mariaca, Mandaj Jesusta ricushcata, tucui pai imalla nishcacunatapish yachacujcunaman huillagrirca.
Yachacujcunaman Jesús ricurishcami
(Mt 28.16-20; Mr 16.14-18; Lc 24.36-49)
19Chai punllallataj semana callari ña tutayacujpimi, yachacujcunaca judiocunata manchashcamanta pungucunata huichcashpa tandanacushpa tiyacurcacuna. Chaipimi Jesusca paicunapaj chaupipi shayarishpaca:
–¡Sumaj causai cancunahuan cachun!– nirca.
20Chashna nishpaca paipaj maquicunata, costillatapishmi ricuchirca. Yachacujcuna Mandaj Jesusta ricushpaca, yallitajmi cushicurcacuna. 21Jesusca cutinllatajmi paicunataca:
–¡Sumaj causai cancunahuan cachun! Ima shinami Yaya ñucata cacharca, chashnallatajmi ñucapish cancunataca cachani– nircami.
22Chashna nishpa paicunata p'ucushpaca cashnami nirca:
–Jucha illaj Espirituta chasquichij. 23Maijanpaj juchacunata cancuna perdonajpica, Taita Diospish paitaca perdonangami. Maijanpaj juchacunata cancuna mana perdonajpica, Taita Diospish paitaca mana perdonangachu– nircami.
Jesús causarishcata Tomás mana crishcami
24Ishqui huacharishca Tomasca chunga ishqui yachacujcunapuramantami carca. Paica Jesús ricurinapajca mana paicunahuanchu carca. 25Tomás chayamujpica caishuj yachacujcunaca:
–Mandaj Jesustami ricurcanchij– nijpimi paica:
–Paipaj maquicunapi clavocuna jutcushcata mana ricushpa, ñuca dedota clavocuna jutcushcapi mana satishpa, paipaj costillapi ñuca maqui dedota mana satishpaca, mana crishachu– nirca.
26Pusaj punlla q'uipami, cutin chai yachacujcunaca, Tomasndij huasi pungucunata huichcarishca tiyacurcacuna. Jesusca pungucuna huichcashca cajllapitaj yaicushpa paicunapaj chaupipi shayarishpaca:
–¡Sumaj causai cancunahuan cachun!– nirca.
27Chaipimi Jesusca Tomastaca:
–Cambaj dedota ñuca maqui chugripi churashpa ricui. Cambaj maquita chutashpa, ñuca costillas quinripi sati. Ama mana crij caichu, ashtahuanpish crij cairi– nijpimi,
28Tomasca:
–¡Ñucata Mandaj, ñuca Taita Dioslla!– nirca.
29Chaimi Jesusca:
–Tomás, ñucataca ricushcallamantami canca cringui. Ñucata mana ricushpapish crijcunaca, cushichishcacunami– nirca.
Cai librotaca imapaj quillcashca cashcami
30Jesusca paipaj yachacujcunapaj ñaupajpica, pi mana ruraipajcunataca achcatami rurarca. Chaicunataca cai libropica mana quillcashcachu. 31Jesustaca Quishpichij Cristo cashcata, Taita Diospaj Churi cashcatapish crishpa paimanta huiñai causaita charichunmi cai tucui quillcataca quillcashca.
Currently Selected:
JUAN 20: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.