JUAN 13
13
Yachacujcunapaj chaquicunata Jesús maillashcami
1Pascua fiesta callarinapajca ashallami illarca. Jesusca, cai pachamanta Yayapajman rina ña chayamugrishcata yachashpami, cai pachapi caj paipajcunataca, sarunmanpish c'uyaj cashpa, cunanpish ima shina achcata c'uyashcata ricuchisha nirca. 2Jesusca paipaj yachacujcunandijmi micucurca. Simonpaj churi Judas Iscariotepaj shungupica, ñaupamanmi diabloca Jesusta huañuchichun japichina yuyaita churashca carca. 3Jesusca paipaj maquipi paipaj Yaya Dios tucuita churashcata, Taita Diospajmanta shamushcata, Taita Diospajman cutin tigrana cashcatapishmi yacharca. 4Chaimi micucushcamanta jatarishpa, paipaj jahua churanata llujshichishpa, shuj linsota japishpa chumbillirirca. 5Chai q'uipaca shuj bateapi yacuta churashpami, yachacujcunapaj chaquicunata maillai callarirca. Chumbillishca linsohuanca chaquicunatami chaquichirca. 6Simón Pedropaj chaquita maillasha nijpimi:
–Mandaj Jesús, ¿Maitataj ñuca chaquicunata quiquinca maillanguiyari?– nirca.
7Chaimi Jesusca:
–Ñuca imapaj chashna rurashcataca, cunanca manaraj entendinguichu, ashtahuanpish q'uipatamari imapaj cashcataca entendingui– nijpimi,
8Pedroca:
–Ñuca chaquicunatatajca manataj maillanguichu– nijpimi Jesusca:
–Cambaj chaquicunata ñuca mana maillajpica, ñucapajta rurajca mana cai tucunguichu– nirca.
9Chaimi Simón Pedroca:
–Mandaj Jesús, ama ñuca chaquicunallata maillahuaichu. Ashtahuanpish maquicunandij, umandij armachihuai– nirca.
10Chaimi Jesusca:
–Maijanpish cunanlla armashca cashpaca, tucui chuya cashcamanta mana cutin armanchu, chaquicunallatami maillarin. Cancunaca mana tucuicuna chuya cashpapish, chuyayachishcami canguichij– nircami.
11Jesusca, pi paita huañuchichun cuna cashcataca yachashcamantami: “Mana tucuicunachu chuya canguichij” nirca.
12Chaquicunata tucui maillashca q'uipaca, paipaj jahua churanata churarishpa mezapi cutin tiyarishpami cashna nirca:
–¿Cancunata ñuca imapaj chashna rurashcataca entendinguichijchu? 13Cancuna ñucataca Yachachij nishpapish, Mandaj nishpapish allitamari ninguichij, chaillatajmari cani. 14Ñucaca cancunapaj Mandaj cashpapish, Yachachij cashpapish, cancunapaj chaquicunatami maillani. Cancunapish chai shinallatajmi, caishuj chaishujta maillana canguichij. 15Caitaca cancunapish ñuca rurashca shinallataj rurachunmi ricuchini. Cancunapish ñuca rurashca shinallataj ruraichij. 16Amopajta rurajca mana paipaj amota yallichu. Mandashpa cachashcapish mana cachajta yallichu. Chaica chashnatajmi. 17Cai nishcacunata alli entendishpa chaitataj rurashpaca cushichishcami canguichij.
18Mana tucui cancunatachu chashna nini. Maijanlla ñuca agllashcataj cajtaca yachanimi. Ashtahuanpish: “Ñucahuan micujllatajmi, ñucataca jaitanga” nishpa Quillcachishca pajtachunmi chashna tucun. 19Chashna tucujpica ñuca pi cani nishcata crichunmi ñaupaman cancunamanca huillani. 20Pipish ñuca cachashcata chasquijca, ñucatami chasquin. Pipish ñucata chasquijca, ñucata cachajtami chasquin. Chaica chashnatajmi– nircami.
Judasca Jesuspaj yachacuj cashca jahuallataj paita japichina cashcata huillashcami
(Mt 26.20-25; Mr 14.17-21; Lc 22.21-23)
21Chashna nishca q'uipami Jesusca yallitaj llaquirishpa:
–Cancunamanta shujmi ñucataca huañuchichun cunga. Chaica chashnatajmi canga– nirca.
22Chaimi yachacujcunaca, maijanta chashna nicushcata mana yachashpa caishuj chaishuj ricunacurcacuna. 23Paipaj yachacujcunamanta Jesús c'uyashca shuj yachacujmi, Jesuspaj c'uchupi quinrilla sirishpa micucurca. 24Paitami Simón Pedroca, pita chashna nicushcata tapuchun señaschirca. 25Chaimi paica, Jesuspi huancarishpaca:
–Mandaj Jesús ¿maijantaj canta japichijca?– nijpi,
26Jesusca:
–Tandata ñuca pimanmi nuyuchishpa cuni, chaimi canga– nirca.
Tandata nuyuchishpaca, Simonpaj churi Judas Iscariotemanmi curca. 27Chai tandata japincami Satanasca Judaspi yaicurca. Chaimi Jesusca:
–Imata ruracushcataca ña utca ruragrilla– nirca.
28Mezapi Jesushuan micucujcunaca, imata nisha nishpa chashna nishcataca pi mana entendircacunachu. 29Judasca cullquita huaquichijmi carca. Chaimantami maijancunaca: “Fiestapaj imalla illashcata randigri”, mana cashpaca: “Huajchacunaman ashata cugri” nishpa, Jesús mandashca canata yuyarcacuna. 30Judasca chai tandata micushcahuan llujshishpa rircallami. Ña tutami carca.
Manaraj mandashcata mandashcami
31Judas ña llujshishpa rijpica Jesusca cashnami nirca:
–Runa Aichayuj tucushcaca cunanmi tucuita rurai tucuj cashcata ricuchishca canga. Taita Dios tucuita rurai tucuj cashcapish Runa Aichayujmantami ricunringa. 32Taita Dios tucuita rurai tucuj cashcataca Churimi ricuchin. Taita Diosca Churillapitajmi tucuita rurai tucuj cashcaca ricuringa. Chashna cashcataca Taita Diosca ñami ricuchigrin. 33Huahuacuna, ashacamallami caipi cancunahuan tiyacuni. Cancunataca judiocunata nishca shinallatajmi nini: Ñucataca mashcanguichijmi. Ñuca maiman ricunmanca, cancunaca mana ri tucunguichijchu. 34Ñucaca cancunataca manaraj mandashcatami mandani. Cancunaca caishuj chaishuj c'uyanacuichij. Ima shinami ñuca cancunata c'uyarcani, chashnallataj cancunapish caishuj chaishuj c'uyanacuichij. 35Chashna caishuj chaishuj c'uyanacujpimi, cancunataca ñuca yachacujcunataj cashcata tucuicuna rijsingacuna– nircami.
Pedroca Jesusta mana rijsinichu nina cashcata Jesús huillashcami
(Mt 26.31-35; Mr 14.27-31; Lc 22.31-34)
36Simón Pedroca:
–Mandaj Jesús ¿maimantaj ricungui?– nijpi Jesusca:
–Ñuca maiman ricunmanca, cunanllatajca mana ri tucunguichu. Q'uipatami catingui– nirca.
37Chaimi Pedroca:
–Mandaj Jesús ¿ima nishpataj cunanllatajca mana ri tucuni? ¡Ñucaca canmantaca huañuna cajpipish huañushallami!– nijpimi,
38Jesusca:
–¿Canca ñucamantaca huañui tucunguichari? Ashtahuanpish gallo manaraj cantajpimi quimsa cutin ñucataca mana rijsinichu ningui. Chaica chashnatajmi canga– nircami.
Currently Selected:
JUAN 13: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.