GÉNESIS 50
50
1Joseca paipaj yayata ugllarishpa muchashpami huacarca. 2Joseca paipaj jambijcunataca, paipaj yayapaj aichata sumaj mishquijllata ashnaj jambicunahuan churachun mandajpimi, jambijcunaca Israeltaca sumaj mishquijllata ashnaj jambicunahuan churarca. 3Chai jambicunahuanca chuscu chunga punllacunapi churaj cashca shinallatajmi Israeltapish chuscu chunga punllacunapi tucui churarcacuna.
Egipciocunaca canchis chunga punllacunacamami huacarcacuna. 4Joseca llaquilla cana punllacuna tucurijpimi, faraonpaj huasipi caj mandajcunataca:
–Cancunapaj ñaupajpi ñuca alli cashca cajpica, faraonhuan cashna nishpa parlagrichunmi rogani. 5Ñuca yayami: Ñucaca ñami huañugrini. Ñucataca Canaanpi caj ñucallataj allashca jutcupi churangui nishpa ari nichirca. Cunanca ñuca yayata pambashpa tigramugrichun cachahuai ninmi nipagrichij– nircami.
6Faraonca:
–Cambaj yaya ari nichishca shina paita pambanaman rilla– nircami.
7José paipaj yayata pambanaman huichiyajpica, faraonpajta rurajcunapish, faraonpaj huasipi caj cunaj yuyajcunapish, tucui Egiptopi caj cunaj yuyajcunapish, 8Josepaj huasi ucupuracunapish, paipaj yayapaj huasi ucupuracunaca tucui huauquicunami paihuan huichiyarcacuna. Gosenpica paicunapaj uchilla huahuacunata, paicunapaj ovejacunata, paicunapaj huagracunallatami saquishpa rircacuna. 9Carrocunapi purij soldadocunapish, caballocunapi purij soldadocunapish paihuanmi huichiyarcacuna. Tucui paicunami huashan huashan sumajta filapi Josehuan rircacuna. 10Jordán yacumanta inti llujshin ladoman caj Atad nishca trillana pambaman chayashpaca, llaquijllatami jatunta huacarcacuna. Chaipimi Joseca paipaj yayamantaca canchis punllacunata llaquilla carca.
11Atad nishca trillana pambapi huacacujta ricushpami, chaipi causaj cananeocunaca: “Egipciocunaca paicunapaj yallitaj alli nishca huañushcamanta huacanatami huacacuncuna” nircacuna. Chaimi Jordanmanta ch'imba ladoman caj chai pambataca, Abel-mizraimta shutichircacuna.
12Paipaj churicunaca, pai mandashca shinallataj rurashpami, 13Canaanman apashpa Macpela allpapi caj jutcupi churarcacuna. Chaitaca Abrahammi paicunapura pambarinapaj heteo Efronman randishca carca. Chai allpaca Mamre pueblomantaca inti llujshin ladomanmi. 14Joseca paipaj yayata ña pambashpaca, paipaj huauquicunandij paipaj yayata pambangapaj tucui huichiyajcunandijmi Egiptollamantaj tigrarcacuna.
Joseca paipaj huauquicunataca mana llaquichishachu nishcami
15Josepaj huauquicunaca yaya huañushca q'uipami: “Joseca, paita ñucanchij llaquichishcamantaca ñucanchijtapish llaquichingallapishmi” ninacurcacuna. 16Chaimi paicunaca Josepajmanca: “Cambaj yayaca manaraj huañushpami, cashna mandarca: 17Josetaca cashna ninguichij: Cambaj huauquicuna canta mana allita rurashcataca perdonangui nishpami rogarca. Chaimanta cunanca pai nishca shinallataj cambaj yayapaj Taita Diospajta rurajcuna canta mana allita rurashcataca perdonapai nichunmi cacharca”. Chashna nijpica Joseca huacarcami. 18Josepaj huauquicunapish paipajman chayashpaca, paipaj ñaupajpi pambaman tupajta cumurishpami:
–Cunanca caipimi charingui. Cambajta rurajcunami canchij– nircacuna.
19Chaipimi Joseca:
–Ama manchaichijchu. Ñucaca Taita Diospaj randi llaquichij cashpatajmari llaquichishari. 20Cancunaca ñucata llaquichinatatajmari yuyarcanguichij. Ashtahuanpish cunan ñucanchij ricucunta rurangapajmari Taita Dios chashna rurachishca. Achca gentecuna causaiyuj catichunmi cashna rurashca. 21Cunanca ama manchaichijchu. Cancunamanpish, cancunapaj huahuacunamanpish ñucami carasha– nishpami, Joseca paipaj huauquicunataca shunguman yaicujta rimashpa cushichirca.
José huañushcami
22Joseca Egiptopimi causarca. Paipish paipaj yayapaj huasi ucupurapish chaipimi causarca. Joseca 110 huatacunatami causarca. 23Joseca Efrainpaj churicunataca quimsa huahua huahuacamami ricurca. Manasespaj churi Maquirpaj huahuacunaca Josepaj changa jahuapi huiñachishcacunami carca.
24Shuj punllaca Joseca paipaj huauquicunataca: “Ñucaca ñami huañugrini. Taita Dios cancunata ricuj shamushpami, cancunataca cai llajtamanta huichiyachishpa Abrahamman, Isaacman, Jacobman cushatajmi nishca llajtaman pushanga” nircami. 25Joseca Israelpaj churicunataca: “Taita Diosca cancunataca ricuj shamungatajmi. Chaipica cancunaca ñuca tullucunataca apashpa ringuichij” nishpami ari nichirca.
26Joseca, 110 huatacunayuj cashpami huañurca. Paitaca sumaj mishquijllata ashnaj jambicunahuan churashpami, shuj ataudpi churashpa Egiptopi churarcacuna.
Currently Selected:
GÉNESIS 50: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.