ÉXODO 20
20
Chunga mandashcacunata Dios cushcami
(Dt 5.1-21)
1Taita Diosca tucui cai shimicunatami rimarca:
2“Ñucaca cancuna Egiptopi huatashca shina llaquinayajta causacujpi llujshichimuj Mandaj Dios cancunapaj Diosmi cani.
3Ñucapaj randi shujtaj dioscunata ama charinguichij.
4Imaman rijchajcunatapish ama ruranguichijchu. Jahua pachapi cajcunaman rijchajtapish, cai pachapi cajcunaman rijchajtapish, yacu ucupi cajcunaman rijchajtapish, amataj ruranguichijchu. 5Chaicunataca ama cunguringuichijchu, amataj adoranguichijchu. Ñucami Mandaj cambaj Taita Dios cani. Ñucaca tucuita rurai tucuj Dios, ñucapajlla cachun munajmi cani. Yayacuna ñucata p'iñashpa millaita rurajpica paicunapaj quimsa huahua huahuacama, mana cashpacarin chuscu huahua huahuacunacama jatunta llaquichijmi cani. 6Ñucata c'uyashpa, ñuca mandashcacunata huaquichijcunataca, huaranga huaranga huahua huahuacunacama llaquijmi cani.
7Mandaj cambaj Diospaj shutipica manapish rimanapica ama rimangui. Ñuca shutita manapish rimanapi rimajtaca llaquichishatajmi.
8Samana punllapica ñucapajlla cashcataca amataj cungaringui. 9Sujta punllataca trabajangui, cambaj tucui ima ruranacunataca chai punllacunapi rurangui. 10Canchis punllapica Mandaj cambaj Diospajlla cashcamanta, chai punllapica ama imata rurangui. Cambaj churicunatapish, ushushicunatapish, cambajta ruraj c'aricunatapish, huarmicunatapish, animalcunatapish, shujtaj llajtamanta shamushpa canta catishpa causajcunatapish amataj imata rurachinguichijchu. 11Mandaj Diosca jahua pachatapish, cai pachatapish, mama cuchatapish, tucui chaicunapi imalla tiyajcunatapish sujta punllacunapimi tucuita rurarca. Canchis punllapica samarircami. Chaimantami Mandaj Diosca chai punllataca paipajlla cachun ch'icanchirca.
12Mandaj cambaj Dios canman cushca llajtapi unita causangapajca, cambaj yayata cambaj mamata alli ningui. 13Ama huañuchingui.
14Ama huainayangui.
15Ama shuhuangui.
16Ama pitapish p'iñashpa manapish cashcata llullashpa llaquipi churangui.
17Shujtajpaj huasita, paipaj huarmita cashpa, paipajta rurajta cashpa, pai huiñachishcata cashpa, paipaj huagrata cashpa, paipaj burrota cashpa, paipaj shujtaj ima charishcacunatapish ama munangui” nishpami mandarca.
Israelcunaca Taita Diosta mancharishcami
(Dt 5.22-23)
18Tucui israelcunami culun nicujtapish, achij nicujtapish, bocinapi tocashcatapish, chai urcu cushnicujtapish imalla tucujta alli ricuracurcacuna. Chaita ricushpa manchaihuan cashpami israelcunaca carullamanta chaparacurcacuna. 19Chaimi Moisestaca:
–Quiquinlla Dioshuan rimashpa ñucanchijman huillai, ñucanchijca uyashunllami. Dios ñucanchijhuan rimajpica huañushunllatajmari– nircacuna.
20Shina nijpi Moisesca israelcunamanca:
–Ama manchaichijchu, Taita Diosca paita manchashpa ama juchallichun cazujta mana cazujta ricungapajmari shamurca– nircami.
21Israelcuna chashna caruman chapacujpica, Moisesca Taita Dios maipi can amsallamanmi c'uchuyarca.
Altarta ima shina rurachun mandashcami
22Mandaj Diosca Moisestaca: “Israelcunataca cashna ni: Cancunaca jahua pachamanta ñuca cancunahuan rimashcataca ricurcanguichijmi. 23Cancunaca ñucapaj randi adorangapaj curimanta, cullquimanta dioscunataca ama ruranguichij. 24Cancunaca ñucapaj allpa altarta rurashpa ñucaman cushpa tucui rupachinatapish, ñucahuan alli cangapaj cunatapish cancunapaj ovejacunata, cancunapaj vacacunata chai altar jahuapi cunguichij. Maipimi ñuca shutita yuyaringuichij nishpa mandani chaipitaj ñuca shutita yuyaricujpica ñucaca cancunapajman shamushpami alli cashca cachun nisha. 25Ñucapaj altarta rumicunahuan rurashpaca, labrashca rumicunahuanca ama ruranguichijchu. Fierrocunahuan tacashpaca yangatami ruranguichij. 26Ñuca altartaca gradacunayujta rurashpa chaita huichiyanguichijman. Chaita huichiyajpica cancunapaj pinganayaj aicha ricuringami ninmi ningui” nircami.
Currently Selected:
ÉXODO 20: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.