ÉXODO 19
19
Israelcuna Sinaiman chayashcami
1Israelcunaca Egiptomanta llujshishcamanta quimsa quilla callari punllami Sinaí shuti shitashca urcuman chayarcacuna. 2Refidim nishca pambamanta rishpa, chai Sinaí shitashca urcu chaquiman chayashpaca, Sinaí urcu ch'imbapurallapimi carpa huasicunata shayachishpa israelcunaca tiyarircacuna. 3Moisés Taita Dioshuan tupangapaj Sinaí urcuman huichiyajpica, Mandaj Diosca chai urcumanta cayashpami: –Jacobpaj huahua huahuacunaman cashna ni. Israelcunamanca caita huillai: 4Egipciocunata ñuca imallata rurashcataca cancunallataj ricurcanguichijmi. Cancunataca águila alas jahuapi apamuj shinami ñucapajmanca apamurcani. 5Ñuca imalla nishcata uyashpa ñucahuan ari ninacushcata pajtachishpaca, tucui cai pachapi causajcunamanta yalli sumaj huaquichishcacunami canguichij. Tucui cai pachaca ñucapajmi. 6Cancunaca ñuca mandana llajtapi causana curacunapish, jucha illaj runacunapishmi canguichij ninmi nishpa, cai tucui shimicunata israelcunaman huillangui– nircami.
7Moisés chaimanta tigrashpaca israelcunata cunaj yuyajcunata cayashpami, Mandaj Dios tucui imalla mandashcata paicunapaj ñaupajpi huillarca. 8Tucui israelcunami:
–Mandaj Dios tucui imalla nishcataca rurashunllami– nishpa, shuj shinalla cutichircacuna.
Tucui israelcuna imalla nishcata Moisés Mandaj Diosman huillajpimi, 9Mandaj Diosca Moisestaca:
–Israelcuna ñuca canhuan rimacujta uyashpa can huillajpi crichunca ñucaca amsa p'uyupimi cambajmanca shamugrini. Chaipimi cambaj tucui causaipi can mana nij tucujlla cashcata cringacuna– nijpimi, tucui israelcuna imalla nishcata Moisesca Mandaj Diosman huillarca. 10Mandaj Diosca Moisestaca:
–Israelcunapajman ri, paicunataca ñucapajlla cachun cunanpish cayapish chuyayachigri. Paicunapaj churanacunatapish tajshashpa, 11quimsa punllapajca allichirishcacuna cachun ni. Quimsa punllapica Mandaj Diosca tucui israelcuna ricucujpimi, Sinaí urcu jahuaman uriyamunga. 12Cai urcuman paicuna ama huichiyachunca, urcu muyundijta maicamalla paicuna c'uchuyana cashcata ricuchishpa cashna ni: Cai urcumanca ama huichiyanguichijchu. Maicama c'uchuyai tucushcata ricuchishcamanpish ama c'uchuyanguichijchu. Maijanpish cai urcuman c'uchuyajca huañungatajmi ningui. 13Maijan runa cashpa, animal cashpa urcuman huichiyajpica ama maquihuan huañuchichuncuna. Ashtahuanpish rumicunahuan shitashpa, mana cashpaca puntajlla caspita shitashpalla huañuchichuncuna. Urcuman c'uchuyajtaca runa cachunpish, animal cachunpish huañuchishcataj cachun. Cai urcumanca cornetacunapi sinchita tocashca uyarijllapi huichiyachuncuna– nircami.
14Moisesca israelcunapajman urcumanta uriyamushpaca, paicunatami chuyayachirca. Paicunaca paicunapaj churanacunatami tajsharca. 15Moisesca israelcunataca:
–Caimanta quimsa punllapajca allichirishca canguichij. Huarmicunapipish ama chayaringuichijchu– nishpami mandarca.
16Quimsa punllapaj pacarimujpica culun nishpa, achij nishpa amsa p'uyu chai urcuta tapajpica, cornetapi sinchita tocashcami uyarirca. Chaita uyashpaca carpa huasicunapi caj tucui israelcunami chujchushpa mancharircacuna. 17Taita Diosta tupanaman ringapaj Moisés israelcunata carpa huasicunamanta llujshichishpa pushajpimi, paicunaca urcu chaquillapi shayarircacuna. 18Mandaj Dios chai urcu jahuaman nina chaupipi uriyamujpimi tucui chai Sinaí urcu cushnirca. Hornomanta cushni llujshicuj shinami cushni llujshirca. Tucui chai urcuca yallitajmi chujchurca. 19Bocinapi tocashcapish ashtahuan ashtahuan sinchitami uyarishpa catirca. Moisés Taita Dioshuan rimajpica, Taita Diosca culun nicuj rimaihuanmi cutichirca.
20Sinaí urcu jahuaman Mandaj Dios uriyamushpaca, chai urcu puntamantami Mandaj Diosca Moisesta cayajpi paica chai urcu puntaman huichiyarca. 21Chaipimi Mandaj Diosca Moisestaca:
–Caimanta uriyashpa, israelcunataca cashna ni: Mandaj Diosta ricungapaj cai ñuca ricuchishcata ñataj pasanguichijman. Chaita pasajcunaca achcacunami huañunga. 22Mandaj Diospajman c'uchuyanapaj caj curacunapish chuyayachun. Paicunatapish Mandaj Dios ama llaquichichun nishpa mandagri– nircami.
23Chaimi Moisesca Mandaj Diostaca:
–Sinaí urcumanca maicamalla c'uchuyana cashcata churashpa, cai urcutaca cambajllata rurachun nishcata israelcunaca yachashcamanta ña mana cai Sinaí urcumanca huichiyamui tucungacunachu– nirca.
24Shina nijpipish, Mandaj Diosca:
–Uriyashpa Aaronta pushashpa tigramugri. Ashtahuanpish curacuna, tucui israelcunaca: Mandaj Dios maipi cashcaman huichiyangapaj, maicamalla c'uchuyana cashcataca ama pasashpa huichiyachun. Paicunatapish Mandaj Dios ama llaquichichun ninmi nigri– nircami.
25Moisés uriyashpaca, Mandaj Dios imalla nishcatami israelcunaman huillarca.
Currently Selected:
ÉXODO 19: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.