2 REYES 1
1
Ocozías huañushcami
1Jatun mandaj Acab huañushca q'uipami, moabitacunaca c'ari c'ari tucushpa israelcunahuan macanacungapaj jatarircacuna.
2Ocoziasca Samariapi caj paipaj huasi shuj ventanamanta urmashpa ungushca cashpami: “¿Cai ungüimantaca alliyashachu, manachu alliyasha imashi? nishpa Ecronpi causajcunapaj Baal-zebub diosta tapugrichij” nishpa huillashpa purijcunata cacharca. 3Chaimi Mandaj Diospaj angelca tisbita Eliastaca: “Jatari, Samaria pueblota jatun mandaj cachashca huillashpa purijcunahuan tupanaman huichiyashpa paicunataca: ¿Israelpica Dios mana tiyajpichu, Ecronpi causajcunapaj Baal-zebub diosta tapunaman ricunguichij? 4Chai diosta tapunaman cachashcamanta cunanca Mandaj Diosca: Camapi ungushca siricunmantaca mana jataringuichu huañunguitajmi. Chashnatajmi canga ninmi ningui” nircami.
Chashna nijpica Elías rishpaca, chashnallatajmi huillarca. 5Jatun mandajca pai cachashca huillashpa purijcuna ña tigrajpica:
–¿Ima nishpataj utca tigramunguichij?– nircami.
6Chaimi paicunaca:
–Shuj runahuan tupajpimari paica: Cancunata cachaj jatun mandajpajman tigrashpa cashna nigrichij: Mandaj Diosca cashnami nin: ¿Israel llajtapica Dios mana tiyajpichu, Ecronpi causajcunapaj Baal-zebub diosta tapuchun cacharcangui? Chai diosta tapunaman cachashcamanta cunanca can siricun camamantaca mana jataringuichu, huañunguitajmi ninmi ninguichij nircami– nishpami huillarcacuna.
7Chaimi jatun mandajca:
–Cancunahuan tupashpa chashna nij runaca ¿ima layataj carca?– nirca.
8Shina nijpi paicunaca:
–Chai runaca millmayuj churanata churashca, carahuan chumbillirishcami carca– nijpimi, jatun mandajca:
–Tisbita Eliasmari cashca canga– nirca.
9Chashna nishcahuanmi pichca chunga soldadocunata mandaj shuj soldadotaca, pai mandacun soldadocunandij Eliaspajman cacharca. Paicuna Eliaspajman huichiyanapajca, Eliasca shuj urcu jahuapimi tiyacurca. Chaipimi soldadocunata mandajca:
–Diospaj runa, jatun mandajca cantaca uriyamuchun ninmi– nirca.
10Shina nijpi Eliasca pichca chunga soldadocunata mandajtaca:
–Diospaj runataj ñuca cajpica, jahua pachamanta nina shamushpa cantapish, cambaj pichca chunga soldadocunatapish tucui rupachichun– nijpica jahua pachamanta nina shamushpami soldadocunata mandajtapish, paipaj pichca chunga soldadocunatapish tucui rupachirca.
11Chashna tucujpipish jatun mandajca cutinllatajmi pichca chunga soldadocunata mandaj shujtaj soldadota pichca chunga soldadocunandij cacharca. Paipish Eliastaca:
–Diospaj runa, jatun mandajca utca uriyamuchun ninmi– nircami.
12Shina nijpi Eliasca:
–Diospaj runataj ñuca cajpica, jahua pachamanta nina shamushpa candij cambaj pichca chunga soldadocunandij tucui rupachichun– nijpica, jahua pachamanta nina shamushpami, chai mandaj soldadotapish, paipaj pichca chunga soldadocunandij tucui rupachirca.
13Chai ishquipaj q'uipapish, jatun mandajca pichca chunga soldadocunata mandaj shujtaj soldadotami, pai mandacun pichca chunga soldadocunandij Eliaspajman cacharca. Ishquipaj q'uipa cachashca soldado Eliaspajman huichiyashpaca: Eliaspaj ñaupajpi cungurishpami:
–Diospaj runa, cambajta ruraj ñucapish, cambajta ruraj cai pichca chunga soldadocunapish cambaj ñaupajpi imapajllapish alli ricurijpica ama huañuchipaichu. 14Ñucapaj ñaupa shamuj pichca chunga soldadocunata mandaj ishqui soldadocunataca jahua pachamanta nina shamushpami paicunapaj soldadocunandij tucui rupachishca. Cunanca ñuca causaita llaquishpa ama chingachihuaichu– nircami.
15Shina nijpi Mandaj Diospaj angelca Eliastaca:
–Ama manchashpa paihuan uriyailla– nijpimi Eliasca, jatarishcahuan chai soldadohuan jatun mandajpajman uriyarca. 16Chaipica Eliasca:
–Mandaj Diosca cashnami nin: ¿Canca Israelpica Dios illajpi shinamari, Ecronpi causajcunapaj Baal-zebub diosta tapuchun huillashpa purijcunata cacharcangui? Chashna cashcamantaca can siricun camamantaca, cunanca ña mana jataringuichu, huañunguitajmi ninmi– nircami.
17Ocoziasca, Mandaj Dios huillachijpi Elías huillashca shinallatajmi huañurca. Ocoziasca, churicunata mana charishcamantami paipaj randica paipaj huauqui Joram mandarca. Judá llajtata Josafatpaj churi Joram ña ishqui huatata mandacujpimi chashna tucurca.
18Ocozías ashtahuan imalla rurashcata, ashtahuan yachasha nishpaca Israel llajtata jatun mandajcuna imallata rurashcata quillcashca libropimi ricuna.
Currently Selected:
2 REYES 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.