1 REYES 22
22
Siriocuna Acabta mishanata Micaías huillashcami
(2 Cr 18.1-34)
1Siriocunahuan, israelcunahuanca quimsa huatatami mana macanacushpa causarcacuna. 2Judá llajtata jatun mandaj Josafatca ña quimsa huatata mandacushpami, Israel llajtata jatun mandaj Acabta ricunaman rirca. 3Chaipimi Israel llajtata jatun mandajca paipajta rurajcunataca:
–Galaadpi caj Ramot pueblo ñucanchijpaj cashcataca, yachanguichijmi. Shina cajpipish Siria llajtata jatun mandajpaj maquimanta quichungapajca ñucanchijca imata mana rurashcanchijchu– nircami.
4Chaipimi Josafattapish:
–Galaadpi caj Ramotpi causajcunahuan macanacugringapaj, ñucahuan shamusha ninguichu– nijpi Josafatca Israel llajtata jatun mandajtaca:
–Ñucapish canpish shuj shinallami canchij. Ñuca soldadocunapish, ñuca caballocunapish cambaj cashca shinallatajmi– nirca.
5Chai q'uipami Josafatca, israelcunata jatun mandajtaca:
–Mandaj Dios imata nishcata tapuchunmi rogani– nirca.
6Chaimi israelcunata jatun mandajca, 400 shina profetacunata tandachishpa:
–¿Galaadpi caj Ramotpi causajcunahuanca macanacugrishachu, mana cashpaca saquishallachu?– nijpi paicunaca:
–Macanacugrilla, Mandaj Diosmi cambaj maquipi churanga– nircacuna.
7Shina nijpipish Josafatca:
–Cai llajtapica ¿manachu Mandaj Diospaj profeta shujtaj tiyan, paitapish tapushpa alli yachangapaj?– nircami.
8Josafat chashna nijpimi, israelcunata jatun mandajca:
–Imlapaj churi Micaías profeta tiyanrajmi, paitapish Mandaj Dios imata nishcata tapuchinchijmanchari. Paica shuj cutinllapish ima allita manamari huillanchu, ashtahuanpish llaquillatamari huillan. Chaimantami paitaca p'iñani– nijpi Josafatca:
–Jatun mandaj ama chashna rimaichu– nirca.
9Chaipimi israelcunata jatun mandajca paipajta ruraj shujta cayashpaca:
–Imlapaj churi Micaiasta utca pushamugri– nirca.
10Israelcunata jatun mandajpish, Judá llajtata jatun mandaj Josafatpish mandajcuna churana churanata churarishcami, Samariaman yaicuna pungu c'uchullapi caj plazapi jatun mandajcuna tiyarinapi tiyacurcacuna. Profetacunaca tucuicunami paicunapaj ñaupajpi huillacurcacuna. 11Quenaanapaj churi Sedequiasca, fierro gachucunatami rurachishca carca. Chaimantaca: “Mandaj Diosca cashnami nin: Siriocunataca cai gachucunahuan sagmashpami tucuicunata huañuchingui ninmi” nishpami caparirca.
12Profetacunapish tucuicunami chai shinallataj huillashpa jatun mandajtaca: “Galaadpi caj Ramotmanca huichiyailla. Mandaj Diosmari cambaj maquipi churashpa chai macanacuitaca mishachinga” nircacuna.
13Micaiasta pushagrij huillaj runaca paitaca:
–Caishuj profetacunaca tucuicunami jatun mandajtaca, mishanguimi nishpa cushichicuncuna. Canpish jatun mandajtaca, paicuna nishca shinallataj mishanguitajmi nishpa ashtahuan cushichingui– nircami.
14Shina nijpimi Micaiasca:
–Mandaj Diosca causajmi. Ñucaca Mandaj Dios imata huillachun nishcallatami huillasha– nirca.
15Micaías jatun mandajpajman shamujpi jatun mandajca:
–Micaías, Galaadpi caj Ramotpi causajcunahuan ¿macanacungapajca huichiyashunchu mana cashpaca saquishunllachu?– nijpimi Micaiasca:
–Macanacungapaj huichiyailla mishanguichijmi. Mandaj Diosmi paicunataca can jatun mandajpaj maquipi churanga– nircami.
16Chaimi jatun mandajca:
–¿Mashna cutincamataj imatapish chashnataj cana cajllapi Mandaj Diospaj shutipica huillangui nicushallari?– nirca.
17Shina nijpi Micaiasca: “Tucui israelcunatami michij illajlla ovejacuna shina urcucunapi caita chaita puricujta ricurcani. Chaimi Mandaj Diosca: Caicunaca mandaj illajllamari puricuncuna. Tucuicuna imata mana manchashpa paicunapaj huasicunaman tigrachunlla nirca” nircami.
18Israelcunata jatun mandajca Josafattaca:
–Chai runaca ñucapajca ima alli cana cashcataca mana huillangachu, ashtahuanpish llaqui cana cashcallatami huillanga nircanimi. ¿Manachu chashnallataj huillan?– nircami. 19Chaimi Micaiasca:
–Mandaj Dios imata nishcata uyayari. Mandaj Diostaca paipaj jatun tiyarinapi tiyacujtami ricurcani. Jahua pachapi paipajta rurajcunapish alli ladomanpish, lluqui ladomanpish paipaj c'uchupi cajtami ricurcani. 20Mandaj Diosca paicunataca: Galaadpi caj Ramotman huichiyashpa Acab llaqui tucugrichunca ¿maijantaj chaipi macanacugrina yuyaita cushpa umanaman risha ninguichij? nijpi shujca shujta, caishujca shujtajtami ninacurca. 21Mandaj Diospaj ñaupajman shuj espíritu shamushpami: Ñuca chai yuyaita cugrisha nijpi, Mandaj Diosca: ¿Ima shinataj umagringui? nirca. 22Shina nijpi chai espirituca: Ñuca rishpaca, tucui profetacunatami llullachishpa huillachigrini nijpimi Mandaj Diosca: Can nishca shinallataj rurashpa umagrilla. Paitaca umai tucunguimi nirca. 23Mandaj Diosmi cambaj tucui profetacunapaj shimiman llullachij espíritu richun saquirca. Mandaj Diosllatajmi can llaqui tucuchunpish nirca– nircami.
24Chaimi Quenaanapaj churi Sedequiasca Micaiasta quijaduspi huajtashpaca:
–Ñucapi caj Mandaj Diospaj Espirituca ¿maitataj cambajman rishpaca chashnaca huillachingari?– nirca.
25Shina nijpimi Micaiasca:
–Miticungapaj caishuj ucuman chaishuj ucuman huasi ucupi puricui punllami chashnataj cashcataca yachangui– nirca.
26Chaimi israelcunata jatun mandajca:
–Micaiasta japishpa pueblota mandaj Amonpajman, jatun mandajpaj churi Joaspajman apashpa, 27cashna ninguichij: Cai runataca carcelpi churashpa macanacuita mishashpa ñuca tigramungacama, ashitajllata carashpa, yacutapish p'ichijllata cushpa huanachicuichij ninmi jatun mandajca nigrichij– nircami.
28Shina nijpipish Micaiasca: “Macanacuita mishashpa alli can tigramushpaca, ñucaca Mandaj Dios manapish chashna huillachijpi chashna huillashcata yachangui” nircami. Chashna nishcahuanmi: “Tucuicunami cai nishcataca uyanguichij” nirca.
29Israelcunata jatun mandajhuan, Judá llajtata jatun mandaj Josafathuanca Galaadpi caj Ramotmanmi huichiyarca. 30Israelcunata jatun mandajca Josafattaca:
–Ñucaca shujtaj churanata churarishpami macanacungapaj risha. Canca cambaj churanallatataj churarishca ringui– nishpaca israelcunata jatun mandajca, shujtaj churanata churarishpami macanacunaman rirca. 31Siria llajtata jatun mandajca carrocunapi purij quimsa chunga ishqui paipaj soldadocunata mandajcunataca: “Israelcunahuanca soldadocunahuanpish, soldadocunata mandajcunahuanpish ama macanacunguichijchu. Ashtahuanpish paicunata jatun mandajllahuan macanacunguichij” nircami. 32Siria llajtapaj carro soldadocunata mandajcuna Josafatta ricushpaca: “Caitajmari israelcunata jatun mandaj” ninacushpami paihuan macanacungapaj paipajman shamujpi, Judá llajtata jatun mandaj Josafatca caparirirca. 33Siria llajtapaj carro soldadocunata mandajcunaca israelcunata jatun mandaj mana cashcata ricushpami, paitaca saquishpa rircallacuna. 34Ashtahuanpish shuj soldadomi puntajlla caspita arcohuan yangalla shitajpi chai caspica israelcunata jatun mandaj churarishca fierro churana chaupita yaicushpa chugrichirca. Chaimi paipaj carrota apajtaca:
–Chugrichishcamari cani. Carrota muyuchishpa cai macanacuimanta ñucata llujshichi– nirca.
35Chai punllaca chai macanacuica ashtahuanmi sinchiyarca. Jatun mandajca paipaj carro jahuapimi siriocunapaj ñaupajpi carca. Ña chishiyaitaca huañurcallami. Chugrimantaca yahuarca carro cajonpi cuchayajtami llujshirca. 36Inti ña huashicugrijpimi, carpa huasimanta shuj caparishpaca: “¡Tucuicuna quiquin pueblocunaman, quiquin llajtacunaman tigrashunchij!” nirca. 37Jatun mandaj huañujpica, Samaria puebloman apamushpami Samariapi pambarcacuna. 38Chai carrotaca Samariapi caj tanque yacupimi maillarcacuna. Acabpaj yahuartaca allcucunami lambirca. Chai tanque yacupica huainayashcahuan causaj huarmicunami armaj carca. Mandaj Dios ima shina huillachishca shinallatajmi tucurca.
39Acab ashtahuan imallata rurashcata, tucui imallata rurashcata, pai mandana huasita marfilhuan rurashcata, maijanlla pueblocunata rurashcata ashtahuan yachasha nishpaca, israelcunata jatun mandajcuna imallata rurashcata quillcashca libropimi ricuna. 40Acab huañushpa paipaj ñaupa yayacunahuan dormijpica, Acabpaj randica paipaj churi Ocoziasmi mandarca.
Judá llajtata Josafat mandashcami
(2 Cr 20.31-37)
41Israelcunata Acab chuscu huatata ña mandacujpimi Asapaj churi Josafatca, Judá llajtata mandai callarirca. 42Mandai callaringapajca Josafatca quimsa chunga pichca huatayujmi carca. Jerusalenpica ishqui chunga pichca huatatami mandarca. Paipaj mamaca, Silhi shuti runapaj ushushi Azuba shutimi carca.
43Josafatca Mandaj Diospaj ñaupajpica imata mana pandashpami, paipaj yaya Asa purishca shinallataj mana maiman anchurishpa chai ñancunallapi purirca. Chashna ruraj cashpapish lomacunapi tiyaj altarcunapi israelcuna sacrificiota ruracushcamanta, inciensota rupachicushcamantaraj mana anchuchi tucurcachu.
44Josafathuan israelcunata jatun mandajhuanca, mana p'iñanacushpa causanatami ari ninacurcacuna. 45Josafat ashtahuan imalla rurashcata, pai c'ari c'ari cashcata, jatun macanacuicunata rurashcata ashtahuan yachasha nishpaca, Judá llajtata jatun mandajcuna imallata rurashcata quillcashca libropimi ricuna. 46Josafatca paipaj yaya Asa mandacui punllacunapi saquirishca c'aripurallataj siririjcunataca p'ichajtami anchuchirca. 47Chai huatacunaca Edom llajtapica jatun mandajca mana tiyarcachu. Jatun mandajpaj randi churashca mandajllami tiyarca.
48Josafatca Tarsisman purij jatun barcocunatami rurarca. Chai barcocunapimi Ofir llajtamanta curita apanaman rina carca. Ashtahuanpish barcocuna Ezión-geberpi p'aquirijpimi mana rircacuna. 49Chaimi Acabpaj churi Ocoziasca Josafattaca: “Ñucapajta rurajcunahuan, cambajta rurajcunahuan jatun barcocunapi cachashun” nircami.
Ashtahuanpish Josafatca mana chaita rurasha nircachu.
50Josafat huañushpa paipaj ñaupa yayacunahuan dormijpica, paipaj ñaupa yaya Davidpaj pueblopimi pambarcacuna. Paipaj randica paipaj churi Jorammi mandarca.
Israel llajtata Ocozías mandashcami
51Judá llajtata ña chunga canchis huatata jatun mandaj Josafat mandacui huatami, Acabpaj churi Ocoziasca, israelcunata mandai callarirca. Paica ishqui huatatami, Samariapi mandarca. 52Ocoziasca, Mandaj Diospaj ñaupajpica mana allitami rurarca. Paipaj yaya purishca ñanllapitaj purishpa, paipaj mamapaj ñanllatataj catishpa, Nabatpaj churi Jeroboam purishca ñanllapitaj purishpami, israelcunataca juchallichirca. 53Paica paipaj yaya shinallataj Baalpajta rurashpa chaita adorashpami israelcunapaj Mandaj Diostaca yallitaj p'iñachirca.
Currently Selected:
1 REYES 22: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.